ភ្នំពេញ៖ ចំនួនរថយន្តនិងម៉ូតូ នៅក្នុងប្រទេសកម្ពុជា កំពុងកើនឡើងយ៉ាងលឿន ក្នុងរយៈពេលប៉ុន្មានឆ្នាំចុងក្រោយនេះ។ ទោះជាយ៉ាងណា ប្រព័ន្ធគ្រប់គ្រងការចុះបញ្ជីរថយន្ត និងត្រួតពិនិត្យលក្ខណៈបច្ចេកទេសយានយន្ត នៅមិនទាន់មានលក្ខណៈគ្រប់គ្រាន់នៅឡើយ ដែលជាហេតុ បង្កឱ្យមានបញ្ហាទាក់ទង នឹងសុវត្ថិភាពចរាចរណ៍និងបរិស្ថាន។
សេចក្តីប្រកាសព័ត៌មានរបស់ក្រសួងសាធារណការនិងដឹកជញ្ជូន ស្តីពី គម្រោងទំនើបកម្មប្រព័ន្ធចុះបញ្ជី និងត្រួតពិនិត្យលក្ខណៈបច្ចេកទេសយានយន្ត កាលពីថ្ងៃទី៣០ មករា ឆ្នាំ២០១៨ បានបញ្ជាក់ថា នៅថ្ងៃទី ១៨ ខែធ្នូ គម្រោងសហប្រតិបត្តិការបច្ចេកទេសរបស់ អង្គការ JICA ដែលមានឈ្មោះថា “គម្រោងទំនើបកម្មប្រព័ន្ធចុះបញ្ជី និងត្រួតពិនិត្យលក្ខណៈបច្ចេកទេសយានយន្ត” បានធ្វើកិច្ចប្រជុំគណៈកម្មការសម្របសម្រួលរួមលើកទី៣ (3rd JCC) នៅ សណ្ឋាគារភ្នំពេញ ក្រោមអធីបតីដ៏ខ្ពង់ខ្ពស់របស់ លោកតូច ចាន់ កុសល រដ្ឋលេខាធិការ ក្រសួងសាធារណការ និង ដឹកជញ្ជូន និង លោក តាណាកា កូតារ៉ូ អនុប្រធានតំណាងការិយាល័យ JICA ប្រចាំប្រទេសកម្ពុជា។
កិច្ចប្រជុំនេះក៏មានការចូលរួមពីសមភាគីដែលជាសមាជិករបស់គម្រោង និងមន្ត្រីក្រសួងសាធារណការ និងដឹកជញ្ជូន តំណាងអន្តរក្រសួងមកពី អគ្គនាយកដ្ឋានពន្ធដា និងអគ្គនាយកដ្ឋានគយ និងរដ្ឋករ នៃក្រសួងសេដ្ឋកិច្ច និងហិរញ្ញវត្ថុ អគ្គស្នងការនគបាលជាតិ និងអគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ និងក្រុមអ្នកជំនាញការគម្រោង JICA ដឹកនាំដោយ លោក អូតា ម៉ាសាយ៉ា ប្រធានទីប្រឹក្សាគម្រោង ដែលអ្នកចូលរួមប្រជុំសរុបទាំងអស់ប្រមាណ ៥០នាក់។
ដោយផ្អែកលើស្ថានភាពនេះ គម្រោងនេះមានរយៈពេល៣ឆ្នាំ ដែលបានចាប់ផ្តើមតាំងពី ខែកក្កដា ឆ្នាំ២០១៦ ដោយមានគោលបំណងធ្វើឱ្យប្រសើរឡើងនូវប្រព័ន្ធគ្រប់គ្រងការចុះបញ្ជីយានយន្ត ការត្រួតពិនិត្យលក្ខណៈបច្ចេកទេសយានយន្ត និងប្រព័ន្ធស្វ័យប្រវត្តិកម្មនៅកម្ពុជា។ ទាំងនេះត្រូវបានរំពឹងទុកថាគម្រោងនេះបានរួមចំណែកដល់ការសម្រាលបន្ទុកជូនប្រជាជន ចំពោះការដាក់ពាក្យស្នើសុំចុះបញ្ជីនិងត្រួតពិនិត្យលក្ខណៈបច្ចេកទេសយានយន្ត តាមចំណុចដែលមានដូចខាងក្រោម ដើម្បីធានាបាននូវតម្លៃរថយន្តជាអចលនទ្រព្យ និងរក្សាបាននូវសុវត្ថិភាពចរាចរណ៍៖ ដើម្បីផ្តល់នូវនីតិវិធីគ្រប់គ្រងយានយន្តអោយបានច្បាស់លាស់ ដើម្បីប្រមូលនូវពត៌មានយានយន្ត និងចែករំលែកព័ត៌មាននោះជាមួយក្រសួងដែលពាក់ព័ន្ធដូចជា ក្រសួងសេដ្ឋកិច្ច និងហិរញ្ញវត្ថុ និងក្រសួងមហាផ្ទៃដើម្បីធ្វើឲ្យប្រសើរឡើងនូវគុណភាពនៃការត្រួតពិនិត្យលក្ខណៈបច្ចេកទេសយានយន្ត។
សកម្មភាពនាពេលខាងមុខរបស់គម្រោង ដែលទទួលបានការអនុញ្ញាតនៅក្នុងកិច្ចប្រជុំគណៈកម្មការសម្របសម្រួលរួមលើកទីបី កាលពីថ្ងៃទី ១៨ ខែធ្នូ ឆ្នាំ២០១៧ កន្លងទៅ មានដូចខាងក្រោម៖ ការចុះបញ្ជីយានយន្ត ធ្វើឱ្យមានភាពត្រឹមត្រូវលើព័ត៌មានចុះបញ្ជីយានយន្ត គឺយុទ្ធនាការកែតម្រូវព័ត៌មានយានយន្តដែលបានចុះបញ្ជីរួច ប្រព័ន្ធលុបពត៌មានយានយន្តចេញពីបញ្ជី និង ណែនាំពីប្រកាស គោលការណ៍ណែនាំ និងតារាងត្រួតពិនិត្យ ។ល។
ជៀសវាងការលក់រថយន្តបន្តមុនពេលបញ្ចប់កិច្ចសន្យាបង់ប្រាក់កម្ចីទិញយានយន្ត គឺបញ្ចូលបន្ថែមនូវព័ត៌មានកម្ចី និងឈ្មោះអ្នកប្រើប្រាស់ចូលក្នុងប្រព័ន្ធចុះបញ្ជីយានយន្ត។ ការចែករំលែកពត៌មានចុះបញ្ជីយានយន្តគឺ ចាប់ផ្តើមធ្វើការចែករំលែកព័ត៌មានជាមួយក្រសួងដែលពាក់ព័ន្ធ ដូចជា អគ្គនាយកដ្ឋានគយនិងរដ្ឋាករ និង អគ្គនាយកដ្ឋានពន្ធដារ នៃក្រសួងសេដ្ឋកិច្ចនិងហិរញ្ញវត្ថុ អគ្គស្នងការនគរបាលជាតិ និង អគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃ។
ការត្រួតពិនិត្យលក្ខណៈបច្ចេកទេស ពោលគឺកំណត់ស្ដង់ដារបច្ចេកទេសទៅលើឧបករណ៍ត្រួតពិនិត្យលក្ខណៈបច្ចេកទេស និងលក្ខណៈស្តង់ដារសម្រាប់អ្នកត្រួតពិនិត្យបច្ចេកទេស ណែនាំអំពីប្រព័ន្ធគ្រប់គ្រងឧបករណ៍ត្រួតពិនិត្យលក្ខណៈបច្ចេកទេស ណែនាំអំពីប្រកាស គោលការណ៍ណែនាំ និង តារាងត្រួតពិនិត្យ ។ល។ ណែនាំអំពីតារាងត្រួតពិនិត្យ សម្រាប់ឧបករណ៍ត្រួតពិនិត្យលក្ខណៈបច្ចេកទេសដែលមានអទិភាព។ ប្រព័ន្ធពត៌មានវិទ្យា IT System កំណត់នូវចំណុចប្រទាក់ឲ្យបានច្បាស់លាស់សម្រាប់ធ្វើការចែករំលែកព័ត៌មាន អនុវត្តការវិភាគវិនិច្ឆ័យលើប្រព័ន្ធសុវត្ថិភាព (Security Diagnosis) ណែនាំអំពីច្បាប់ប្រតិបត្តិការសម្រាប់ប្រព័ន្ធស្វ័យប្រវត្តិកម្ម ណែនាំអំពីតម្រូវការសម្រាប់ប្រព័ន្ធហេដ្ឋារចនាសម្ព័ន្ធ ផ្តល់ជូននូវឧបករណ៍ព័ត៌មានវិទ្យា IT ដោយយុទ្ធសាស្ត្ររយៈពេលខ្លីសំណើរ បង្កើតមជ្ឈមណ្ឌលទិន្នន័យថ្មី (Data Center) អភិវឌ្ឍន៍ការដាក់ពាក្យស្នើសុំ និងកសាងសមត្ថភាពសម្រាប់បុគ្គលិកព័ត៌មានវិទ្យា៕ ដោយ៖បញ្ញាស័ក្តិ
