ភ្នំពេញ៖ មានគណនីហ្វេសបុកមួយឈ្មោះថា Khmer Shear ដែលបានចុះផ្សាយថា «ម្ចាស់ឡានត្រូវគេចាប់ជម្រិត ផ្លាកលេខ 2AL-4977 » ពាក់ព័ន្ធនឹងករណីនេះ ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ សូមធ្វើការបកស្រាយ និងបដិសេធទាំងស្រុង ចំពោះគណនីហ្វេសបុកមួយឈ្មោះថា Khmer Shear ហើយសមត្ថកិច្ចកំពុងតែស្វែងរកម្ចាស់គណនីហ្វេសប៊ុក ដែលបានចុះផ្សាយព័ត៌មានមិនពិត ដែលមានបំណងបង្កភាពចលាចល និងបង្កអសន្តិសុខដល់សង្គមជាតិ។
បន្ទាប់ពីទទួលបានព័ត៌មានថា មានករណីចាប់ជម្រិតម្ចាស់រថយន្ត ម៉ាកLEXUS RX300 ពណ៌ស ពាក់ផ្លាកលេខភ្នំពេញ 2AL-4977 ម្ចាស់កម្មសិទ្ធឈ្មោះ ហួន ពុធធារី មានទីលំនៅផ្ទះលេខ284AE2Z ផ្លូវ93 សង្កាត់បឹងរាំង ខណ្ឌដូនពេញ ត្រូវបានគេចាប់ជម្រិតនោះ សមត្ថកិច្ចបានចុះទៅជួបសាមីខ្លួន ដល់លំនៅដ្ឋាន និងរថយន្ត ហើយគាត់បានបំភ្លឺថា គាត់ជាម្ចាស់រថយន្ត ហើយពុំត្រូវបានគេចាប់ជម្រិតដោយហ្វេសប៊ុកខាងលើចុះផ្សាយ
ឡើយ ហើយសាមីខ្លួនដែលជាម្ចាស់រថយន្ត បានបញ្ជាក់យ៉ាងច្បាស់ថា « ការចុះផ្សាយនេះជាព័ត៌មានមិនពិត» ។
នៅពេលនេះ សមត្ថកិច្ចកំពុងតែស្វែងរក ម្ចាស់គណនីហ្វេសប៊ុកដែលបានចុះផ្សាយព័ត៌មានមិនពិត ដែលមានបំណងបង្កភាពចលាចល និងបង្កអសន្តិសុខដល់សង្គមជាតិផងដែរ ៕ ដោយ៖កូឡាប
