ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង គីម ជុងអ៊ុន បាននិយាយនៅថ្ងៃសុក្រនេះថា មិនចាំបាច់មានកិច្ចប្រជុំកំពូលទៀតទេរវាងកូរ៉េខាងជើង និងអាមេរិចឡើយ ប្រសិនបើអាមេរិចមិនផ្តល់ការផ្លាស់ប្តូរ។
មេដឹកនាំកូរ៉េខាងជើង គីម ជុងអ៊ុន និងប្រធានាធិបតីអាមេរិចដូណាល់ ត្រាំ បានជួបគ្នាដំបូងនៅក្នុងប្រទេសសិង្ហបុរីកាលពី ២ឆ្នាំមុន ប៉ុន្តែកិច្ចចរចារក្នុងការរំសាយអាវុធនុយក្លេអ៊ែររបស់កូរ៉េខាងជើងបានជាប់គាំង ចាប់តាំងពីកិច្ចប្រជុំកំពូលលើកទី ២នៅក្នុងទីក្រុងហាណូយប្រទេសវៀតណាមបានបរាជ័យកាលពីឆ្នាំ ២០១៩។
នៅក្នុងកិច្ចប្រជុំចុងក្រោយ កូរ៉េខាងជើងបង្ហាញពីឆន្ទៈក្នុងការបោះបង់ចោលអាវុធនុយក្លេអ៊ែរ ជាថ្នូរនឹងការទទួលបានការបន្ធូរបន្ថយទណ្ឌកម្ម ខណៈដែលភាគីអាមេរិចប្រកាសថាគ្មានការបន្ធូរបន្ថយឡើយ ទាល់តែកូរ៉េខាងជើងរំសាយអាវុជរបស់ខ្លួនចោល។
លោកដូណាល់ ត្រាំ នៅសប្តាហ៍នេះ បាននិយាយថា គាត់នឹងជួបជាមួយនឹងមេដឹកនាំកូរ៉េខាងជើងម្តងទៀត ប្រសិនជាកិច្ចប្រជុំនោះនឹងមានប្រយោជន៍។ ការប្រកាសរបស់លោក កើតឡើងក្រោយពេលមានការព្យាករណ៍ថា គាត់នឹងស្វែងរកកិច្ចប្រជុំកំពូលមួយទៀត ប្រសិនជាវាអាចជួយដល់ការបោះឆ្នោតឡើងវិញរបស់លោកក្នុងខែវិច្ឆការខាងមុខ។
ប៉ុន្តែនៅក្នុងសេចក្តីប្រកាសដែលចេញដោយភ្នាក់ងារសារព័ត៌មានកូរ៉េខាងជើង (KCNA) Kim Yo Jong ដែលជាប្អូនស្រីបង្កើតរបស់មេដឹកនាំកូរ៉េខាងជើងបាននិយាយថា “វាមិនចាំបាច់សម្រាប់ពួកយើងអង្គុយជាមួយអាមេរិចនៅពេលនេះទេ។”
ប្រសិនជាកិច្ចប្រជុំកំពូលកើតឡើង នាងនិយាយថា “វាច្បាស់ណាស់ថា វានឹងត្រូវបានគេប្រើប្រាស់ជាអំនួតដ៏គួរឲ្យធុញទ្រាន់ពីភាគីម្ខាងទៀត”។
នាងថ្លែងទៀតថា ការរំសាយនុយក្លេអ៊ែរមិនអាចកើតឡើងនៅចំនុចនេះទេ ហើយវាអាចកើតឡើងជាមួយនឹងជំហានសំខាន់ៗស្របគ្នានឹងភាគីផ្សេងទៀត ដែលការសង្កត់ធ្ងន់របស់នាងមិនសំដៅទៅលើការដកទណ្ឌកម្មឡើយ។
នាងមិនបានបញ្ជាក់ឲ្យជាក់លាក់ឡើយ។
របបព្យុងយ៉ាងបញ្ជាក់ថា ខ្លួនត្រូវការអាវុធនុយក្លេអ៊ែរ ដើម្បីការពារប្រឆាំងនឹងការឈ្លានពានដែលអាចកើតមានឡើងពីសំណាក់អាមេរិច។
សូមបញ្ជាក់ថា មេដឹកនាំកូរ៉េខាងបានប្រកាសកាលពីខែធ្នូក្នុងការបញ្ចប់ការផ្អាកធ្វើតេស្តអាវុធនុយក្លេអ៊ែរ និងមីស៊ីលឆ្លងទ្វីប ហើយទីក្រុងព្យុងយ៉ាងបាននិយាយថា ខ្លួនគ្មាបំណងបន្តការចរចារជាមួយនឹងអាមេរិចឡើយ ប្រសិនជាអាមេរិចមិនបោះបង់ចោលគោលនយោបាយសត្រូវលើកូរ៉េខាងជើង៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP
