ភ្នំពេញ៖ នេះជារឿងដ៏គួរឲ្យភ្ញាក់ផ្អើល និងក៏ជាក្តីអាណិតអាសូរជាខ្លាំងផងដែរ ខណៈពេលដឹងថា ក្មេងប្រុសវ័យជំទង់២នាក់ មានអាយុចន្លោះពី១៣ ទៅ ១៥ ឆ្នាំ បានធ្វើដំណើរពីស្រុកកំណើត ដើម្បីមករកការងារធ្វើនៅភ្នំពេញ ប៉ុន្តែ ដោយសារតែពួកគាត់ពុំអាចរកការងារធ្វើបាននោះទេ ហើយណាមួយទីកន្លែងស្នាក់នៅក៏គ្មាន និងសូម្បីលុយសម្រាប់ទិញអាហារហូបផងនោះ បានសម្រេចស្វែងរកជំនួយពីសមត្ថកិច្ចប៉ុស្តិ៍នគរបាលទន្លេបាសាក់ជួយ ។ ជាការពិតណាស់ ដោយពុំអាចមើលនឹងភ្នែក លោកអនុសេនីយ៍ឯក សាល សណ្ដុះ បានឧបត្ថម្ភថវិកាមួយចំនួន សម្រាប់ពួកគាត់ទិញគ្រឿងបរិភោគផងដែរ។
នេះបើយោងតាមទំព័រហ្វេសប៊ុក ស្នងការដ្ឋាននគរបាលរាជធានីភ្នំពេញ បានសរសេរប្រាប់ឲ្យដឹងថា៖ «នៅថ្ងៃទី១១ ខែកក្កដា ឆ្នាំ២០២០ វេលាម៉ោង ១០៖១៥នាទី មានក្មេងប្រុសចំនួន ២នាក់ បានមកដល់ស្នាក់ការប៉ុស្ដិ៍នគរបាលរដ្ឋបាល ទន្លេបាសាក់ ដើម្បីពឹងពាក់សមត្ថកិច្ចយើងជួយសង្គ្រោះពួកគាត់ ដោយសារតែពួកគាត់បានចាកចេញពីស្រុកកំណើត នៅស្រុកជាំក្សាន្ដ ខេត្ដព្រះវិហារ ហើយបានមករកការងារធ្វើនៅរាជធានីភ្នំពេញ តែរកការងារធ្វើពុំបាន និងគ្មានប្រាក់សំរាប់ទិញបាយហូប និងគ្មានកន្លែងស្នាក់នៅ។ ក្នុងកាលៈទេសៈដ៏លំបាកនេះ លោកអនុសេនីយ៍ឯក សាល សណ្ដុះ នាយប៉ុស្ដិ៍នគរបាលរដ្ឋបាលទន្លេបាសាក់ ជួយជ្រោមជ្រែង ដោយផ្ដល់កន្លែងស្នាក់នៅ និងបានជួយឧបត្ថម្ភប្រាក់មួយចំនួន ដើម្បីផ្គត់ផ្គង់ជីវភាព និងបានជូនក្មេងប្រុសទាំងពីរនាក់នោះទៅចំណតរថយន្ដក្រុង ដើម្បីធ្វើដំណើរត្រឡប់ទៅស្រុកកំណើតវិញ។ ក្មេងប្រុសដែលយើងបានជួយសង្គ្រោះនោះមានឈ្មោះ៖ ទី១ ឈ្មោះ ឈឿន លីហួរ ភេទប្រុស អាយុ១៥ឆ្នាំ។ ទី២ ឈ្មោះ សៀង តូលេខ ភេទប្រុស អាយុ១៣ឆ្នាំ។ ការចេះជួយគ្នាទៅវិញទៅមកនេះ គឺជាអំពើល្អមួយរបស់មនុស្សគ្រប់រូប ក្នុងគ្រាមានអាសន្ន ហើយការចេះស្រលាញ់គ្នា ចេះជួយគ្នា និងអាធ្យាស្រ័យឲ្យគ្នា គឺជាគំរូល្អសម្រាប់អ្នកជំនាន់ក្រោយៗ»៕ ដោយ៖ លឹម ហុង