ខេត្តស្វាយរៀងៈ លោក ម៉ែន វិបុល អភិបាល នៃគណៈអភិបាលខេត្តស្វាយរៀង នាព្រឹកថ្ងៃទី១៤ ខែកក្កដា ឆ្នាំ២០២០នេះ បានសម្ពោធដាក់ឲ្យដំណើរការការិយាល័យច្រកចេញចូលតែមួយ និងការិយាល័យប្រជាពលរដ្ឋស្រុករមាសហែក ។
លោកអភិបាលខេត្ត បានសម្ដែងនូវការអរគុណ ចំពោះក្រុមប្រឹក្សាស្រុក គណៈអភិបាលស្រុក មន្ទីរអង្គភាពពាក់ព័ន្ធទាំងអស់ ដែលបានខិតខំចូលរួមចំណែកនៅក្នុងការជួយគាំទ្រ សហការ និងសម្របសម្រួល ជាពិសេសលើផ្នែកបច្ចេកទេស នាំឲ្យសម្រេចបាននូវសមិទ្ធផលដ៏ថ្មីស្រឡាង នៅថ្ងៃនេះ ដែលពិតជាបានបង្ហាញឲ្យឃើញពីការខិតខំយកចិត្តទុកដាក់ និងសុច្ឆន្ទៈដ៏មោះមុតគាំទ្រដល់ដំណើរការអនុវត្ត កម្មវិធីកំណែទម្រង់នានារបស់រាជរដ្ឋាភិបាល ជាពិសេសកំណែទម្រង់វិមជ្ឈការ និងវិសហមជ្ឈការ ក្នុងការបង្ខិតសេវាឲ្យកាន់តែកៀកប្រជាពលរដ្ឋនៅមូលដ្ឋាន ។
លោកអភិបាលខេត្ត ក៏បានបញ្ជាក់ថា ការបង្កើតឡើងនូវការិយាល័យច្រកចេញចូលតែមួយ និងការិយាល័យប្រជាពលរដ្ឋនេះ គឺមានទិសដៅដើម្បីលើកកម្ពស់ការផ្ដល់សេវាមួយចំនួន ដែលប្រជាពលរដ្ឋចាំបាច់ និងជាប្រចាំ ហើយដែលការផ្ដល់សេវាទាំងនោះអាចអនុវត្តដោយប្រសិទ្ធភាព ដោយរដ្ឋបាលស្រុក សំដៅធ្វើឲ្យប្រជាពលរដ្ឋទទួលបានសេវាកាន់តែងាយស្រួល ឆាប់រហ័ស និងមានតម្លាភាព ព្រោះថាការិយាល័យនេះ គឺជាទីតាំងប្រមូលផ្ដុំការផ្ដល់សេវារដ្ឋបាលនៅកន្លែងតែមួយ ដែលនឹងបង្កភាពងាយស្រួលបំផុតដល់ប្រជាពលរដ្ឋ ក្នុងការមកទទួលសេវានានា ដោយមិនចាំបាច់ត្រូវស្វែងរកសេវានៅច្រើនកន្លែង ដែលនាំឲ្យខាតបង់នូវពេលវេលា និងធនធាន ។
លោកអភិបាលខេត្ត បានផ្ដាំផ្ញើដល់មន្ត្រី និងបុគ្គលិកបម្រើការងារនៅការិយាល័យច្រកចេញចូលតែមួយ ត្រូវមានអាកប្បកិរិយាទន់ភ្លន់ សាមញ្ញ រួសរាយ រាក់ទាក់ ត្រូវប្រកាន់ភ្ជាប់នូវគោលការណ៍ក្រមសីលធម៌វិជ្ជាជីវៈ ស័ក្ដិសមជាអ្នកផ្ដល់សេវាជូនប្រជាពលរដ្ឋ ព្រមទាំងអនុវត្តតួនាទីភាកិច្ចរបស់ខ្លួនឲ្យបានត្រឹមត្រូវ ដើម្បីធានាឲ្យការផ្តល់សេវា ដំណើរការប្រកបដោយតម្លាភាព និងគណនេយ្យភាពស្របតាមគោលការណ៍ បែបបទ និងនីតិវិធីដែលបានកំណត់ ។
ទន្ទឹមនេះ លោកក៏បានអំពាវនាវដល់ប្រជាពលរដ្ឋទាំងអស់នៅក្នុងស្រុករមាសហែក ចាប់ពីពេលនេះតទៅសូមអញ្ជើញមកទទួលសេវា នៅការិយាល័យច្រកចេញចូលតែមួយស្រុក ដើម្បីរួមចំណែកក្នុងការកៀរគរការប្រមូលចំណូលចូលថវិកាជាតិ ក៏ដូចជាលុបបំបាត់ការយកកម្រៃសេវាលើសច្បាប់កំណត់ផងដែរ ៕
ដោយ៖វ៉ៃកូ
