ភ្នំពេញ ៖ ក្រោយពីបានឃើញម្ចាស់គណនីហ្វេសប៊ុកឈ្មោះ Angkor Thom បានបង្ហោះផ្តល់ព័ត៌មាន «ជួងសម្បកគ្រាប់បែក» ត្រូវបានបំពាក់ដើម្បីបន្លឺសំឡេងនៅក្នុងសាលារៀនមួយកន្លែង ក្នុងខេត្តព្រៃវែងរួចមក នៅថ្ងៃទី១៥ ខែកក្កដា ឆ្នាំ២០២០ ម្សិលមិញនេះ ខាងមន្ត្រីស៊ីម៉ាក់បានចុះទៅសម្របសម្រួលជាមួយអាជ្ញាធរ និងសាលារៀន ដើម្បីសុំធ្វើការដកហូត។
ទាក់ទងនឹងករណីដ៏គួរឲ្យភ្ញាក់ផ្អើលខាងលើនេះ លោក ហេង រតនា នាយកមជ្ឈមណ្ឌលសកម្មភាពកម្ចាត់មីនកម្ពុជា ហៅកាត់ថា CMAC បានប្រាប់តាមបណ្តាញសង្គមយ៉ាងដូច្នេះថា៖ «ឈប់ឮសឡេងជួងគ្រាប់បែកទៀតហើយ!! ថ្ងៃទី១៥ ខែកក្កដា ឆ្នាំ២០២០នេះ ដកហូតបានសម្រេច! សូមអរគុណលោកនាយកសាលានិងប៉ូលិសមូលដ្ឋានចូលរួមសហការ! និងសូមអរគុណលោកម្ចាស់fab account ឈ្មោះAngkor Thom ដែលបានផ្តល់ព័ត៌មាននេះ» ។
យ៉ាងណាមិញ ដើម្បីកុំឲ្យសាធារណជនមានការងឿងឆ្ងល់ជុំវិញមូលហេតុដកហូតជួងគ្រាប់បែកនេះ លោក ហេង រតនា ក៏បានពន្យល់លម្អិតបន្ថែមថា «ក្រោយសង្គ្រាមបានបញ្ចប់គ្រាប់បែកទម្លាក់ពីយន្តហោះ ឬយកសម្បកគ្រាប់សំណល់ជាតិផ្ទះពីសង្គ្រាមមួយចំនួនមកធ្វើជាជួង តាមវត្តអារាម តាមសាលា និងតាមស្នាក់ការភូមិ ស្ទើរតែជារឿងធម្មតាទៅហើយ គ្មានអ្វីចំឡែកទេ! ហើយស្របតាមការរីកចម្រើននិងផ្លាស់ប្តូររបស់សង្គមជាតិ ការប្រើប្រាស់គ្រាប់សំណល់ជាតិផ្ទុះសំណល់ពីសង្គ្រាម ទាំងនេះធ្វើជាឧបករណ៍ប្រើប្រាស់ ត្រូវបានហាមឃាត់ ដើម្បីចៀសវាងការផ្តល់សារខុសដល់ក្មេងៗ នឹងអាចបង្កគ្រោះថ្នាក់នៅពេលក្មេងៗអាចលេងវាយគ្រាប់ផ្សេងៗទៀត»។
នាយកមជ្ឈមណ្ឌល CMAC រូបនេះ នៅបានបញ្ជាក់ឲ្យដឹងទៀតថា «គ្រាប់បែកដួងដែលជួបប្រទះនៅតាមវត្តអារាមសាលារៀននិងស្នាក់ការភូមិនោះ ភាគច្រើនគ្មានរំសេវ និងក្បាលគីបបង្កផ្ទុះទេ! ប៉ុន្តែដើម្បីបម្រើគោលការណ៍អប់រំការយល់ដឹង ពីគ្រោះថ្នាក់ដោយសារសំណល់ជាតិផ្ទុះពីសង្គ្រាមនោះ ទើបត្រូវដកហូតហើយនៅសល់តាមវត្តអារាមសាលារៀន និងស្នាក់ការភូមិមូលដ្ឋានសាធារណៈមួយចំនួនទៀត មិនទាន់ជ្រាបនិងមិនទាន់បានដកហូត ដោយគ្មានព័ត៌មាន! ហើយបញ្ហានៅសេសសល់នេះ មាននៅក្នុងក្របខ័ណ្ឌទូទាំងប្រទេសមិនមែនតែនៅខេត្តព្រៃវែង ស្វាយរៀង ឬកំពង់ធំ សៀមរាបនោះទេ»៕ ដោយ៖ លឹម ហុង
