ភ្នំពេញ៖ អគ្គនាយកដ្ឋានអន្ដោប្រវេសន៍ បានឲ្យដឹងថា ជនបរទេសដែលកំពុងជាប់ឃុំខ្លួនក្នុងពន្ធនាគារនៅទូទាំងប្រទេស គិតត្រឹមខែមិថុនា ឆ្នាំ២០២០ មានចំនួនសរុប១.៨៧៤នាក់ ក្នុងនោះ ស្រី២៤៩នាក់ និងចំនួន៤៥សញ្ជាតិ ខណៈមកទល់ពេលនេះ មានជនបរទេស បានចុះបញ្ជីតាមប្រព័ន្ធព័ត៌មានវិទ្យា មកស្នាក់នៅក្នុងប្រទេសកម្ពុជា មានជាង១៦ម៉ឺននាក់។
ក្នុងរបាយការណ៍លទ្ធផលការងារប្រចាំឆមាសទី១ និងទិសដៅការងារឆមាសទី២ ឆ្នាំ២០២០របស់អគ្គ នាយកដ្ឋានអន្ដោប្រវេសន៍ បានបញ្ជាក់ថា ជនបរទេសដែលកំពុងជាប់ឃុំ ក្នុងពន្ធនាគារនៅទូទាំងប្រទេសគិតត្រឹម ខែមិថុនា ឆ្នាំ២០២០ មានចំនួនសរុប១.៨៧៤នាក់ ស្រី២៤៩នាក់ មានចំនួន៤៥សញ្ជាតិ។ ភាគច្រើនជាងគេ គឺជនជាតិវៀតណាម៧៤៩នាក់ ស្រី១៦៨, ចិន៧២៧នាក់ ស្រី២៤នាក់, នីហ្សេរីយ៉ា៧៣នាក់ ស្រី១នាក់, ថៃ៦៨នាក់ ស្រី២៦។ ក្នុងនោះ ជនដែលត្រូវចោទ មានចំនួន៥៨៩នាក់ ស្រី៥៤នាក់, ជនជាប់ចោទ មានចំនួន៣០៩នាក់ ស្រី២៧នាក់, ពិរុទ្ធជន មានចំនួន៦៨៣នាក់ ស្រី៩៤នាក់, ទណ្ឌិត មានចំនួន២៩៣នាក់ ស្រី៧៤នាក់។
ជនបរទេសរងគ្រោះដោយឧប្បទ្ទវហេតុផ្សេងៗ ចំនួន២១១នាក់ លើ១៣២នាក់ ក្នុងនោះស្លាប់ដោយសារជំងឺ១០០ លើ៥៤នាក់, ឃាតកម្ម៤នាក់ , អត្តឃាត១៤នាក់ លើ០១នាក់ ដោយគ្រោះថ្នាក់ចរាចរណ៍៥នាក់ លើ០៨នាក់ និងរងគ្រោះដោយអំពើផ្សេងៗចំនួន៨៨នាក់ លើ៣៧នាក់។ គិតចាប់ពីការបង្កើតអគ្គនាយកដ្ឋានអន្ដោប្រវេសន៍ឆ្នាំ២០១៤ មកដល់ដំណច់ខែមិថុនា ឆ្នាំ២០២០នេះ បានបណ្ដេញចេញជនបរទេសខុសច្បាប់ ចំនួន១៧.២៣០នាក់ ស្រី២.៩៧១នាក់ មាន១០៤សញ្ជាតិ។
ឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្ដោប្រវេសន៍ បានមានប្រសាសន៍ថា មកទល់ពេលនេះ មានជនបរទេសដែលស្នាក់នៅក្នុងប្រទេសកម្ពុជា បានចុះបញ្ជីតាមប្រព័ន្ធព័ត៌មានវិទ្យាមានជាង១៦ម៉ឺននាក់ ប៉ុន្ដែវត្តមានជាក់ស្តែង មានជនបរទេសស្នាក់នៅកម្ពុជាមានជាង១១ម៉ឺននាក់ប៉ុណ្ណោះ។
ឯកឧត្តម នាយឧត្តមសេនីយ៍ គៀត ច័ន្ទថារិទ្ធ បានឲ្យដឹងថា រយៈពេល៦ខែឆ្នាំ២០២០នេះ មានបញ្ហាជំងឺកូវីដ-១៩ បានធ្វើឲ្យជនបរទេសមកកម្ពុជាមានការថយចុះ ហើយកម្ពុជាទទួលជនបរទេសជាង១លាននាក់ បើប្រៀបធៀបរយៈពេលដូចគ្នានេះឆ្នាំ២០១៩គឺទទួលបានជាង៣លាននាក់។
ឯកឧត្តមមានប្រសាសន៍ថា តាមប្រព័ន្ធព័ត៌មានវិទ្យា ដែលយើងបានបង្កើតឡើង ហើយយើងអនុញ្ញាត ឲ្យម្ចាស់គោលដៅ និងម្ចាស់ទីតាំង ឬម្ចាស់លំនៅដ្ឋាន ឬអ្នកកាន់កាប់លំនៅដ្ឋាន នៅក្នុងព្រះរាជណាចក្រកម្ពុជា ចុះវត្តមានជនបរទេសស្នាក់នៅលំនៅដ្ឋានរបស់ខ្លួន។ មកដល់ម៉ោងនេះ ទទួលបានជាង១៦ម៉ឺននាក់ ដែលបានចុះបញ្ជីនៅក្នុងប្រព័ន្ធយើង ប៉ុន្ដែប្រព័ន្ធក៏បានបញ្ជាក់ថា វត្តមានជាក់ស្ដែង ប្រហែលជាង១១ម៉ឺននាក់ប៉ុណ្ណោះ។
ឯកឧត្តមរៀបរាប់ថា ប្រព័ន្ធព័ត៌មានវិទ្យាកំពុងតែតាមដានបន្ដទៀត ចំពោះជនបរទេសស្នាក់នៅកម្ពុជា ដូច្នេះជនបរទេសអាច នឹងមានការកើនឡើងបន្ថែមទៀត ដោយសារតែអគ្គនាយកដ្ឋានអន្ដោប្រវរសន៍ បានប្រកាសដាក់ឲ្យប្រើប្រាស់កម្មវិធីប្រព័ន្ធព័ត៌មានវិទ្យានេះ។
ឯកឧត្តមសង្ឃឹមថា ការចុះបញ្ជីជនបទេសតាមប្រព័ន្ធព័ត៌មានវិទ្យា នឹងកាន់តែល្អបន្ថែមទៀត ព្រោះការងារនេះក៏ជាជំហានដំបូងនៅកម្ពុជា ហើយការងារនេះក៏បានជួបបញ្ហាមួយចំនួនផងដែរ។ ឯកឧត្តមក៏បានសូមណូពរ ដល់ម្ចាស់ទីតាំង ម្ចាស់លំនៅដ្ឋាន ម្ចាស់អគារ ជាដើម ត្រូវចូលរួមទាំងអស់គ្នាដើម្បីឲ្យទទួលបានការងារប្រកបដោយប្រសិទ្ធភាព តម្លាភាព ព្រោះការងារទាំងនេះក៏បានកំណត់ដោយច្បាប់ផងដែរ។
ឯកឧត្តម នាយឧត្តមសេនីយ៍ គៀត ច័ន្ទថារិទ្ធ បានលើកឡើងថា ប្រសិនបើមានម្ចាស់ទីតាំងណាមួយឲ្យជនបរទេសស្នាក់នៅ ហើយមិនសហការជាមួយសមត្ថកិច្ច នោះម្ចាស់ទីតាំងនឹងទទួលពិន័យតាមផ្លូវច្បាប់៕
ដោយ ៖ បញ្ញាស័ក្តិ
