ភ្នំពេញ៖ ករណីសមត្ថកិច្ចស្លៀកពាក់ស៊ីវិល វ៉ៃទាត់ធាក់ប្រជាពលរដ្ឋដែលត្រឹមជាជនសង្ស័យ ដែលបង្កឲ្យមានការរិះគន់យ៉ាងខ្លាំងក្លាមិនទាន់ទាំងស្ងប់ស្រួលបួលផង ឥឡូវនេះ ឈានចូលករណីមួយទៀត ឃើញហើយពិតជាសាហាវព្រៃផ្សៃខ្លាំងណាស់ ខណៈដែលសមត្ថកិច្ចស្លៀកពាក់ស៊ីវិលមួយក្រុម បានព្រួតវ៉ៃទាត់ធាក់ទៅលើបុរសម្នាក់ បណ្តាលឲ្យបែកក្បាលដេកដួលសន្លប់ស្តូកស្តឹងនៅលើថ្នល់គួរឲ្យអាសូរបំផុត។
ជាមួយនឹងទង្វើដែលបានកើតឡើងដដែលជាដដែលនេះ ឃើញថាបាននិងកំពុងធ្វើឲ្យមហាជនផ្ទុះកំហឹងយ៉ាងខ្លាំង រហូតដល់ថ្នាក់និយាយថា នេះជាអំពើអន្ធពាលអាណាធិបតេយ្យក្នុងសង្គម របស់សមត្ថកិច្ចស្លៀកស៊ីវិលមួយក្តាប់តូច ដែលកំពុងធ្វើឲ្យបាត់បង់តម្លៃសេចក្តីថ្លៃថ្នូរដល់មន្ត្រីយ៉ាងច្រើន ដែលបានអនុវត្តល្អទៅតាមជំនាញដែលទទួលការបណ្តុះបណ្តាលត្រឹមត្រូវ ដែលថ្នាក់លើមិនគួរទុកឲ្យបន្តដើរធ្វើបាបប្រជាជនបែបនេះទៀតឡើយ។
ក្នុងនោះផងដែរ គេក៏បានលើកឡើងថា អ្នកកាន់ច្បាប់គេមិនធ្វើអ៊ីចឹងទេ ធ្វើរបៀបនេះមានតែពួកបាតសង្គម, ប៉ូលិសអនុវត្តន៍បែបនេះគ្រោះថ្នាក់ប្រជារាស្ត្រ! បញ្ហាគ្រឿងញៀនជាបញ្ហាសាកល រីឯអ្នកប្រើប្រាស់ ឬជនសង្ស័យ គឺជាអ្នករងគ្រោះប៉ុណ្ណោះ។ ការធ្វើទារុណកម្ម និងសម្លាប់ក្រៅច្បាប់ ដោយអះអាងថាខ្លួនជាអ្នកអនុត្តន៍ច្បាប់ នោះវាខុសហើយ។ សូមពិចារណា!!។
បន្ថែមលើនេះផងដែរ មហាជនក៏បានរិះគន់ថា ថ្នាក់លើបានត្រឹមតែចេញមុខបកស្រាយហេតុផល អប់រំ និងណែនាំប៉ុណ្ណោះ ទើបធ្វើឲ្យសមត្ថកិច្ចប្រភេទនេះមិនខ្លាចញញើត ហើយបន្តធ្វើទង្វើសាហាវព្រៃផ្សៃបែបនេះ ដែលធ្វើឲ្យតម្លៃសង្គមកាន់តែចុះខ្សោយកាន់តែខ្លាំង។
ជុំវិញនឹងករណីនេះ «CEN» រង់ចាំការបំភ្លឺពីគ្រប់ភាគីពាក់ព័ន្ធទាំងអស់៕ ដោយ៖ លឹម ហុង
