ទោះបីជាមានព្យុះព្រិលក៏ដោយ Zhao Fangzi ដែលជាពលករចំណាកស្រុកនៅហឺណាន ប្រទេសចិន បានដើរចម្ងាយ 40 គីឡូម៉ែត្រ ពីចំណតរថភ្លើងទៅផ្ទះ ដើម្បីសន្សំប្រាក់ទិញអាវថ្មីមួយឲ្យភរិយា។
តាម Shanghaiist លោក Zhao អាយុ 60 ឆ្នាំ បានសម្រេចចិត្តដើរទៅផ្ទះ ទោះបីព្យុះព្រិល កាលពីថ្ងៃសុក្រ ដោយធ្វើឱ្យឡានក្រុង ឈប់រត់ពីស្ថានីយ៍ឡាំងយ៉ាង ទៅកាន់តំបន់ក្បែរៗនោះ។
ជំនួសឱ្យការបង់ប្រាក់ 20 យ័ន សម្រាប់តាក់ស៊ី ឬជួលបន្ទប់នៅក្នុងសណ្ឋាគារសម្រាប់សម្រាក១យប់ លោក Zhao សម្រេចចិត្តដើរកាត់ព្រិលត្រឡប់ទៅផ្ទះវិញ ដោយសង្ឃឹមថា នឹងសន្សំប្រាក់សម្រាប់ទិញខោអាវថ្មីឲ្យភរិយាគាត់។
ថ្លែងទៅកាន់ប្រព័ន្ធផ្សព្វផ្សាយក្នុងស្រុកលោក Zhao បានឲ្យដឹងថា ៖ «លុយមិនងាយស្រួលរកបានទេ ខ្ញុំរកបានប្រហែល 2.000 យ័នក្នុងមួយខែ បើខ្ញុំមិនរឹតបន្តឹងការចំណាយខ្ញុំនឹងមិនសន្សំប្រាក់អ្វីបាននោះទេ»។
លោក Zhao បាននិយាយថា និយោជកនៅតែជំពាក់ប្រាក់គាត់ ហើយសង្ឃឹមថា នឹងទទួលបានប្រាក់ឈ្នួល បន្ទាប់ពីថ្ងៃបុណ្យឆ្លងឆ្នាំថ្មី។
ដោយសារតែអាយុរាងជ្រេរបស់គាត់ ការស្វែងរកការងាររបស់ Zhao ពិបាកណាស់ ហើយគាត់នឹងឈប់សម្រាកដោយពុំវិលត្រឡប់មកទីក្រុងស៊ាងហៃវិញ។
នៅពេលត្រឡប់មកវិញលើកនេះ លោក Zhao បានដឹកជញ្ជូនទ្រព្យសម្បត្តិភាគច្រើនរួមទាំងកង្ហារ និងភួយ។ លោកពោលបន្ថែមថា “ក៏មិនត្រជាក់ខ្លាំងពេកទេ កាន់តែដើរខ្ញុំកាន់តែមានអារម្មណ៍កក់ក្តៅ”៕ ចន្ទ្រា
