ស្ត្រីម្នាក់បានដួលសន្លប់ភ្លាមៗ បន្ទាប់ពីយកកងដៃមានតម្លៃប្រមាណ ៤៤.០០០ ដុល្លារ មកសាកពាក់មើល តែចៃដន្យ បានរបូតដៃធ្លាក់ជ្រុះបណ្តាលឲ្យបាក់២កំណាត់ នៅហាងលក់គ្រឿងអលង្ការមួយកន្លែង ស្ថិតនៅភាគខាងកើតនៃទីក្រុង Ruili ខេត្តយូនណាន ប្រទេសចិន។
យោងតាមសារព័ត៌មាន CGTN ស្ត្រីអ្នកទេសចរម្នាក់ បានចូលទៅក្នុងហាងលក់គ្រឿងអលង្ការត្បូងថ្ម ហើយបានលើកយកកងដៃ ដើម្បីសាកពាក់។ ប៉ុន្តែ ចៃដន្យ នាងបានធ្វើឲ្យជ្រុះទៅនឹងដី ហើយវាក៏បានបាក់ជា២កំណាត់។ ដោយដឹងពីកំហុសដ៏ធ្ងន់ធ្ងរនេះ ស្ត្រីរូបនោះក៏បានដួលសន្លប់ទៅនឹងដីតែម្តង។
កូនប្រុសរបស់ម្ចាស់ហាងឈ្មោះ Lin Wei បានប្រាប់ប្រព័ន្ធផ្សព្វផ្សាយក្នុងស្រុកថា «គាត់បានដួល ប៉ុន្តែសំណាងល្អ គាត់មិនមានបញ្ហាធ្ងន់ធ្ងរទេ» ។
ទោះយ៉ាងណា អ្នកលក់នៅតែចង់បានសំណងពីការរបស់ដែលបានបាក់បែកនេះ នៅពេលដែលស្ត្រីនោះបានដឹងខ្លួន។ ប៉ុន្តែ ដំណឹងល្អ គាត់ពុំចាំបាច់បង់សម្រាប់តម្លៃទាំងស្រុងនោះទេ គឺគាត់ស្នើឲ្យបង់ត្រឹមតែ ២៦.៥០០ ដុល្លារ ប៉ុណ្ណោះ។ បន្ទាប់មក ភាគីទាំងពីរបានចរចារកដំណោះស្រាយសំណង។
ទាក់ទឹងហេតុការណ៍ខាងលើនេះផងដែរ អ្នកខ្លះបានស្តីបន្ទោសទៅលើស្ត្រីនោះថា មិនចេះប្រយ័ត្ន ដែលនាំឲ្យមានទុក្ខដាក់ខ្លួនបែបនេះ។ តែអ្នកដទៃទៀត បានចោទប្រកាន់អ្នកលក់ថាលក់គ្រឿងអលង្ការដ៏មានតម្លៃបែបនេះថា គួរណាស់មានវិធានការឲ្យមានប្រុងប្រយ័ត្នជាមុន ដើម្បីជៀសវាងកើតមានហេតុការណ៍នេះឡើង៕ ដោយ៖ លឹម ហុង
