ភ្នំពេញ៖ ជឿជាក់ថាបងប្អូនមហាជនភាគច្រើន នៅចាំបានមិនទាន់ភ្លេចនោះទេ ចំពោះគូស្នេហ៍មួយដែលបានរៀបការនឹងគ្នាកាលពីថ្ងៃទី២៤ ខែមិថុនា ឆ្នាំ២០១៨ នៅក្នុងខេត្តកំពង់ធំ កន្លងទៅនេះ ដែលបានធ្វើឲ្យអ្នកប្រើប្រាស់បណ្តាញសង្គម ផ្ទុះការភ្ញាក់ផ្អើលជាខ្លាំង ព្រោះតែខាងកូនកំលោះវ័យចំណាស់ជិត ៦០ ឆ្នាំទៅហើយ ខណៈកូនក្រមុំវិញអាយុជាង ២០ ឆ្នាំ ប៉ុណ្ណោះ ដែលមើលទៅប្រៀបដូចឪពុក និងកូនអ៊ីចឹង។
បើទោះជាមានមនុស្សមួយចំនួន នាំគ្នារិះគន់ថា នេះមកពីដោយសារឥទ្ធិពលនៃដុល្លារ ក៏អ្នកទាំងពីរមិនយកចិត្តទុកដាក់ទៅនឹងពាក្យទាំងអស់នោះឡើយ ព្រោះថា ពួកគាត់ពិតជាស្រឡាញ់គ្នាដោយចិត្ត និងចិត្ត ហើយជាក់ស្តែង គាត់ក៏មិនមែនជាថៅកែក្រុមហ៊ុន ឬ អ្នកមានទ្រព្យស្តុកណានោះទេ ពោលគឺត្រឹមតែជាអ្នករត់កង់បីឥណ្ឌា (PassApp) ប៉ុណ្ណោះ។
ពិតមែនហើយ ក្រោយរៀបការ ប្តីប្រពន្ធ១គូនេះ គេកម្រឮនូវពាក្យប្រេះឆាគ្នានោះទេ ពោលគឺអ្នកទាំងពីរ កាន់តែបង្កើនក្តីស្រឡាញ់ឲ្យគ្នាទៅវិញមក តាមរយៈការបង្ហោះរូបភាពផ្អែមល្ហែមនឹងគ្នាតាមរយៈបណ្តាញសង្គមជារឿយៗ ឃើញហើយពិតជាគួរឲ្យច្រណែនខ្លាំងតែម្តង។
ដោយឡែក កាលពីថ្ងៃទី១៥ ខែកក្កដា ឆ្នាំ២០២០ ម្សិលមិញ គេបានប្រទះឃើញ នារីជាប្រពន្ធបុរសវ័យចំណាស់រូបនេះ បានបង្ហោះសារដ៏គួរឲ្យចាប់អារម្មណ៍មួយទៀត ដោយក្នុងហ្វេសប៊ុករបស់ខ្លួនឈ្មោះ Neng Chanthy Chamming ដោយរៀបរាប់សរសើរប្តីយ៉ាងរំភើបក្តុកក្តួលថា៖ ប្ដីសម្លាញ់ អរគុណបងដែលចូលមកក្នុងជីវិតអូន បង្រៀនអូនឲ្យស្គាល់ពីបុព្វហេតុនៃការរស់ អូនសែនពេញចិត្តដែលបានក្លាយជាដៃគូជីវិតដើររួមផ្លូវជាមួយបង ទាំងដឹងថាផ្លូវនោះវាពិបាកក៏ដោយ តែអូនក៏ពេញចិត្តនឹងទទួលព្រោះអូនដឹងថា ដៃគូជីវិតរបស់អូន ជាមនុស្សល្អ និងមានគុណតម្លៃគ្រប់គ្រាន់ សម្រាប់អោយអូនតស៊ូជាមួយបាន ទោះបីយើងគ្មានគ្រប់យ៉ាង តែអ្វីដែលយើងមាន គឺយើងមានចិត្ត និងតស៊ូជាមួយគ្នា។
ស្គាល់ជីវិតថាតើយើងចង់បានអ្វី? អូនសែនស្ដាយដែលអូនមិនអាចឈឺជំនួសបង អូនចង់ឃើញបងមានសុខភាពល្អ អ្វីដែលអូនចង់បាន និងប្រាថ្នារាល់ថ្ងៃ សុំឲ្យបងបានស្ថិតនៅជាមួយរហូតទៅ អូនស្រឡាញ់បងណាស់ ប្ដីសម្លាញ់។ (ផ្ទះ លុយកាក់) យើងគ្មានឡើយ តែអ្វីដែលប្ដីសម្រេចថាល្អ គឺអូនទទួលស្គាល់គ្រប់យ៉ាង ព្រោះអ្វីដែលជាភាពត្រឹមត្រូវ គឺបងតែងជ្រោមជ្រែងជានិច្ច អូននឹងរួមផ្លូវជីវិតនេះជាមួយបង»៕ ដោយ៖ លឹម ហុង
