ត្បូងឃ្មុំ៖ ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ បានលើកឡើងថា “ទុក្ខលំបាកពលរដ្ឋគឺជាទុក្ខដ៏ធ្ងន់ធ្ងររបស់ សម្តេចតេជោនាយករដ្ឋមន្ត្រី” ដូច្នេះហើយ ទើបរាជរដ្ឋាភិបាលកម្ពុជា សម្រចដាក់ឲ្យអនុវត្តន៍កម្មវិធីឧបត្ថម្ភសាច់ប្រាក់ជូនគ្រួសារក្រីក្រ មានក្រីក្រប្រភេទ១ និងក្រីក្រប្រភេទ២ និងជនងាយរងគ្រោះ ក្នុងអំឡុងកូវីដ-១៩ ពោលគឺក្នុងស្រុកអូររាំងឪ ក៏ដូចជាទូទាំងខេត្តត្បូងឃ្មុំ “ហាមដាច់ខាតគ្រួសារមាន បន្លំធ្វើក្រ ឯគ្រួសារក្រីក្រពិតប្រាកដទាំងអស់ ត្រូវតែទទួលបានប្រាក់ឧបត្ថម្ភពីសម្តេចតេជោ ហ៊ុន សែន”។
ឯកឧត្តមបណ្ឌិត បញ្ជាក់ថា ជាមួយគ្នានោះការធ្វើអត្តសញ្ញាណកម្មកំណត់គ្រួសារក្រីក្រដែលពិតប្រាកដ កំពុងត្រូវបានសម្តេចតេជោ យកចិត្តទុកដាក់បំផុត ហើយដើម្បីធានាការអនុវត្តកម្មវិធីឧបត្ថម្ភសាច់ប្រាក់ជូនពលរដ្ឋក្រីក្រឱ្យកាន់តែមានប្រសិទ្ធភាពខ្ពស់ លោក អភិបាលខេត្ត បានក្រើនរំលឹកដល់ មេភូមិ មេឃុំ ស្មៀនឃុំ និងអ្នកពាកព័ន្ធចុះអនុវត្តន៍ផ្ទាល់ទាំងអស់ សូមអនុវត្តន៍កិច្ចការនេះទៅតាមនីតិវិធីដែលបានកំណត់ ប្រកបដោយសុក្រឹតភាព និងតម្លាភាព។
ឯកឧត្តមបណ្ឌិត ជាម ច័ន្ទសោភ័ណ លើកឡើងបែបនេះ ក្នុងឳកាសអញ្ជើញជួបសំណេះសំណាលជាមួយអាជ្ញាធរមូលដ្ឋានភូមិ ឃុំ មន្ត្រីជំនាញពាក់ព័ន្ធ ដើម្បីពិនិត្យការអនុវត្តផ្ទាល់ការងារអត្តសញ្ញាណកម្មគ្រួសារក្រីក្រ នៅឃុំចំនួន៤ រួមមានឃុំដំរិល ឃុំចក ឃុំទួលសូភី និងឃុំគងជ័យ ស្រុកអូររាំងឪ ខេត្តត្បូងឃ្មុំ នាថ្ងៃទី១៤ ខែកក្កដា ឆ្នាំ២០២០។
ថ្លែងសង្កត់ធ្ងន់ៗចំទៅកាន់ មេភូមិ មេឃុំ ស្មៀនឃុំ និងអ្នកពាក់ព័ន្ធ ឯកឧត្តមបណ្ឌិត ជាម ច័ន្ទសោភ័ណ ហាមដាច់ខាតមិនឲ្យមានគ្រួសារមានក្រីក្របន្លំ ទទួលបានប័ណ្ណសមធម៌នេះឡើយ បើសិនមានករណីនេះ អ្នកពាក់ព័ន្ធទាំងអស់ ត្រូវទទួលខុសត្រូវដោយខ្លួនឯង មិនមានការលើកឡើងនោះទេ។
ចំណែកគ្រួសារក្រីក្រពិតប្រាកដទាំងអស់ ត្រូវផ្តល់ប័ណ្ណជូនគាត់ ដែលសាច់ប្រាក់ឧបត្ថម្ភត្រូវឲ្យបានដល់ដៃពួគាត់យ៉ាងត្រឹមត្រូវ ដែលជាសាច់ប្រាក់របស់រាជរដ្ឋាភិបាលកម្ពុជា ក្រោមការយកចិត្តទុកដាក់បំផុតចំពោះសុខទុក្ខបងប្អូនប្រជាពលរដ្ឋក្រីក្រទូទាំងប្រទេស ពីសំណាក់សម្តេចតេជោ ហ៊ុន សែន ប្រមុខកម្ពុជា និងគណបក្សប្រជាជនកម្ពុជា។
ឯកឧត្តមបណ្ឌិត ជាម ច័ន្ទសោភ័ណ បន្ទាប់ពីសំណេះសំណាលណែនាំ ក៏ដូចជាក្រើនរំលឹកអាជ្ញាធរមូលដ្ឋានភូមិ ឃុំ មន្ត្រីជំនាញពាក់ព័ន្ធរួចហើយនោះ បានបន្តចុះពិនិត្យដោយផ្ទាល់ នៃដំណើរការសម្ភាសន៍ដល់ទីតាំងផ្ទះប្រជាពលរដ្ឋ ដែលបានដាក់ពាក្យស្នើសុំប័ណ្ណសមធម៌ក្រីក្រ ក៏ដូចជាទៅពិនិត្យដំណើរការពលរដ្ឋដែលទទួលបានប័ណ្ណក្រីក្ររួចហើយ ធ្វើការបើកសាច់ប្រាក់ឧបត្ថម្ភគោលនយោបាយ ពីរាជរដ្ឋាភិបាលផងដែរ។
ចំពោះប្រជាពលរដ្ឋក្រីក្រប្រភេទ១ ក្រីក្រប្រភេទ២ និងធ្លាក់ខ្លួនក្រដោយសារជំងឺកូវីត១៩ បានបង្ហាញអារម្មណ៍សប្បាយចិត្ត និងថ្លែងអំណរគុណអស់ពីដួងចិត្ត ដែលទទួលបានការយកចិត្តទុកដាក់ និងទទួលបានថវិកាគោលនយោបាយពីរាជរដ្ឋាភិបាលកម្ពុជា។
គួររំលឹកថា កម្មវិធីឧបត្ថម្ភសាច់ប្រាក់ជូនគ្រួសារក្រីក្រ គឺជាកម្មវិធីអន្តរាគមន៍មួយរបស់រាជរដ្ឋាភិបាលកម្ពុជា ក្នុងដំណាក់កាលមានការរីករាលដាលជំងឺកូវីដ-១៩ សម្រាប់គ្រួសារដែលមានប័ណ្ណសមធម៌ប្រភេទទី១ និងប្រភេទ២។ ចំណោះការគ្រប់គ្រង ការដឹកនាំ និងការសម្របសម្រួលអនុវត្តន៍កម្មវិធី គឺប្រើប្រាស់រចនាសម្ព័ន្ធស្ថាប័នដែលមានស្រាប់ របស់កម្មវិធីផ្តល់សាច់ប្រាក់ ជូនស្ត្រីមានផ្ទៃពោះ និងកុមារអាយុក្រោម២ឆ្នាំ ដើម្បីធានានិរន្តរភាព និងការលើកកម្ពស់ប្រសិទ្ធភាពការចំណាយទាំងនៅថ្នាក់ជាតិ និងថ្នាក់ក្រោមជាតិ៕
ដោយ៖កូឡាប
