ភ្នំពេញ៖ តាមការសិក្សាក្នុងចំណោមអ្នកជំនាញទេសចរណ៍កម្ពុជាប្រមាណ៦២ម៉ឺននាក់ មានអ្នកជំនាញប្រមាណ៤០% បានឆ្លើយតបទៅនឹងស្តង់ដារសមត្ថភាពអាស៊ាន ហើយក្រសួងទេសចរណ៍បានយកចិត្តទុកដាក់ធ្វើការបណ្តុះបណ្តាល និងវាយតម្លៃអ្នកជំនាញទេសចរណ៍ បន្ថែមទៀតប្រមាណ៦០%ទៀតដើម្បីអាចឆ្លើយតប ទៅនឹងស្តង់ដារសមត្ថភាពអាស៊ាន១០០% ត្រឹមឆ្នាំ២០២៥។
ថ្លែងក្នុពិធីប្រគល់វិញ្ញាបនបត្រជំនាញវិជ្ជាជីវៈ ទេសចរណ៍ស្តង់ដារសមត្ថភាពអាស៊ាន ដល់សិស្សានុសិស្សប្រមាណ៤០០នាក់ នៅវិទ្យាស្ថានប៉េអេសអឺ នៅថ្ងៃទី៣០ ខែមករា ឆ្នាំ២០១៨នេះ លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអ្នកជំនាញទេសចរណ៍ បានថ្លែងថា កត្តាសន្តិភាព សន្តិសុខនិងសុវត្ថិភាពសង្គមពេញផ្ទៃប្រទេស ជាមូលដ្ឋានគ្រឹះក្នុងការអភិវឌ្ឍប្រទេស ក្នុងនោះវិស័យទេសចរណ៍កម្ពុជា ក៏បានចូលរួមចំណែកប្រមាណ១៣% នៃផលិតផលក្នុងស្រុកសរុប (GDP) និងមានការរីកចម្រើនយ៉ាងឆាប់រហ័ស ដោយនៅក្នុងឆ្នាំ២០១៧កន្លងទៅ កម្ពុជាទទួលបានទេសចរអន្តរជាតិប្រមាណ៥,៦លាននាក់ ក្នុងកំណើន១១,៨%។
លោករដ្ឋមន្ត្រី បានបញ្ជាក់ថា តាមការព្យាករណ៍ជាមួយនឹងការមកដល់របស់ទេសចរអន្តរជាតិប្រមាណ៧លាននាក់ នៅឆ្នាំ២០២០ ឧស្សាហកម្មទេសចរណ៍នឹងបង្កើតឱកាស ការងារផ្ទាល់ប្រមាណ១លាននាក់ និងប្រមាណ១,២ ននាក់ នៅឆ្នាំ២០២៥ ព្រមទាំងប្រមាណ១,៧ លាននាក់ នៅឆ្នាំ២០៣០។
លោក ថោង ខុន បានបញ្ជាក់ថា ដើម្បីសម្រេចចក្ខុវិស័យដ៏មុតគត់នេះ ក្រសួងទេសចរណ៍បានដាក់ចុះនូវសកម្មភាពយុទ្ធសាស្ត្រ មួយចំនួនគាំទ្រដល់ផែនការយុទ្ធសាស្ត្រអភិវឌ្ឍន៍ ធនធានមនុស្សក្នុងវិស័យទេសចរណ៍រួមមាន អនុវត្តកម្មវិធី ២០១៨សម្រាប់ស្តង់ដារ និងវាយតម្លៃអ្នកជំនាញទេសចរណ៍ ឆ្ពោះទៅកាន់ការសិក្សាពេញមួយជីវិត (Lifelong learning) សំដៅអភិវឌ្ឍកម្មវិធីបណ្តុះបណ្តាលដែលមានស្តង់ដារខ្ពស់ មានការទទួលស្គាល់ពីគ្រប់ភាគីពាក់ព័ន្ធ និងធ្វើការវាយតម្លៃទទួលស្គាល់សមត្ថភាព អ្នកជំនាញទេសចរណ៍ដែលកំពុង បម្រើការងារបច្ចុប្បន្នតាមរយៈការវាយតម្លៃការសិក្សាពីមុន (RPL) ឲ្យទទួលបានគុណវុឌ្ឍិជាក់លាក់ ដើម្បីតម្រង់ទិសអាជីពការងារពេញមួយជីវិត។ អនុវត្តគម្រោងបណ្តុះបណ្តាលជំនាញវិជ្ជាជីវៈទេសចរណ៍ ដល់ពលករចំណាកស្រុក (Migrant Workers) ដើម្បីផ្តល់ឱកាសការងារ ក្នុងវិស័យទេសចរណ៍ដល់ពលករទាំងនេះ។
ដាក់ចុះអនុវត្តកម្មវិធីបណ្តុះបណ្តាលជំនាញទេសចរណ៍អាស៊ាន តាមវិទ្យាល័យចំណេះទូទៅ និងបច្ចេកទេស ទូទាំងប្រទេសដោយសហការ ជាមួយក្រសួងអប់រំ យុវជន និងកីឡា និងក្រសួងជំនាញផ្សេងៗទៀត កម្មវិធីបណ្តុះបណ្តាលនេះ នឹងជួយឲ្យសិស្សានុសិស្សបញ្ចប់ថ្នាក់ទី៩អាចបន្តការ សិក្សាជំនាញវិជ្ជាជីវៈទេសចរណ៍ រយៈពេល៣ឆ្នាំ ហើយទទួលបានសញ្ញាបត្រវិជ្ជាជីវៈដែលមានតម្លៃសមមូលនឹងសញ្ញាបត្រមធ្យមសិក្សាទុតិយភូមិ៕ ដោយ៖បញ្ញាស័ក្តិ