បន្ទាយមានជ័យ ៖ មន្ត្រីគយនិងរដ្ឋាការបានទទូចសុំជាថ្មីអោយសមត្ថកិច្ចស៊ីវិលនិងកងកម្លាំងតាមព្រំដែនកម្ពុជា ថៃ ជួយសហការនឹងមន្ត្រីជំនាញគយដើម្បីទប់ស្កាត់ បង្ក្រាបការនាំរថយន្តនិងម៉ូតូចូលរត់ពន្ធនិងខុសច្បាប់ ហើយភាគច្រើនគេយកមកបាញ់ពណ៌និងពាក់ស្លាកលេខទាហានឬនគរបាល។
ពោលបើមន្ត្រីខ្លួន និងសមត្ថកិច្ចស៊ីវិល កងកម្លាំងមិនឃុបឃឹតនឹងឈ្មួញទុច្ចរឹតទេ តាមព្រំដែនគ្មានរថយន្ត និងម៉ូតូរត់ពន្ធ ក៏ដូចទំនិញដទៃទៀតរត់ពន្ធដែរ ។
លោកឆែ សុធា ប្រធានសាខាគយនិងរដ្ឋាករខេត្តបន្ទាយមានជ័យ ជំនួសមុខលោកបណ្ឌិតគុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានគយនិងរដ្ឋាករកម្ពុជាបានស្នើសុំដូច្នេះកាលថ្ងៃទី២៩ ខែមករា ឆ្នាំ២០១៨នៅក្នុងពិធីប្រកាសផ្ទេរភារកិច្ច និងតែងតាំងមុខតំណែង ប្រធានការិយាល័យគយនិងរដ្ឋាករច្រកទ្វារព្រំដែនតំបន់បឹងត្រកួនស្រុកថ្មពួក ខេត្តបន្ទាយមានជ័យថ្មី ដោយលោកញឹក ប៊ុនលេខ ជាប្រធានថ្មី ជំនួសលោកជា ប៊ុនថន ប្រធានចាស់ដែលចូលនិវត្តន៍ ។
លោក ជា ប៊ុនថន ប្រធានចាស់ដែលចេញពីតំណែងនិយាយថា: ក្នុងរយ:ពេលកាន់តំណែង១០ឆ្នាំ១ខែនិង២២ថ្ងៃមកនេះ លោកនិងសហការី មានភារកិច្ចចម្បងគឺការប្រមូលពន្ធគយជូនរដ្ឋ ជួយសម្រួលលក្ខណ:ពាណិជ្ជកម្មឆ្លងកាត់ព្រដែននិងបង្ការនិងបង្ក្រាបអំពើរត់ពន្ធផ្សេងៗ ។
ហើយក្នុង១០ឆ្នាំមកនេះ គយច្រកនេះរកចំណូលពន្ធគយបាន៤៨.១០៩.៧៥៤.៨០៧រៀល។ ដោយឡែកក្នុងឆ្នាំ២០១៧ រកចំណូលពន្ធបាន ៩.៥៨៦.៨៣៣.០០០រៀល ឬ១ខែប្រមូលបាន ៧៩៨.៩០២.៧៥០រៀល។បានធ្វើប្លង់រឹងដីទីស្នាក់ការគយច្រក ពង្រីកស្រះនិងជីកអោយជ្រៅ , បានសាងសង់អគារស្នាក់នៅ១ខ្នង,បង្កលក្ខណ:ងាយស្រួលនាំកសិផលចេញនិងបង្ក្រាបអំពើរត់ពន្ធជាបន្តបន្ទាប់។
លោក ញឹក ប៊ុនលេខ បានឡើងកាន់តំណែងថ្មី បានប្តេជ្ញាចិត្តថា នឹងខិតខំដឹកនាំនិងសហការបំពេញភារកិច្ចថ្មីប្រកបដោយការទទួលខុសត្រូវនិងមានលទ្ធផលដែលមានប្រសិទ្ធភាពខ្ពស។ក្នុងនោះ ភារកិច្ចស្នូលគឺការទប់ស្កាត់បង្ក្រាបអំពើរត់ពន្ធគយ ហើយប្រមូលពន្ធអោយបានតាមផែនការ។
លោកង៉ោ ម៉េងជ្រួន អភិបាលរងខេត្តបានថ្លែងថា ដើម្បីឆ្លើយតប ទៅនឹងភារកិច្ចនិងកិច្ចការដែលថ្នាក់លើប្រគល់ជូនសូមលោកប្រធានថ្មីខិតខំ ពង្រឹងនិងការកែលម្អជាប្រចាំនូវដំណើរការគ្រប់គ្រងធនធានមនុស្ស គឺជាកត្តាសំខាង ចំបាច់ដែលអគ្គនាយកដ្ឋានគយនិងរដ្ឋាករកម្ពុជា និងគ្រប់អង្គភាពពាក់ព័ន្ធទាំងអស់ត្រូវយកចិត្តទុកដាក់អនុវត្តឲ្យបាន និងមានប្រសិទ្ធភាពខ្ពស់ ។ ក៏ចូលរួមសហប្រតិបត្តិការជាមួយភាគីថៃ រួមគ្នាអនុវត្តន៍តាមបន្ទាត់ព្រំដែនដើម្បីតភ្ជាប់។ ហូរទំនិញនិងសេវា ពាណិជ្ជកម្មជាមួយគ្នាឆ្លងកាត់ព្រំដែន។
លោកឆែ សុធា ប្រធានសាខាគយនិងរដ្ឋាករខេត្តបន្ទាយមានជ័យបាននិយាយបន្ថែមថា ៖ ប្រធានថ្មីនិងមន្ត្រីត្រូវតែសកម្ម ត្រូវចូលរួមអនុវត្តអោយបានខ្ជាប់ខ្ជូននូវភារកិច្ចសំខាន់ៗទាំង៣ របស់គយ៖ ១-ប្រមូលចំណូលពន្ធ អាករ និងកម្រៃផ្សេងៗ ជូនរដ្ឋឲ្យបានគ្រប់ផែនការ ២-បង្ការ និងបង្ក្រាបអំពើពន្ធ ឲ្យបានទទួលលទ្ធផលខ្ពស់ ៣-សម្រួលពាណិកម្មអន្តរជាតិអោយបានសមស្រប ៕ ដោយ ៖ បន្ទាយ
