ក្រុមបក្សប្រឆាំងហុងកុង បានធ្វើការរៀបចំស្តង់ប្រជាមតិទូទាំងទីក្រុង នៅថ្ងៃសោរ៍នេះ សម្រាប់ការធ្វើប្រជាមតិបឋម ក្នុងគោលបំណងរើសបេក្ខជនប្រជាធិបតេយ្យ ដែលមានឱកាសក្នុងការទទួលបានជោគជ័យ ក្នុងការបោះឆ្នោតក្រុមប្រឹក្សានិតិប្បញ្ញតិ្តនៅខែកញ្ញាខាងមុខ។
ការរៀបចំបោះឆ្នោតប្រជាមតិបឋម របស់ក្រុមបក្សប្រឆាំងនៅហុងកុង កើតឡើងជាងមួយសប្តាហ៍ក្រោយពេល ទីក្រុងប៉េកាំង បានដាក់ច្បាប់សន្តិសុខជាតិសម្រាប់ហុងកុង ដែលច្បាប់នោះធ្វើឲ្យមានការព្រួយបារម្ភ ពីការបាត់បង់សេរីភាព និងស្វ័យភាពកម្រិតខ្ពស់របស់ហុងកុង។
ច្បាប់សន្តិសុខថ្មីនឹងធ្វើការដាក់ទោសទណ្ឌ រហូតដល់មួយជីវិត ចំពោះអ្វីដែលចិនមើលឃើញថា ជាសកម្មភាពផ្តាច់ខ្លួន ភេរវកម្ម វិទ្ធង្សនា និងការឃុបឃិតជាមួយកងកម្លាំងបរទេស។
នៅមុនថ្ងៃធ្វើប្រជាមតិ ប៉ូលិសបានធ្វើការស្វែងរកការិយាល័យ អ្នកធ្វើប្រជាមតិឯករាជ្យឈ្មោះ Robert Chung ដែលវិទ្យាស្ថានស្រាវជ្រាវមតិសាធារណៈហុងកុងរបស់គាត់ បានជួយរៀបចំការបោះឆ្នោតប្រជាមតិនោះ ដែលវាធ្វើឲ្យមានការព្រួយបារម្ភកើនឡើង ក្នុងចំណោមសកម្មជនជាច្រើន នៃការជ្រៀតជ្រែងរបស់អាជ្ញាធរ ក្នុងការបោះឆ្នោតប្រជាមតិ។
សកម្មជនវ័យក្មេងដ៏លេចធ្លោម្នាក់ម្នាក់ឈ្មោះ Joshua Wong បាននិយាយមុនពេលបើកដំណើរការស្តង់ប្រជាមតិថា “ការបោះឆ្នោតបឋមគឺជាលើកទី ១ សម្រាប់ពួកគេ ដែលពួកយើងធ្វើដើម្បីឲ្យទីក្រុងប៉េកាំងដឹងថា ប្រជាជនហុងកុងមិនឱនលំទោនចំពោះចិនឡើយ”។
លោកបន្តទៀតថា “ពួកយើងសូមជំរុញឲ្យពិភពលោក ពិនិត្យមើលបញ្ហាហុងកុងជាបញ្ហាសកល”។
ខណៈដែលការធ្វើប្រជាមតិបឋម សម្រាប់តែក្រុមបក្សប្រឆាំង អ្នកសង្កេតការកំពុងតាមដានយ៉ាងជិតស្និទ្ធ ខណៈដែលពួកគេនិយាយថា ការចេញទៅបោះឆ្នោតនឹងក្លាយជាការសាកល្បងដ៏ធំមួយ នៃការប្រឆាំងដ៏ធំចំពោះច្បាប់សន្តិសុខជាតិ។
ការបោះឆ្នោតប្រជាមតិ គឺដើម្បីពង្រឹងឱកាសសម្រាប់បេក្ខជនប្រជាធិបតេយ្យ ក្នុងការសម្រេចឲ្យបានជ័យជំនះភាគច្រើនគឺ ៣៥បូក ក្នុងចំណោមអសនៈ ៧០ សម្រាប់ការបោះឆ្នោតនៅថ្ងៃទី ៦ ខែកញ្ញាខាងមុខ ដែលវាអាចនឹងផ្តល់អំណាច ដល់ពួកគេក្នុងការទប់ស្កាត់សំណើរបស់រដ្ឋាភិបាល។
ទីក្រុងហុងកុង ត្រូវបានអង់គ្លេស ប្រគល់ទៅឲ្យចិនវិញ កាលពីថ្ងៃទី ១ ខែកក្កដា ឆ្នាំ ១៩៩៧ ក្រោមកិច្ចព្រមព្រៀងមួយ ដែលផ្តល់សេរីភាព និងស្វ័យភាពកម្រិតខ្ពស់ដល់ទីក្រុងហុងកុងរយៈពេល ៥០ឆ្នាំ។ ហុងកុងជាផ្នែកមួយរបស់ចិន ប៉ុន្តែហុងកុងមានប្រព័ន្ធដឹកនាំដោយឡែកពីចិន។
ការដាក់ច្បាប់សន្តិសុខរបស់ចិនទៅលើហុងកុង ត្រូវបានគេមើលឃើញថា វានឹងធ្វើឲ្យហុងកុងបាត់បង់ស្វ័យភាពកម្រិតខ្ពស់។
អាមេរិចបានប្រកាសថា ទីក្រុងហុងកុង លែងមានស្វ័យភាពពីចិនទៀតហើយ ខណៈដែលអង់គ្លេស ប្រកាសផ្តល់សញ្ជាតិអង់គ្លេស ដល់ប្រជាជនហុងកុងជាង ៣លាននាក់ដែលមានលិខិតឆ្លងដែន ៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
