ក្រចេះ៖ អភិបាលខេត្តក្រចេះ បានព្រមានចាត់វិធានការច្បាប់ឱ្យបានម៉ឺងម៉ាត់ ចំពោះបុគ្គលជាមន្ត្រីមានសមត្ថកិច្ច ដែលបញ្ជាក់ ឬហត្ថលេខាលើលិខិតស្នាម ឬឯកសារមិនស្របច្បាប់នានា ពាក់ព័ន្ធនឹងដីធ្លី ។
នៅថ្ងៃចន្ទ ទី១៣ ខែកក្កដា ឆ្នាំ២០២០ ឯកឧត្តម វ៉ា ថន អភិបាលខេត្ត ដឹកនាំកិច្ចប្រជុំ ស្តីពីការជំរុញការទប់ស្កាត់ការកាប់ទន្ទ្រានយកដីខុសច្បាប់ នៅក្នុងតំបន់ការពារធម្មជាតិខេត្តក្រចេះ។
ឯកឧត្តម វ៉ា ថន អភិបាលខេត្ត បានមានប្រសាសន៍បញ្ជាក់ថា ៖ តាមអនុសាសន៍ណែនាំដ៏ខ្ពង់ខ្ពស់របស់សម្តេចតេជោ ប្រមុខដឹកនាំរដ្ឋាភិបាលតម្រូវឱ្យរដ្ឋមន្ត្រីក្រសួងបរិស្ថាន ក្រសួងកសិកម្មរុក្ខាប្រមាញ់ និងនេសាទ ក្រសួងរៀបចំដែនដីនគរូបនីយកម្ម និងសំណង់ និងរដ្ឋបាលថ្នាក់ក្រោមជាតិ ត្រូវកាត់ឆ្វៀលដីនិងផ្ដល់កម្មសិទ្ធិដី ជូនប្រជាពលរដ្ឋដែលបានកាន់កាប់ និងអាស្រ័យផលជាក់ស្ដែងយូរឆ្នាំមកហើយ នៅលើទីតាំងដីដែលស្ថិតនៅក្នុងផែនទីតំបន់ការពារធម្មជាតិ និងគម្របព្រៃឈើនៅតាមបណ្ដាខេត្ត និងត្រូវបន្ថែមការត្រៀមបម្រុងដី ១០% សម្រាប់ការប្រើប្រាស់រួមរបស់សហគមន៍ ដើម្បីទប់ស្កាត់ដាច់ខាតកុំឲ្យមានការរុករានទន្ទ្រានដី ដោយខុសច្បាប់បន្តទៀត ដើម្បីបង្ការកុំឲ្យក្លាយជាសង្គ្រាមដីធ្លី។
ឯកឧត្តមអភិបាលខេត្ត បានធ្វើការជំរុញដល់អាជ្ញាធរពាក់ព័ន្ធ -ត្រូវយកចិត្តទុកដាក់ ក្នុងការគ្រប់គ្រងនូវទិន្នន័យ និងស្ថិតិប្រជាពលរដ្ឋ និងដីធ្លីដែលប្រជាពលរដ្ឋកំពុងកាន់កាប់ និងអាស្រ័យផលជាក់ស្ដែងយូរឆ្នាំមកហើយ នៅលើទីតាំងដីដែលស្ថិតនៅក្នុងផែនទីតំបន់ការពារធនធានធម្មជាតិ និងគម្របព្រៃឈើនៅតាមបណ្តាលស្រុកនានា ដើម្បីចាត់ចែងការធ្វើការកាត់ឆ្វៀលដី និងផ្ដល់កម្មសិទ្ធិដីជូនពួកគាត់ ព្រមទាំងត្រៀមរៀបចំបម្រុងដី១០% សម្រាប់ការប្រើប្រាក់រួមរបស់សហគមន៍។ ត្រូវបង្កើនការតាមដាន និងគ្រប់គ្រងសភាពការណ៍វិវត្ត ពាក់ព័ន្ធនឹងការកាន់កាប់ដីធ្លី របស់ប្រជាពលរដ្ឋនៅតាមតំបន់ការពារធម្មជាតិ និងគម្របព្រៃដើម្បីបង្ការទប់ស្កាត់ កុំឱ្យមាននិន្នាការរៀនទន្ទ្រានកាន់កាប់ដីព្រៃ ឬដីរដ្ឋដោយខុសច្បាប់បន្ថែមទៀត។ រាល់ការរុករានទន្ទ្រានកាន់កាប់ថ្មីនៅដីព្រៃ ឬដីរដ្ឋដោយខុសច្បាប់ ត្រូវហាមឃាត់ដាច់ខាត និងត្រូវប្រើប្រាស់វិធានការរដ្ឋបាល និងវិធានការច្បាប់ឲ្យតឹងរឹង និងម៉ឺងម៉ាត់ដើម្បីទប់ស្កាត់ ។ ត្រូវខិតខំអប់រំណែនាំ និងបកស្រាយបំភ្លឺ អំពីស្ថានភាពនៃការកាន់កាប់ដីធ្លី របស់ប្រជាពលរដ្ឋ និងឆន្ទៈរបស់រាជរដ្ឋាភិបាល ក្នុងការប្រឹងប្រែងដោះស្រាយដីធ្លីជូនប្រជាពលរដ្ឋ ដើម្បីឲ្យពួកគាត់ចូលរួមសហការជាមួយអាជ្ញាធរពាក់ព័ន្ធ ដោយមិនត្រូវជឿតាមការញុះញង់ អូសទាញរបស់មេខ្យល់ ឬជនខិលខូចមួយចំនួន ដែលឆ្លៀតឱកាសកេងយកផលប្រយោជន៍ ឬកេងចំណេញពីបញ្ហាដីធ្លីនេះ ករណីនេះត្រូវមានវិធានការទប់ស្កាត់ និងបង្ក្រាបមេខ្យល់និងជនខិលខូចទាំងនោះ ស្របតាមច្បាប់ជាធរមាន ។ ចំពោះទីតាំងដីធ្លីដែលមានទំនាស់ ត្រូវខិតខំសម្រុះសម្រួលដោះស្រាយដោយសន្តិវិធី តម្លាភាព សុច្ចរិតភាព និងយុត្តិធម៌ ដោយត្រូវចុះជួបផ្ទាល់ជាមួយប្រជាពលរដ្ឋ ដើម្បីស្រាវជ្រាវស្វែងយល់ឱ្យបានច្បាស់លាស់ ពីសាវតារដីទំនាស់ សាវតាប្រជាពលរដ្ឋ និងការទាមទារតវ៉ារបស់ប្រជាពលរដ្ឋ ដើម្បីធ្វើជាមូលដ្ឋានបង្អែកសម្រាប់ទាញហេតុផល ក្នុងការសម្រុះសម្រួល និងដោះស្រាយទំនាស់ដីធ្លីជូនប្រជាពលរដ្ឋ ។ ត្រូវណែនាំដល់រដ្ឋបាលក្រុង-ស្រុក ឃុំ-សង្កាត់ ឲ្យធ្វើការបញ្ជាក់ ឬចុះហត្ថលេខាលើលិខិតស្នាម ឬឯកសារនានាពាក់ព័ន្ធដីធ្លី ឲ្យបានត្រឹមត្រូវ តាមច្បាប់បែបបទនីតិវិធី និងគោលការណ៍ណែនាំជាធរមាន។
អភិបាលខេត្ត បានថ្លែងបន្តថា ទន្ទឹមនេះ ត្រូវចាត់វិធានការច្បាប់ឱ្យបានម៉ឺងម៉ាត់ ចំពោះបុគ្គលជាមន្ត្រីមានសមត្ថកិច្ច ដែលបញ្ជាក់ឬហត្ថលេខាលើលិខិតស្នាម ឬឯកសារមិនស្របច្បាប់នានាពាក់ព័ន្ធនឹងដីធ្លី ក្នុងការចាត់ចែងអនុវត្តការងារខាងលើនេះ រដ្ឋបាលក្រុង-ស្រុកត្រូវរាយការណ៍ និងស្នើសុំយោបល់ពីមន្ទីររៀបចំដែនដីនគរូបនីយកម្ម និងសំណង់ មន្ទីរបរិស្ថាន និងមន្ទីរកសិកម្មរុក្ខាប្រមាញ់ និងនេសាទ ស្របតាមសមត្ថកិច្ចទទួលខុសត្រូវរបស់មន្ទីរពាក់ព័ន្ធនីមួយៗ។ ក្នុងន័យនេះអាជ្ញាធរខេត្តក្រុង-ស្រុក-ឃុំ-សង្កាត់ ត្រូវខិតខំអប់រំប្រជាពលរដ្ឋឲ្យចូលរួមថែរក្សាការពារបរិស្ថានធនធានធម្មជាតិ ការពារដីធ្លីសាធារណៈ ដីសហគមន៍ និងចូលរួមអនុវត្តច្បាប់ដើម្បីរួមគ្នាបង្ការទប់ស្កាត់ការចូលទន្ទ្រានកាន់កាប់ដីព្រៃ ការរានព្រៃដើម្បីកាន់កាប់ដី ការចូលទន្ទ្រានកាន់កាប់ដីសាធារណៈ ដីសហគមន៍ និងដីឯកជនតាមគ្រប់រូបភាពក្នុងខេត្តក្រចេះ៕
ដោយ៖កូឡាប
