ភ្នំពេញ៖ ជាការពិតណាស់ ការផ្តល់ក្តីស្រឡាញ់ បង្ហាញភាពស្និទ្ធស្នាល យល់ចិត្ត ការលះបង់ ការយកចិត្ដទុកដាក់ថ្នាក់ថ្នមមើលថែ និងភាពស្មោះត្រង់ ចំណាយពេលវេលាបានច្រើនចំពោះគ្នាទៅវិញទៅមក នោះគឺជាអ្វីៗដែលមនុស្សស្រីគ្រប់រូបប្រាថ្នាចង់បានជាខ្លាំង។ ប៉ុន្តែ ទោះយ៉ាងណា ពុំមែនស្ត្រីទាំងអស់ គឺសុទ្ធតែគិតទៅលើចំណុចអវិជ្ជមានរបស់ប្តីនោះទេ ព្រោះថា ការតែងគិតឃើញទៅលើផ្លូវអាក្រក់ ឬ ការញុះញង់ពីអ្នកជិតខាង ក៏អាចធ្វើឲ្យជីវិតប្តីប្រពន្ធប្រេះឆាបាន។ ហេតុនេះ គួរណាស់កុំធ្វើជាមនុស្សមានចិត្តឆេវឆាវពូកែរករឿងខ្លាំងពេក និងត្រូវបើកចិត្តឲ្យទូលាយខ្លះទៅ ទើបអាចបន្តរក្សាសុភមង្គលគ្រួសារបានយូរអង្វែងរហូតចាស់កោងខ្នងរៀងៗខ្លួន។
ទាក់ទងនឹងការលើកឡើងខាងលើនេះផងដែរ កាលពីពេលថ្មីៗនេះ (ថ្ងៃទី១២ ខែកក្កដា ឆ្នាំ២០២០) បងស្រីម្នាក់ដែលមានគណនីហ្វេសប៊ុកឈ្មោះ Lay Sreymom បានបង្ហោះរូបថតប៉ុន្មានសន្លឹក អមជាមួយសំណេរដ៏មានអត្ថន័យជ្រាលជ្រៅ និងបង្កប់ទៅដោយន័យចាក់ដោត ដែលបានធ្វើឲ្យមហាជនចាប់អារម្មណ៍ និងចែករំលែកយ៉ាងច្រើនផងដែរ។
ក្នុងនោះ បងស្រីខាងលើបានសរសេរយ៉ាងដូច្នេះថា៖ «មានអ្នកខ្លះគាត់សួរខ្ញុំថាថ្ងៃអាទិត្យហ្នឹង ប្ដីខ្ញុំទៅធ្វើការដែរ? ខ្ញុំក៏ញញឹមហើយតប ចា៎ប្ដីខ្ញុំគាត់ធ្វើការគ្មានសៅរ៍ អាទិត្យទេ គេសួរថា ជឿប្ដីដែរអី ថាថ្ងៃសៅរ៍ អាទិត្យ ធ្វើការដែរ? ខ្ញុំថាជឿតើ គេសួរថា ម៉េចស្រឡាញ់ប្ដីម្លេះ អត់ចេះមាត់ក ឡូឡាអីសោះ ខ្ញុំថាបើសំពត់វារហែកហើយ ម៉េចមិនរកអីដេរវា ចាំបាច់អីដែលត្រូវហែកវាថែម បើយើងស្រឡាញ់វា ចប់» ៕ ដោយ៖ លឹម ហុង
