ភ្នំពេញ ៖ ប្រទេសកម្ពុជានិងលីប៉ង់ បន្តពិភាក្សាដើម្បីបន្តជំរុញឲ្យមានកិច្ចព្រមព្រៀងជាមុនសិន ព្រោះថាដើម្បីបង្កើតបានឱកាសការងារ និងសុវត្ថិភាពនៃការងារ នៅប្រទេសលីប៉ង់ ដោយសារតែការងារនៅលីបង់មានគ្រប់ផ្នែក ដូចជា ផ្នែកឧស្សាហកម្ម ផ្នែកសេវាកម្ម និងផ្នែកជំនួយការមេផ្ទះជាដើម ។
លោក អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ អនុញ្ញតអោយក្រុមការងារទំនាក់ទំនងរបស់សាធារណរដ្ឋលីបង់ចូលជួបពិភាក្សាការងារ ដើម្បីសុំយោបល់ពាក់ព័ន្ធនឹងកិច្ចសហប្រតិបត្តិការលើវិស័យការងារ និងបណ្តុះបណ្តាលវិជ្ជាជីវៈ នាថ្ងៃចន្ទទី២៩ ខែមករា ឆ្នាំ២០១៨នេះ នៅទីស្តីការក្រសួង។
លោករដ្ឋមន្ត្រីមានប្រសាសន៍ថា នេះជាឱកាសមួយដ៏ល្អ បើសិនជាយើងមានកិច្ចសហប្រតិបត្តិការនេះ ជាមួយសាធារណរដ្ឋលីបង់ ព្រោះថាលីបង់ជាប្រទេសមួយមានការអភិវឌ្ឍន៍ ហើយទន្ទឹមនឹងនេះយើងអាចពង្រីកទៅប្រទេសជិតខាង នៅក្បែរនោះ ដែលស្ថិតនៅជាប់អឺរ៉ុបថែមទៀត។នេះជាការជំរុញការបង្កើតនូវឱកាសក៏ដូចជាបើកទូលាយទីផ្សារការងារសម្រាប់ប្រជាពលរដ្ឋកម្ពុជា ពិសេសយុវជនដែលមានចំណាប់អារម្មណ៍។
លោករដ្ឋមន្ត្រីមានប្រសាសន៍បន្តថា ប្រទេសទាំងពីរត្រូវ ពិភាក្សាដើម្បីបន្តជំរុញឲ្យមានកិច្ចព្រមព្រៀងជាមុនសិន ព្រោះថាដើម្បីបង្កើតបានឱកាសការងារ និងសុវត្ថិភាពនៃការងារ យើងត្រូវតែមានចុះកិច្ចព្រមព្រៀងជាមុនសិន។ ការងារនៅលីបង់មានគ្រប់ផ្នែកដូចប្រទេសដទៃដែរ ដូចជា ផ្នែកឧស្សាហកម្ម ផ្នែកសេវាកម្ម និងផ្នែកជំនួយការមេផ្ទះជាដើម នេះជាឱកាសការងារមួយ ដែលយើងត្រូវខិតខំ។
លោកលើកឡើងថា កន្លងមកយើងមានកិច្ចព្រមព្រៀងជាមួយប្រទេសកាតា និងអារ៉ាប់សាអូឌីត។ ប្រសិនបើកម្ពុជាបង្កើត
ទីផ្សារការងារជាមួយ លីបង់បន្តទៀត ក៏ជាឱកាសដ៏ល្អសម្រាប់ប្រជាពលរដ្ឋទៅធ្វើការនៅទីនោះដែរ។
លោករដ្ឋមន្ត្រី មានប្រសាសន៍បញ្ជាក់ថា នេះជាការបើកឱកាសការងារថ្មីមួយទៀតដល់បងប្អូនពលករ ដែលអាចនឹង ទទួលបានប្រាក់ឈ្នួលខ្ពស់ និងមាន ឱកាសដើម្បី ចាប់យកមុខជំនាញថ្មីៗ ដែលប្រទេសទាំងនោះក៏មានការអភិវឌ្ឍន៍បច្ចេកវិទ្យាថ្មីៗ ដែលយើង នឹងអាចឲ្យកម្លាំងពលកម្មរបស់យើង អាចទៅសិក្សា និងចេះនូវជំនាញទាំងនោះ ហើយពេលត្រឡប់មកវិញ ពួកគេអាចក្លាយជាធនធានមនុស្សសម្រាប់បម្រើឲ្យសំណូមពរនៃទីផ្សារការងារ ឬមួយបង្កើតមុខរបរការងារថ្មីនៅក្នុងប្រទេសជំរុញការអភិវឌ្ឍន៍ដើម្បីឈានទៅគោលដៅកម្ពុជាជាប្រទេសដែលមានចំណូល មធ្យមកម្រិតខ្ពស់នៅឆ្នាំ២០៣០ នេះជាយុទ្ធសាស្ត្រមួយក្នុងការដោះស្រាយទៅលើបញ្ហាមុខរបរនិងការងារ ជូនដល់ប្រជាពលរដ្ឋយើង៕ ដោយ៖បញ្ញាស័ក្តិ
