កំពង់ស្ពឺ ៖ ស្នងការនគរបាលខេត្តកំពង់ស្ពឺ នៅថ្ងៃអង្គារនេះ បានថ្លែងថា ជំនាញប្រឆាំងបទល្មើសសេដ្ឋកិច្ច និងប្រឆាំងភេរវកម្ម នៃស្នងការនគរបាលខេត្តកំពង់ស្ពឺ ប្រតិបត្ដិការបង្ក្រាបបទល្មើសព្រៃឈើនៅស្រុកឱរ៉ាល់ ពីរលើក របស់ឈ្មួញឈើដុះស្លែម្នាក់ឈ្មោះ ជឿង ថេង ដោយបានដកហូតវត្ថុតាង ឈើ ៣០ដើម និង ១៦១កំណាត់ រថយន្ត ៣គ្រឿង អេស្កាវ៉ាទ័រ និងសម្ភារផ្សេងៗមួយចំនួនទៀត។ លោកបន្តថា ” ឈើបម្រុងឡើងជិះកុងតឺន័រដើរលេង អត់ខ្លាច អត់រាងចាល “។
សូមបញ្ជាក់ថា កាលពីថៃ្ង10 កក្កដា 2020 កម្លាំង នគរបាលប្រឆាំងបទល្មើសសេដ្ឋកិច្ច សហការជាមួយកម្លាំងជំនាញពាក់ព័ន្ធ ដឹកនាំដោយ ឯកឧត្តម សុខ ភា អភិបាលរងខេត្ត និងបានការសម្របសម្រួលពីរលោក វ៉ិត មឃៈ ព្រះរាជអាជ្ញារង ក្នុងនាមជាតំណាងលោកស្រី ចាតសូ រស្មី ព្រះរាជអាជ្ញា នៃអយ្យការអមសាលាដំបូងខេត្តកំពង់ស្ពឺ បានចុះឆែកឆេរទីតាំងលាក់លួចទុកឈើខុសច្បាប់ ១កន្លែង “សន្និធិឈើខុសច្បាប់” នៅចំណុចដីចំការភូមិដំបងវេញ ឃុំសង្កែសាទប ស្រុកឱរ៉ាល់ ជារបស់ឈ្មួញឈើដុះស្លែម្នាក់ឈ្មោះ ជឿង ថេង ភេទប្រុស អាយុ42ឆ្នាំ នៅភូមិផ្សារកន្ទួត ឃុំសង្កែសាទប ស្រុកឱរ៉ាល់ ធ្លាប់ជាប់ពាក់ព័ន្ធក្នុងការដឹកជញ្ជូនអនុផលព្រៃឈើ បំផ្លាញស្ពាននៅខេត្ដកំពត និងធ្លាប់ជាប់ពន្ធនាគារកន្លងមក (បច្ចុប្បន្នគេចខ្លួន)។
លោកសម សាម៉ូន ស្នងការនគរបាលខេត្ត បានថ្លែងថា ជាលទ្ធផល រកឃើញឈើប្រភេទឈ្លិកចំនួន៣០ដើម បង្កប់ដាក់ក្នុងស្រះទឹក បច្ចុប្បន្នជំនាញបានកំពុងកសាងសំណុំរឿង ដើម្បីបន្តនីតិវិធី។
កិច្ចប្រតិបត្ដិការជំនាញបន្ដស៊ើបអង្កេតរហូតដល់ថ្ងៃ 13 កក្កដា 2020 នៅចំណុចក្រៅពីរដីចំការឈ្មោះ ជឿង ថេង នៅក្នុងដីចំការមួយកន្លែងទៀត ចំការស្វាយចន្ធី ចម្ងាយប្រមាណ ១គីឡូម៉ែត្រ ស្ថិតក្នុងភូមិភូមិដំបងវេញ ឃុំសង្កែសាទប ស្រុកឱរ៉ាល់ កម្លាំងសមត្ថកិច្ច ប្រឆាំងបទល្មើសសេដ្ឋកិច្ច កម្លាំងនគរបាលប្រឆាំងភេរវកម្ម និងឧក្រឹដ្ឋកម្មឆ្លងដែនខេត្ដកំពង់ស្ពឺ អធិការដ្ឋាននគរបាលស្រុកឱរ៉ាល់ បានបង្ក្រាបនៅទីតាំងជាក់ស្ដែង ។ ជាលទ្ធផល រកឃើញឈើជ្រុងប្រភេទឈ្លិកចំនួន ១៦១ កំណាត់ ឃាត់រថយន្ដដឹកកុងទែនឺរ ២០ ហ្វីត មួយគ្រឿង រថយន្តតូច ២ គ្រឿង អេស្កាវ៉ាទ័រមួយគ្រឿងសម្រាប់លើកបញ្ចូលឈើក្នុងទូរកុងតឺន័រ និងម៉ូតូមួយគ្រឿង។
បច្ចុប្បន្នវត្ថតាងទាំងអស់ បានប្រគល់ជូនខាងជំនាញបរិស្ថានដែនជម្រកសត្វព្រៃភ្នំព្រៃភ្នំឱរ៉ាល់ ចាត់ការនីតិវិធីបន្ដ ៕ដោយ៖កូឡាប
