ខេត្តព្រៃវែង៖ សម្តេចតេជោ ហ៊ុន សែន នាយករដ្ឋមន្ត្រី នៅព្រឹកថ្ងៃទី១៤ ខែកក្កដានេះ បានលើកទឹកចិត្ត និងជំរុញឲ្យប្រជាកសិករ បង្កើនការចិញ្ចឹមសត្វយកសាច់ ក្នុងនោះមានសត្វជ្រូក និងត្រីជាដើម ដើម្បីផ្គត់ផ្គង់ទីផ្សារក្នុងស្រុក ហើយបើនៅសល់នោះ ត្រូវចូលរួមក្នុងការនាំចេញទៅទីផ្សារក្រៅប្រទេសផងដែរ។
សម្តេចតេជោ ហ៊ុន សែន បានបញ្ជាក់ថា “យើងត្រូវបង្កើនការចិញ្ចឹមសត្វយកសាច់ក្នុងស្រុក ដើម្បីបញ្ឈប់ការចូលពីបរទេស ខណ:បច្ចុប្បន្ន កម្ពុជាខ្វះសាច់បរិភោគប្រមាណ១៨ភាគរយ ដែលត្រូវនាំចូលពីបរទេស ជាពិសេសប្រទេសជិតខាង”។
សម្តេចតេជោ បានលើកឡើងដូចនេះ នៅក្នុងឱកាសអញ្ជើញសំណេះសំណាល ជាមួយប្រជាកសិករ វារីវប្បកម្ម នៅមជ្ឈមណ្ឌលស្រាវជ្រាវ និងអភិវឌ្ឍន៍ពូជត្រីបាទី ដែលស្ថិតក្នុងស្រុកពាមរក៍ ខេត្តព្រៃវែង។
ជាមួយគ្នានេះ ប្រជាកសិករ បានថ្លែងអំណរគុណ លើការយកចិត្តទុកដាក់ របស់សម្តេចតេជោ លើវិស័យកសិកម្ម និងការចិញ្ចឹមសត្វនេះ ហើយបានប្តេជ្ញានឹងបង្កើនការចិញ្ចឹមសត្វបន្ថែមទៀត តាមការអំពាវនាវរបស់សម្តេចតេជោ ដែលក្នុងនោះ កសិករក៏កំពុងចិញ្ចឹមសត្វយកសាច់លក់ ដូចជា សត្វមាន់ទា និងជ្រូកផងដែរ។
សូមជម្រាបថា ក្នុងឆ្នាំ២០១៩កន្លងទៅ ផលលិតកម្មសត្វកម្ពុជា សម្រេចបានចំនួន៤៥,៨៥លានក្បាល គឺកើនលើសពីឆ្នាំមុន ៣,៣ភាគរយ ដែលធ្វើឲ្យកម្ពុជាមានសមត្ថភាពផលិតសាច់ សម្រាប់បម្រើតម្រូវការក្នុងស្រុក បានប្រមាណ ២៣៩ពាន់តោន ស្មើនឹង៨២ភាគរយ នៃតម្រូវការសរុបប្រមាណ២៩០ពាន់តោន ក្នុងមួយឆ្នាំ។
ដោយឡែកការចិញ្ចឹមសត្វលក្ខណៈពាណិជ្ជកម្ម មានការកើនឡើង៣៧ភាគរយ បើធៀបទៅនឹងឆ្នាំមុន គឺដោយសារអ្នកចិញ្ចឹមមានការផ្លាស់ប្ដូរឥរិយាបថ ពីការចិញ្ចឹមតាមបែបធម្មជាតិ មកចិញ្ចឹមតាមបែបពាណិជ្ជកម្ម ដែលធ្វើឲ្យមានកំណើនប្រាក់ចំណូលខ្ពស់៕
ដោយ៖CEN
