កាលពីពេលថ្មីៗនេះ អាជ្ញាធរថៃបានចាត់វិធានការក្តៅដ៏គួរឲ្យភ្ញាក់ផ្អើល ដោយរាយបន្លាលួសនៅតាមខ្សែបន្ទាត់ព្រំដែនរបស់ខ្លួន ដើម្បីប្រឆាំងទប់ស្កាត់ការរត់ពន្ធជនចំណាកស្រុកបរទេសខុសច្បាប់ ដែលបាននិងកំពុងកើនឡើងពីមួយថ្ងៃទៅមួយថ្ងៃ បន្ទាប់ពីវិធានការបន្ធូរបន្ថយការត្រួតពិនិត្យការរីករាលដាលនៃ Covid-19 ។
លោកនាយឧត្តមសេនីយ៍ Prawit Wongsuwan ឧបនាយករដ្ឋមន្ត្រី បានបញ្ជាទៅបញ្ជាការប្រតិបត្តិការសន្តិសុខផ្ទៃក្នុង (ISOC), នាយកដ្ឋានរដ្ឋបាលយោធាប៉ូលិស និងក្រសួងការងារ ត្រូវតែធ្វើការរួមគ្នាយ៉ាងសកម្មប្រកបដោយប្រសិទ្ធភាព ក្នុងការឃ្លាំមើលស្ទាក់ចាប់ការបង្ក្រាបការរត់ពន្ធជនចំណាកស្រុកខុសច្បាប់នៅតំបន់ព្រំដែន និងតំបន់ខាងក្នុង ដោយត្រួតពិនិត្យពលករបរទេសនៅកន្លែងធ្វើការ ស្របពេលដែលតម្រូវការកម្លាំងពលកម្មមានច្រើន ហើយស្ថិតិក៏បង្ហាញពីការចាប់ខ្លួនជនចំណាកស្រុកខុសច្បាប់ថែមទៀត បន្ទាប់ពីវិធានការបន្ធូរបន្ថយដើម្បីត្រួតពិនិត្យការរីករាលដាលនៃ covid-19 ។
លោកឧត្តមសេនីយ៍ Prawit ក៏បានស្នើដល់កងកម្លាំងការពារព្រំដែនទាំងដីគោគ និងសមុទ្រ ចូលរួមគាំទ្របេសកកម្មនេះ ដើម្បីបញ្ឈប់ពលករបរទេសនៅតាមព្រំដែន តាមរយៈការល្បាតឲ្យបានញឹកញាប់ទៅលើតំបន់ឆ្លងកាត់ច្រករបៀង និងក៏ដូចសម្របសម្រួលជាមួយកងកម្លាំងការពារព្រំដែននៃប្រទេសជិតខាងជាពិសេសមីយ៉ាន់ម៉ា និងកម្ពុជា ដើម្បីដោះស្រាយបញ្ហាជនអន្តោប្រវេសន៍ខុសច្បាប់បន្ថែមទៀត។
សម្រាប់ច្រកឆ្លងកាត់ធម្មជាតិ និងតំបន់ខាងក្នុង លោកក៏បានស្នើដល់កម្លាំងពាក់ព័ន្ធទាំងអស់ បង្កើនការប្រុងប្រយ័ត្ន និងអនុវត្តច្បាប់ ឲ្យស្របទៅនឹងតម្រូវការឆ្លងដែន។ ហើយទន្ទឹមនោះផងដែរ ត្រូវត្រួតពិនិត្យជំងឺយ៉ាងយកចិត្តទុកដាក់បំផុត និងក៏ដូចបើកប្រតិបត្តិការជាបន្តបន្ទាប់ ដើម្បីចាប់ខ្លួនបណ្តាញ (មេខ្យល់) នៃការរត់ពន្ធពលករចំណាកស្រុកខុសច្បាប់ នៅតាមតំបន់នានា នៅគ្រប់តំបន់ជាបន្តបន្ទាប់ ដោយតាមដានរកឲ្យឃើញសាវតារនិងទិសដៅនិយោជកដែលទទួលយកកម្មករខុសច្បាប់មកធ្វើការ៕
ប្រែសម្រួល៖ លឹម ហុង (ប្រភព៖ innnews/ naewna)