ប្រិយមិត្ត ជាពិសេសអ្នកប្រើប្រាស់បណ្តាញសង្គមជាច្រើន ប្រាកដជាបានស្គាល់ច្បាស់ហើយ ចំពោះក្មេងប្រុស ហុង ដែលល្បីឈ្មោះព្រោះតែរូបគេអាចមានសមត្ថភាពបើកម៉ូតូរ៉ឺម៉ក (កង់បីខ្មែរ) ក្នុងទីក្រុងភ្នំពេញ និងសូម្បីជាប់ឈ្មោះជាចោរលួចម៉ូតូទៀតផង ទាំងអាយុទើបតែ ៧ ឆ្នាំ ប៉ុណ្ណោះ។
កាលពីប៉ុន្មានខែកន្លងទៅនេះ ក្មេងប្រុស ហុង បានធ្វើឲ្យគ្រប់គ្នាសម្តែងនូវក្តីអាណិតអាសូរជាខ្លាំង ខណៈប្រទះឃើញវីដេអូមួយ បង្ហាញមនុស្សធំបានប្រើអំពើហិង្សាទះកំផ្លៀង និងយកជើសឈូសកណ្តាលៗមុខទៅលើ ហុង យ៉ាងសាហាវ។ ប៉ុន្តែ ទោះយ៉ាងវីដេអូនោះ ត្រូវបានគេបញ្ជាក់ថា ជាវីដេអូចាស់កើតឡើងយូរឆ្នាំមកហើយ។
ក្រោយវីដេអូនេះបានបែកធ្លាយជាថ្មី ក្នុងនោះគណនីហ្វេសប៊ុកឈ្មោះ “ទីក្រុង ប៉ុស្តិ៍” បានចេញមកបញ្ជាក់កុំឲ្យបងប្អូនមានការយល់ច្រឡំទៅលើវីដេអូនេះទៀតថា ពេលនេះ (ប៉ុន្មានខែមុន) ចាន់ ហុង កំពុងមានភាពប្រសើរ នៃសតិ និងសើចសប្បាយ ជាមួយមិត្តក្នុងមណ្ឌល ហើយអង្គការក៏បានគិតគូរអនាគតវែងឆ្ងាយរបស់ក្មេងប្រុសនេះ ក៏សូមអំពាវនាវឲ្យមានការលុបចេញរាល់រូបភាព នៃវីដេអូទាំងឡាយ ដែលបង្កផលមិនល្អ ដល់អនាគតក្មេងក្នុងពេលខាងមុខ…។
ដោយឡែក ថ្មីៗនេះ បងប្អូនជាច្រើន ពិតជាមានការភ្ញាក់ផ្អើលនិងស្ទើរតែមិនជឿភ្នែក ខណៈឃើញប្រទះឃើញវត្តមានរបស់ ហុង លេចមុខជាថ្មីទៀត នៅតាមការ៉ាស់ផ្សេងៗទាំងក្នុង និងក្រៅទីក្រុងភ្នំពេញ ស្របពេលដែលទំព័រហ្វេសប៊ុកប្អូនប្រុសឈ្មោះ Thearit Cr S ដែលជាអ្នកមើលថែបានប្រកាសថា ហុង បានរត់ចេញពីមណ្ឌលហើយ។
ជាក់ស្តែង តាមរយៈគណនីហ្វេសប៊ុកលោកវេជ្ជបណ្ឌិត Dr. Metrey បានបង្ហោះវីដេអូ បង្ហាញសកម្មភាព ព្រោះតែក្តីអាណិតអាសូរ គាត់បានផ្តល់លុយចំនួន ៦ ម៉ឺនរៀល ដល់ក្មេងប្រុស ហុង នៅឯការ៉ាស់សាំងពេទ្យលោកសង្ឃ។
ជាមួយគ្នានេះផងដែរ មនុស្សមួយចំនួន ក៏លើកឡើងថា ក្មេងប្រុសរូបនេះមិនកែខ្លួន ចោលគំនិតដើរលួច ឬ សុំទានគេបែបនេះទេ ទើបបានជារូបគេរត់គេចចេញមណ្ឌលបែបនេះ៕ ដោយ៖ លឹម ហុង
