ភ្នំពេញ៖ មកទល់ពេលនេះ ប្អូនស្រីរស់នៅខេត្តកែប ដែលត្រូវពស់ចឹកបណ្តាលឲ្យរងរបួសធ្ងន់ធ្ងរកាលពី ៦ ថ្ងៃមុននេះ មិនទាន់ជាសះស្បើយនៅឡើយទេ ដោយនៅតែត្រូវការការជួយសង្គ្រោះពីក្រុមគ្រូពេទ្យ ខណៈនាងនៅតែខ្វះឈាម។ នេះបើតាមសាច់ញាតិរបស់ប្អូនស្រីបានបញ្ជាក់ប្រាប់ នៅលើបណ្តាញសង្គម។
យ៉ាងណាមិញ ស្របពេលដែលបងប្អូនជាច្រើន កំពុងបង្ហាញនូវក្តីអាណិតអាសូរជាខ្លាំង ចំពោះប្អូនស្រីខាងលើ ដែលក្របំផុត សូម្បីតែផ្ទះខ្ទមបិទបាំងដោយស័ង្កសីរហេករហាក ស្រាប់តែមានម្នាក់ក្នុងចំណោម១០០នាក់ បែរជាចាប់អារម្មណ៍ទៅជ្រុងអវិជ្ជមានមួយ ដោយបានរិះគន់ថា៖ «ម្ចាស់ផ្ទះខ្ជិលណាស់មើលទៅ មើលតែមុខផ្ទះដឹងហើយ»។
ក្រោយឃើញខមិនបែបនេះ ក្តៅចិត្តពេក ព្រោះខំឡើងខ្យល់ចាប់ខ្លួនឯងមិនគិតផងនោះ បងស្រីស្រស់ស្អាត សូសាវឿន មានគណនីហ្វេសប៊ុកឈ្មោះ Ung Sosavoeun ដែលជាញាតិជិតខាងដ៏មានចិត្តធម៌ បាននិងកំពុងខ្នះខ្នែងជួយស្វែងរកជំនួយសប្បុរសធម៌ដល់ប្អូនស្រី ចរិយា បានឆ្លើយតបទៅវិញថា៖ «អរគុណបង ដែលបានរិះគន់នៅពេលដែលគ្នាកំពុងតែតាមរកជំនួយ បើសិនជាបងផ្លាស់ចិត្តគំនិតមកគិតរឿងជួយស៊ែររកជំនួយវិញ ប្រហែលជាបានបុណ្យច្រើនជាងបង កុំទៅរវល់រឿងការរៀបចំអី ព្រោះតែគាត់ក្រហើយល្ងង់ ហើយគ្មានពេលនៅផ្ទះសម្អាត រវល់តែរកលុយរកអង្ករច្រកឆ្នាំងពេក ទើបមើលទៅមិនសមនឹងមានសណ្តាប់ធ្នាប់នឹងណាបង»៕
ដោយ៖ លឹម ហុង
