អ្នកជំនួញជនជាតិឥណ្ឌាម្នាក់ បានកំពុងធ្វើឲ្យប្រជាអ៊ីនធឺណិតនៅជុំវិញពិភពលោក ផ្ទុះការភ្ញាក់ផ្អើលគ្រប់ៗគ្នាតែម្តង ក្រោយពីបានដឹងថា គាត់បានចំណាយប្រាក់ ៤.០០០ ដុល្លារ ដើម្បីទទួលបានម៉ាសធ្វើពីលោហៈដ៏មានតម្លៃ។
លោក Shankar Kurhade អាយុ ៤៩ ឆ្នាំមកពី Pune បានប្រាប់ AFP ថា “វាគឺជាម៉ាសស្តើង ហើយមានរន្ធញើសតូចៗដែលជួយឱ្យខ្ញុំដកដង្ហើមបាន”។
លោកបាននិយាយថា “មានបងប្អូនយ៉ាងច្រើន បានមកស្នើសុំខ្ញុំដើម្បីថតរូប Selfie។ ពួកគេពិតជាភ្ញាក់ផ្អើលណាស់ នៅពេលពួកគេឃើញខ្ញុំពាក់ម៉ាសមាសនៅតាមផ្សារ”។
Kurhade ដែលជាម្ចាស់ក្រុមហ៊ុនផលិតរោងដែកឧស្សាហកម្ម បានប្រាប់កាសែត Indian Express ថា គាត់មិនបានធ្វើវាជាសាធារណៈទេ ប៉ុន្តែបាននិយាយថា ម៉ាសមុខនេះមិនមែនជាជម្រើសល្អបំផុត ក្នុងការប្រយុទ្ធប្រឆាំងនឹងការរីករាលដាលនៃវីរុសនេះបានទេ។
គាត់បានសារភាពប្រាប់ AFP អំពីម៉ាសទម្ងន់ ៥៧ ក្រាម នេះថា “ខ្ញុំមិនប្រាកដទេថាតើវាមានប្រសិទ្ធភាព ក្នុងការការពារខ្ញុំពីការឆ្លងមេរោគវីរុសនេះដែរឬទេ” ។
អ្នកជំនួញរូបនេះក៏បានបញ្ជាក់ឲ្យដឹងថា សព្វថ្ងៃនេះគាត់កំពុង “ប្រយ័ត្នប្រយែង” ខ្លាំងណាស់ ចំពោះវីរុសកូរ៉ូណា។
លោកបានប្រាប់កាសែត Indian Express ទៀតថា “វាមិនមែនជាមាស ឬ ម៉ាសក្រណាត់ទេ ប៉ុន្តែ ការឃ្លាតឆ្ងាយពីសង្គម និងការលាងដៃ ដែលជាវិធានការការពារយើងគ្រប់គ្នាពីការឆ្លងមេរោគនេះ” ។
សូមបញ្ជាក់ថា គិតត្រឹមព្រឹកថ្ងៃចន្ទ ដើមសប្តាហ៍នេះ ប្រទេសឥណ្ឌាមានករណីឆ្លងជិត ៧០០.០០០ នាក់ និងមានមនុស្សជិត ២ ម៉ឺននាក់បានស្លាប់។ នេះបើយោងតាមទិន្នន័យរបស់សាកលវិទ្យាល័យ Johns Hopkins ៕
ប្រែសម្រួល៖ លឹម ហុង (ប្រភព៖ nypost)
