ភ្នំពេញ÷រថយន្តប្រភេទធុនត្រាមួយគ្រឿងបើកបួងចង្កូតជ្រុលទៅបុកបង្គោលផ្ទះប្រជាពលរដ្ឋបណ្តាលឲ្យរងការខូចខាតបាក់កាឡេកង់ខាងមុខទាំងស្រុងធ្វើដំណើរទៅមុខលែងរួច។
ហេតុការណ៍នេះកើតឡើងនៅវេលាម៉ោង ២ និង៣០នាទីទៀបភ្លឺ ឈានចូលថ្ងៃពុធទី១៥ ខែកក្កដា ឆ្នាំ២០២០ នៅតាមបណ្តោយផ្លូវបេតុង ក្នុងសង្ការត់ទួលសង្កែទី១ ខណ្ឌឫស្សីកែវ រាជធានីភ្នំពេញ។
បើយោងតាមប្រភពព័ត៌មានពីកន្លែងកើតហេតុបានឲ្យដឹងថាមុនពេលកើតហេតុគេឃើញរថយន្តប្រភេទធុនត្រាមួយគ្រឿងពណ៌ខ្មៅដែលពាក់ផ្លាកលេខ ភ្នំពេញ 2M-4571 ធ្វើដំណើរក្នុងទិសដៅពីកើតមកលិចស្រាប់តែមកជិតចំណុចកើតហេតុក៏បានជ្រុលចង្កូតទៅបុកបង្គោលផ្ទះបណ្តាលឲ្យរងការខូចខាតបង្គោលបន្តិចបន្ទួច រីឯរថយន្តវិញរងការបាក់កាឡេកង់ខាងមុខ ទាំងស្រុង។ ក្នុងហេតុការណ៍ខាងលើមិនបង្ករបួសស្នាមទេ គឺរងខូចខាតតែរថយន្តធ្ងន់ធ្ងរ។
ក្រោយពេលកើតហេតុសមត្ថកិច្ចបានមកដល់រួចទៅសួរខាងម្ចាស់ផ្ទះ និងម្ចាស់រថយន្តបន្ថែម គឺម្ចាស់រថយន្តចេញថ្លៃចំណាយក្នុងការជួសជុលដើម្បីបញ្ចប់រឿង ហើយសមត្ថកិច្ចប្រគល់រថយន្តឲ្យទៅម្ចាស់វិញដើម្បីស្ទូចយកទៅជួសជុលដោយខ្លួនឯង៕ ដោយ៖សា មេត
