ប៉ុន្មានសប្តាហ៍មុន និងក៏ដូចប៉ុន្មានថ្ងៃកន្លងទៅថ្មីៗនេះ ឃើញថាករណីរំលោភផ្លូវដើរសាធារណៈ បានកើតឡើងជាបន្តបន្ទាប់ ដែលបង្កឲ្យមហាជនហួសចិត្ត និងផ្ទុះការរិះគន់យ៉ាងចាស់ៗដៃ ទៅលើបុគ្គលដែលមានចិត្តលោភលន់ជ្រុលហួស និងជាមនុស្សគ្មានចិត្តចេះចែករំលែកការរស់នៅក្នុងសហគមន៍។
ដោយឡែកថ្មីៗនេះ ករណីបែបនេះបានកើតឡើងទៀតហើយ នៅក្នុងខេត្តស្វាយរៀង បន្ទាប់ពីអ្នកប្រើប្រាស់បណ្តាញសង្គមបានចែករំលែកតៗគ្នា បង្ហាញឲ្យឃើញម្ចាស់ដីស្រែមួយ បានវាទផ្លូវធ្វើដំណើររួម ដែលល្មមនឹងរទេះគោ គោយន្ត និងរថយន្តតូច អាចចេញចូលក្នុងភូមិបាន អស់ឡើងពាក់កណ្តាលផ្លូវ ដើម្បីពង្រីកដីស្រែរបស់ខ្លួនឲ្យធំជាងមុន។ តែយ៉ាងណា ទង្វើលោភលន់ខុសគេខុសឯងនេះ ត្រូវបានបញ្ឈប់ត្រឹមពាក់ទី ខណៈអ្នករស់នៅក្នុងភូមិបង្ហោះថតនៅលើបណ្តាញសង្គម។
បន្ទាប់ពីទទួលបានព័ត៌មាននេះកំពុងផ្ទុះនៅលើបណ្តាញសង្គមហ្វេសបុក នៅព្រឹកថ្ងៃទី១៥ ខែកក្កដាឆ្នាំ ២០២០នេះ លោក ស៊ូ ម៉ុល អភិបាលស្រុករមាសហែក បានដឹកនាំក្រុមការងារ ចុះពិនិត្យ និងសម្របសម្រួល ករណីប្រជាពលរដ្ឋឈ្មោះ ពៅ សារិទ្ធ ភេទប្រុស អាយុ៥១ឆ្នាំ រស់នៅភូមិតាហង់ ឃុំកំពង់ត្រាច ស្រុករមាសហែក ខេត្តស្វាយរៀង បានធ្វើស្រែរំលោភលើដីផ្លូវចេញចូលក្នុងភូមិ។
ជាលទ្ធផល កសិករឈ្មោះ ពៅ សារិត និងប្រពន្ធ បានទទួលស្គាល់កំហុស និងយល់ព្រមលើកដីចាក់បំពេញផ្លូវនោះឡើងវិញ ដើម្បីឲ្យប្រជាពលរដ្ឋ បានឆ្លងកាត់ជាធម្មតា៕ ដោយ៖ លឹម ហុង