បន្ទាយមានជ័យ ៖ ក្រុងប៉ោយប៉ែត នៅខេត្តបន្ទាយមានជ័យ មានទីផ្សារល្អ ខាងបូរី សំណង់វីឡា ផ្ទះល្វែង ។ ហេតុដូច្នោះបានជា ក្រុមហ៊ុនសុខារ៉េស៊ីដិន ក៏បានហក់ចូលក្នុងទីផ្សារលំនៅឋានប្រណីត និងផ្ទះអាជីវកម្មដើម្បីធ្វើវិនិយោគក៏ដូចជាប្រកួតប្រជែងនឹងក្រុមហ៊ុនឯកជនក្នុងស្រុកមួយចំនួនទៀតផងដែរ នៅក្រុងនេះ។
លោកឈាន សុខា ស្ថាបនិក និងជាប្រធានក្រុមប្រឹក្សាភិបាលក្រុមហ៊ុនសុខារ៉េស៊ីដិន បាននិយាយក្នុងពិធីបុកគ្រឹះសាងសង់លំនៅឋានប្រណិតសុខារ៉េស៊ីដិន កាលពីល្ងាចថ្ងៃទី២៩ ខែមករាថា ៖ ក្រុមហ៊ុនលោកបានសម្លឹងឃើញ និងមកចូលរួមវិនិយោគវិស័យសំណង់លំនៅឋានប្រណិត និងផ្ទះអាជីវកម្មលើកដំបូងនៅចំណុចអតីតស្តង់ទឹកកកចាស់ ស្ថិតនៅខាងត្បូងផ្លូវជាតិលេខ៥ និងផ្លូវរថភ្លើង ក្នុងភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត លើផ្ទៃដី៣៦.៨៩១ម៉ែត្រក្រឡា និងមានផ្ទះ៣៥១ល្វែង។ ដំណើរការសាងសង់រួមមាន ជាប្រភេទផ្ទះមានរចនាបទបារាំងកាត់ថៃនិងខ្មែរ,ប្រព័ន្ធលូ ផ្លូវបេតុង ទឹកស្ពាត អគ្គីសនីនិងសួនច្បារជាដើម។
លោក ឈាន សុខា និយាយបន្តថា ៖ ដំណើរការសាងសង់នឹងត្រូវប្រើពេល ១៨ខែ បើសិនជាកាល:ទេស:និងអំណោយផលល្អ ។ ហើយពីដំណើរការមកទល់ពេលនេះ អតីថិជនបានគាំទ្រនិងទិញផ្ទះក្នុងគម្រោងបានប្រមាណ៥០ភាគរយនៃចំនួនផ្ទះ ៣៥១ល្វែងនោះហើយ ដោយបញ្ចុះតម្លៃពី៣ទៅ៧ភាគរយ ក្នុងតម្លៃជិត២៥.០០០ដុល្លាសរអា។ និងបង់រំលោះពី១២៥ដុល្លា ក្នុង១ខែ តទៅ។
ក្នុងនាមស្ថាបនិកនិងម្ចាស់គម្រោង លោកសូមថ្លែងអំណរគុណដល់អាជ្ញាធរដែនដីនិងជំនាញពាក់ព័ន្ធ រួមទាំងលោកសាន ស៊ានហូ អភិបាលក្រុងប៉ោយប៉ែត និងសូមប្តេជ្ញាចិត្តជម្រុញអោយដំណើរការសាងសង់មានល្បឿនលឿនបំផុត និងប្រកបដោយគុណភាព សុវត្ថិភាពខ្ពស់ជូនដល់អតិថិជនដែលបានគាំទ្រនិងទិញផ្ទះនៃគម្រោងអភិវឌ្ឍន៍លំនៅឋានប្រណឹតសុខារ៉េស៊ីដិននេះ។
ហើយនារាត្រិដដែល ក្រុមហ៊ុនបានរៀបចំការកំសាន្តដោយប្រគុំតន្ត្រី កីឡាប្រដាល់ អាហារនិងចាប់ ចែករង្វាន់ដល់អតិថិជនផងដែរ។
លោក សាន ស៊ានហូ អភិបាលក្រុងប៉ោយប៉ែតបាននិយាយថា :ដោយសារប្រទេសជាតិ ក៏ដូចជាខេត្ត ស្រុកក្រុងនិងមូលដ្ឋានមានសុខសន្តិភាព បរិយាកាសជីវភាពសេដ្ឋកិច្ច សង្គមកិច្ចល្អក្រោមការដឹកនាំរបស់រាជរដ្ឋាភិបាលមានសម្តេចតេជោហ៊ុន សែនជាប្រមុខ និងមានការបង្កលក្ខណ:ងាយស្រួលនានាទើបមានក្រុមហ៊ុននិងផ្នែកឯកជននានាបានមកបណ្តាក់ទុនរកស៊ី និងធ្វើអាជីវកម្មនៅក្នុងក្រុងប៉ោយប៉ែតនេះ។
ម្យ៉ាងទៀត ក៏ដោយសារភូមិសាស្ត្រក្រុងនេះ មានអំណោយផលនិងមានសក្តានុពលល្អព្រោះនៅជាប់តំបន់ច្រកព្រំដែន ជាតំបន់ដែលមានកំណើនពលរដ្ឋមកពីគ្រប់ខេត្ត រាជធានីប្រមូលផ្តុំគ្នាទីនេះច្រើន។ លោកបញ្ជាក់ថា នៅក្រុងនេះ ផ្នែកឯកជនបានអភិវឌ្ឍន៍លឿនជាងផ្នែករដ្ឋលើវិស័យសំណង់អគារ សំណង់លំនៅឋាន សំណង់ផ្លូវបេតុង លូដែលក្នុងនោះពលរដ្ឋបានចេញថវិកា១០០ភាគរយ ។
ចំណែកនៅក្រុងសិរីសោភ៍ណជាទីប្រជុំជនខេត្តវិញ មានតិចតួចបំផុតនូវវិស័យអចលនវត្ថុមានសំណង់បូរីផ្ទះល្វែង ឬភូមិគ្រឹះ។រីឯនៅស្រុក៧ទៀត រឹតតែអត់មានសោះតែម្តង។
ក្នុងនាមអាជ្ញាធរដែនដីនិងសមត្ថកិច្ចជំនាញ លោក សាន ស៊ានហូ បានស្វាគមន៍ លើកទឹកចិត្តនិងថ្លែងអំណគុណដល់មន្ត្រីដឹកនៃថ្នាក់លើនិងមន្ត្រីថ្នាក់ក្រោមដែលបានបង្កលក្ខណ:និងបរិយាកាសសម្រាប់ផ្នែកឯកជន។
ក៏សូមអរគុណនិងលើកទឹកចិត្តដល់ក្រុមហ៊ុននិងវិនិយោគិនកម្ពុជាក្នុងស្រុកនិងបរទេស រួមទាំងក្រុមហ៊ុនសុខារ៉េស៊ីដិនសំណង់ផ្ទះប្រណិតនេះ ដែលបានមកបណ្តាក់ទុនរកស៊ីនៅភូមិសាស្ត្រក្រុងប៉ោយប៉ែត។
លោកបង្ហើបដែរថ្មីៗនេះមានក្រុមហ៊ុនពីប្រទេសចិនមួយចំនួនបានមកពិភាក្សា សិក្សាលទ្ធភាពដាក់ទុនវិនិយោគលើវិស័យអចលនវត្ថុ ។ពោលគឺវាដូចជាបន្ថែមលើ ក្រុមហ៊ុននិងអាជីវករក្នុងស្រុកមានស្រាប់ជិត១០ក្រុមដែលបានវិនិយោគសាងសង់បូរីមានអគារ សំណង់ផ្ទះល្វែង ប្រមាណជិត១០កន្លែង។
លោកអភិបាលក្រុងក៏បានលើកឡើងពីគម្រោងស្តារនិងអភិវឌ្ឍន៍ទូទៅនៃក្រុងប៉ោយប៉ែត តាំងពីបញ្ហាសណ្តាប់ធ្នាប់ សំណង់អាណាធិបតេយ្យ អនាម័យបរិស្ថាន ហេដ្ឋារចនាសម្ព័ន្ធ ការរៀបរនាំងចំពុះទ្រងផ្លូវ ភ្លើងបំភ្លឺតាមផ្លូវ ភ្លើងស្តុប សួនច្បារ ការដាំដើមឈើនិងដើមត្នោត ការរៀបចំសម្រួលសំណង់ប្រាសាទកំពូល៣មកដាក់នៅរង្វង់មូលជាប់បរិវេណមាត់ច្រកព្រំដែន ប្រព័ន្ធលូ ផ្លូវបេតុងជាដើម៕ ដោយ ៖ បន្ទាយ
