អង្គការសុខភាពពិភពលោក (WHO) ប្រកាសថាមានការឆ្លងវីរុសកូរ៉ូណាប្រចាំថ្ងៃកើនឡើងខ្លាំងកាលពីថ្ងៃអាទិត្យម្សិលមិញនេះ ដោយមានការឆ្លងសរុបចំនួន ២៣០.៣៧០ករណី ត្រឹមរយៈពេល ២៤ម៉ោងចុងក្រោយ ទូទាំងពិភពលោក។
ការឆ្លងដ៏ខ្លាំងបំផុតកើតឡើងនៅអាមេរិច ប្រេស៊ីល ឥណ្ឌា និងអាហ្វ្រិចខាងត្បូង។ កំណត់ត្រាឆ្លងខ្លាំងពីមុនរបស់ WHO គឺនៅថ្ងៃទី ១០ ខែកក្កដា ដែលមានអ្នកឆ្លងសរុបចំនួន ២២៨.១០២នាក់។
ចំណែកអ្នកស្លាប់ ស្ថិតនៅថេរ គឺប្រហែល ៥.០០០នាក់ក្នុងមួយថ្ងៃ។
ការឆ្លងវីរុសសរុបទូទាំងពិភពលោកកើនឡើងជិតដល់ ១៣លានករណីហើយ គិតត្រឹមថ្ងៃអាទិត្យម្សិលមិញនេះ ខណៈដែលការផ្ទុះវីរុសក្នុងរយៈពេល ៧ខែមកនេះ បានឆក់យកជីវិតមនុស្សជាង ៥៦៥.០០០នាក់។ នេះបើតាមតួលេខរបស់ទីភ្នាក់ងារសារព័ត៌មាន Reuters។
សហរដ្ឋអាមេរិចមានអ្នកឆ្លងថ្មីចំនួន ៥៩.៧៤៧នាក់ ក្នុងរយៈពេល ២៤ម៉ោងចុងក្រោយកាលពីថ្ងៃអាទិត្យ។ ករណីឆ្លងសរុបមានជាង ៣,៣លាននាក់ ខណៈដែលអ្នកស្លាប់មានជាង ១៣៥.០០០នាក់។
នៅក្នុងប្រទេសប្រេស៊ីល មានករណីឆ្លងសរុបចំនួន ១.៨៦៤.៦៨១ គិតត្រឹមថ្ងៃអាទិត្យ ចំណែកអ្នកស្លាប់សរុបមាន ៧២.១០០នាក់។
សូមបញ្ជាក់ថា វីរុសកូរ៉ូណាបានផ្ទុះឡើងដំបូងចេញពីទីក្រុងវូហាន ប្រទេសចិន កាលពីចុងឆ្នាំ ២០១៩ និងបានផ្ទុះរាលដាលយ៉ាងលឿនទៅជុំវិញពិភពលោក។
កាលពីពេលថ្មីៗនេះ អង្គការសុខភាពពិភពលោកបានបញ្ជូនក្រុមអ្នកជំនាញទៅកាន់ប្រទេសចិន ដើម្បីធ្វើការស៊ើបអង្កេតពីប្រភពរបស់វីរុសដ៏កាចសាហាវនេះ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNA
