ភ្នំពេញ៖ អ្នកប្រដាល់កំពូលកែង កីឡាករ វង្ស ណយ បានធ្វើឲ្យអ្នកគាំទ្រមានការភ្ញាក់ផ្អើលជាខ្លាំង ខណៈកាលពីថ្ងៃទី១២ ខែកក្កដា ឆ្នាំ២០២០ លោកបានប្រកាសលាឈប់ពីវិស័យប្រដាល់នេះ ដោយលើកហេតុផលឡើងថា វាយយូរណាស់ហើយ ល្បីតែឈ្មោះ គ្មានសល់អ្វីជាដុំកំភួនសោះ។
ជាក់ស្តែង ម្ចាស់អាជីវកម្មងៀតក្របី និងជាអតីតកីឡាករប្រដាល់ មានដើមកំណើតមកពីខេត្តប៉ៃលិនរូបនេះ បានបង្ហោះសារលើកឡើងនៅលើគណនីហ្វេសប៊ុករបស់ខ្លួនយ៉ាងដូច្នេះថា៖ «(ខ្ញុំលាឈប់ពីប្រដាល់ហើយបងប្អូន) ខ្ញុំវៃយូរណាស់ហើយ ល្បីតែឈ្មោះ គ្មានសល់អីទេ ពេលនេះខ្ញុំអស់កម្លាំងវ៉ៃទៀតហើយ ទើបខ្ញុំសម្រេចចិត្តឈប់វៃនៅពេលនេះ ព្រោះខ្លាចពិការ ខានបានរកស៊ីចិញ្ចឹមកូន ។ បើខ្ញុំពិការទៅគ្មានអ្នកណាចិញ្ចឹមកូនខ្ញុំទេ (ជួយគាំទ្រងៀតក្របីខ្ញុំផងបងប្អូន)»។
ក្រោយឃើញ វង្ស ណយ បង្ហោះសារបែបនេះ ឃើញថាមានមតិជាច្រើនបានគាំទ្រការសម្រេចចិត្តមួយនេះ ដោយក្នុងនោះមានអ្នកខ្លះបានលើកឡើងថា «កីទ្បាល្អប្រចាំប្រទេសដែរ តែគ្មានអ្នកឧបត្ថម្ភ ឈប់ក៏ល្អដែរ ទុកពេលប្រកបរបរចិញ្ចឹមគ្រួសារវិញទៅល្អជាង»។ តែទោះយ៉ាងណា ក៏មតិមួយចំនួនតូចបានបង្ហាញការមិនគាំទ្រ ដោយបានលើកថា៖ «ហេតុអ្វីទើបidolនិយាយបែបនេះ? តើរាល់ការប្រគួតរបស់បងទទួលបានតម្លៃប៉ុន្មាន? ហើយតើបងយកលុយទាំងនោះទៅណា?»។ រីឯអ្នកខ្លះទៀត បានលើកយកហេតុផលទាំងនេះមកប្រៀបធៀបថា «វៃយូរដែលហើយថាគ្មានសល់អី រឿង សោភ័ណ្ឌ ឃីម ឌីមា គេអាចទិញឡានបានជិះ ចុះលោកវៃដូចគេដែរ ហេតុអ្វីមិនសល់ចាញ់ទាំងក្មេងទៀត ឈុត សេរីវាន់ថង គេនៅក្មេងគេអាចសល់ដីចុះលោក?» ៕ ដោយ៖ លឹម ហុង