រាជធានីភ្នំពេញ៖ ឯកឧត្តម ទិន ពន្លក បានថ្លែងថា វិស័យថាមពលដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចជាតិកម្ពុជា។ ប្រភពនៃការផលិតអគ្គិសនី នៅ កម្ពុជា រួមមាន វារីអគ្គិសនី ប្រេងឥន្ទនៈផូស៊ីល (ម៉ាស៊ូត ប្រេងខ្មៅ ធ្យូងថ្ម) ពន្លឺព្រះអាទិត្យ និងជីវម៉ាស់។
ឯកឧត្តម ទិន ពន្លក រដ្ឋលេខាធិការក្រសួងបរិស្ថាន ថ្លែងបែបនេះ នៅ ថ្ងៃទី១៣ ខែកក្កដា ឆ្នាំ២០២០ ក្នុងសិក្ខាសាលាពិគ្រោះយោបល់ស្តីពីការរៀបចប្រព័ន្ធវាស់វែង រាយការណ៍ និង ការផ្ទៀងផ្ទាត់ សម្រាប់ គោលនយោបាយ ថាមពលកកើតឡើងវិញ ។
សិក្ខាសាលានេះមានគោលបំណងដើម្បីពិនិត្យ ផ្ទៀងផ្ទាត់ និងប្រមូលនូវធាតុចូលបន្ថែមដើម្បីរៀបចំប្រព័ន្ធវាស់វែង រាយការណ៍ និង ការផ្ទៀងផ្ទាត់ សម្រាប់ គោលនយោបាយ ថាមពល កកើតឡើងវិញនៅក្នុងប្រទេសកម្ពុជា។ ឯកឧត្តម ទិន ពន្លក បានគូស បញ្ជាក់ថា៖ វិស័យថាមពលដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចជាតិកម្ពុជា។ ប្រភពនៃការផលិតអគ្គិសនី នៅ កម្ពុជា រួមមាន វារីអគ្គិសនី ប្រេងឥន្ទនៈផូស៊ីល (ម៉ាស៊ូត ប្រេងខ្មៅ ធ្យូងថ្ម) ពន្លឺព្រះអាទិត្យ និងជីវម៉ាស់។
ក្នុងដំណាក់ កាលចុងក្រោយនេះ ថាមពលវារីអគ្គិសនី និងធ្យូងថ្ម មានទំហំផ្គត់ផ្គង់ថាមពលអគ្គិសនីច្រើនជាងគេ ជាមួយ គ្នានេះផងដែរ ក៏មានវិស័យឯកជន មួយ ចំនួន កំពុង សិក្សា អំពី សក្តានុពល ថាមពល ខ្យល់ នៅតំបន់មានសក្កានុពល មួយចំនួន នៅកម្ពុជា ដូចជា នៅភ្នំបូកគោ ជាដើម។ គោលនយោបាយ និងយុទ្ធសាស្ត្រ ស្តីពីការប្រើប្រាស់ ថាមពល កកើតឡើងវិញក៏ត្រូវបានយកចិត្ត ទុកដាក់យ៉ាងខ្លាំង ដើម្បីបំពេញតម្រូវការថាមពល និងមិនបំពុលបរិស្ថានផងដែរ។
ទោះជាយ៉ាងណា ការផលិត អគ្គិសនីពីប្រភពឥន្ទនៈផូស៊ីល នឹងបញ្ចេញឧស្ម័នផ្ទះកញ្ចក់ខ្ពស់ ដែល ជាបុព្វហេតុ នៃ ការប្រែប្រួល អាកាសធាតុ។ ការប្រែប្រួល អាកាសធាតុនេះ គឺជាបញ្ហាអន្តរវិស័យ និងមានការគំរាមកំហែងដល់សេដ្ឋកិច្ច និង ជីវភាព រស់ នៅ របស់ មនុស្សជាតិ នាពេល បច្ចុប្បន្ន ហើយពិភពលោកបានសម្ដែងក្ដីព្រួយបារម្ភអំពីបញ្ហាសកលនេះ។
ឯកឧត្តម ក៏បានបញ្ជាក់ថា៖ រាជរដ្ឋាភិបាលកម្ពុជា ក្នុងនាម ជា ភាគីហត្ថលេខីនៃអនុសញ្ញាស្ដីពីការប្រែប្រួលអាកាសធាតុ និង ពិធីសារក្យូតូ បានខិតខំយ៉ាងខ្លាំង ក្នុងការអនុវត្ដ អនុសញ្ញា នេះ តាមរយៈការអនុវត្តយន្ដការ អភិវឌ្ឍន៍ ស្អាត (នាំមុខគេក្នុង បណ្តាប្រទេស អភិវឌ្ឍន៍តិចតួច) យន្តការ ឥណទានកាបូនរួមគ្នា និង ការប្រើប្រាស់ ថាមពលកកើតឡើងវិញជាដើម ហើយ ព្រះរាជាណាចក្រកម្ពុជា ក៏ បានផ្តល់ សច្ចាប័ន លើ កិច្ច ព្រមព្រៀង ទីក្រុងបារីស ស្តីពីការប្រែប្រួលអាកាសធាតុនៅខែកក្កដា ឆ្នាំ២០១៦ ដែលមានកាតព្វកិច្ចរៀបចំនិងអនុវត្ត “ការចូលរួម ចំណែក របស់ជាតិដើម្បី ដោះស្រាយ ការប្រែប្រួលអាកាសធាតុ (Nationally Determined Contribution: NDC)” ព្រមទាំងពង្រឹង តម្លាភាព ក្នុងការដោះស្រាយ ការប្រែប្រួលអាកាសធាតុ៕ ដោយ៖កូឡាប
