ភ្នំពេញ៖ ពិធីចុះហត្ថលេខាលើអនុស្សរណៈនៃការយោគយល់គ្នា រវាងក្រសួងកសិកម្ម និងក្រុមហ៊ុនYamato Green ធ្វើឡើងនៅថ្ងៃ១៥ កក្កដានេះ នាទីស្តីការក្រសួងកសិកម្ម ដើម្បីអភិវឌ្ឍន៍បន្លែសុវត្ថិភាពសម្រាប់ទីផ្សារក្នុងស្រុក និងការនាំចេញ។
ពិធីចុះហត្ថលេខានេះ មានការអញ្ជើញចូលរួមជាអធិបតី ឯឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រម៉ាញ់ និងនេសាទ និងឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំនៅកម្ពុជា និង មន្ត្រីរាជការ ព្រមទាំងតំណាងក្រុមហ៊ុនYamato Green។
ឯកឧត្តមវេង សាខុន រដ្ឋមន្ត្រីក្រសួងកសិកម្ម បានសំដែងក្តីរីករាយដែលកម្ពុជា និងជប៉ុនមានកិច្ចសហប្រតិបត្តិការល្អ ជាមួយគា្នលើគ្រប់វិស័យ ព្រមទាំងឈានដល់ការសហការគ្នាបន្ថែមទៀតលើវិស័យកសិម្ម ក្នុងការអភិវឌ្ឍបន្លែសុវត្ថិភាពនៅកម្ពុជា ដើម្បីផ្គត់ផ្គង់ទីផ្សាក្នុងស្រុក និងការនាំចេញស្របតាមការណែនាំរបស់ប្រមុខរាជរដ្ឋាភិបាលកម្ពុជា សម្តេចតេជោនាយករដ្ឋមន្ត្រី ហ៊ុន សែន។
តំណាងក្រុមហ៊ុន Yamato Green បានលើកឡើងថា ក្រុមហ៊ុន នឹងនាំយកនូវបច្ចេកទេសក្នុងការដាំដុះមកធ្វើការបង្ហាញដល់ប្រជាកសិករកម្ពុជា ដើម្បីការដាំដុះទទួលបានទិន្នផលខ្ពស់ និងមានគុណភាព ក្នុងនោះក្រុមហ៊ុនមានគោលការណ៍ដាំដុះក្នុងផ្ទះសំណាញ់ផងដែរ។
ភាគីជប៉ុន បានបង្ហាញនូវសុច្ឆន្ទៈ ក្នុងការនាំចេញកសិផលរបស់កម្ពុជាទៅកាន់ទីផ្សារពិភពលោកក្រោមស្លាកផលិតនៅកម្ពុជា “Made in Cambodia “ ដោយលើកកម្ពស់ការដាំដុះទាំងបន្លែ ផ្លែឈើ ព្រមទាំងការចិញ្ចឹមត្រីតាមបច្ចេកទេសជប៉ុន។
គួរបញ្ជាក់ថា បើតាម ឯកឧត្តមរដ្ឋមន្ត្រី វេង សាខុន កម្ពុជាបានត្រៀមខ្លួនរួចជាស្រេច ដើម្បីធ្វើកិច្ចសហការជាមួយនឹងខាងក្រុមហ៊ុនជប៉ុនក្នុងការជម្រុញការអភិវឌ្ឍន៍បន្លែសុវត្ថិភាព និងគាំទ្រដល់ប្រជាកសិករកម្ពុជាក្នុងការបង្កើនការផលិតផលិតផលកសិកម្មប្រកបដោយគុណភាពឆ្លើយតបតម្រូវការក្នុងស្រុកនិងការនាំចេញ៕
ដោយ៖CEN
