ស្ត្រីចិត្តព្រៃផ្សៃម្នាក់ បាននិងកំពុងបង្ករលកកំហឹង និងថ្កោលទោសយ៉ាងខ្លាំងក្លា ពីសំណាក់បងប្អូនមហាជននៅក្នុងបណ្តាញសង្គម បន្ទាប់ពីស្ត្រីរូបនេះបានយកកាំបិតឆូតមុខក្មេងស្រីអាយុ ៥ ឆ្នាំ បណ្តាលឲ្យរងរបួសយ៉ាងធ្ងន់ធ្ងរគួរឲ្យអាសូរបំផុត ដើម្បីជាការសងសឹក ចំពោះក្មេងស្រីរងគ្រោះដែលបានចោទថា បានបង្ករបួសស្នាមបណ្តាលឲ្យកូនប្រុសតូចសំណព្វចិត្តរបស់ខ្លួនបែកក្បាលដេរ១ថ្នេរ ដែលខ្លួនចាត់ទុកដូចតារា។
ហេតុការណ៍ដ៏សាហាវឃោរឃៅនេះ បានកើតឡើងកាលពីថ្ងៃទី១៤ ខែកក្កដា ឆ្នាំ២០២០ ស្ថិតនៅក្នុងបុរីឈូកវ៉ា២ ផ្លូវលេខ២៦ ភូមិតិក្ខប្បញ្ញោ សង្កាត់សំរោងក្រោម ខណ្ឌពោធិ៍សែនជ័យ ។ ក្មេងស្រី រង គ្រោះ ឈ្មោះ លាស់ ម៉ូវីលីយ៉ា អាយុ៥ឆ្នាំ ។ ចំណែកស្ត្រីបង្កដែលជាអ្នកជិតខាងឈ្មោះ លីវ ប៊ុនធឿន អាយុ ៤៣ ឆ្នាំ មុខរបរមេផ្ទះ រស់នៅទីកន្លែងកើតហេតុខាងលើ។
បើតាមប្រភពពីគ្រួសារក្មេងស្រីរងគ្រោះបានឲ្យដឹងថា នៅថ្ងៃកើតហេតុទី១៤ ខែកក្កដា ឆ្នាំ២០២០ កូនប្រុសរបស់ស្ដ្រីបង្កអាយុ២ឆ្នាំ និងក្មេងផ្សេងៗដទៃទៀត បានលេងជុំគ្នា ហើយនៅពេលនោះ ក្មេងប្រុសជាកូនរបស់ស្ដ្រីបង្ក បានដេញគប់លេងទៅលើក្មេងស្រីរងគ្រោះ តែមិនត្រូវនោះទេ ហើយខណៈពេលនោះ ក្មេងស្រីរងគ្រោះ ក៏បានគប់ទៅវិញ បណ្ដាលឲ្យកូនប្រុសស្ដ្រីបង្កត្រូវរបួសបែកក្បាល ។ ក្រោយហេតុការណ៍បានកើតឡើង ម្ដាយកុមារីរងគ្រោះ ក៏នាំក្មេងប្រុសនោះទៅមន្ទីរពេទ្យដេរចំនួន១ថ្នេរ ដែលជាហេតុធ្វើឲ្យស្ដ្រីជាជនបង្កផ្តុះកំហឹងយ៉ាងខ្លាំង មានចិត្ដគុំគួនតាំងពីពេលនោះមក និងទីបំផុត ក៏បានធ្វើរឿងដ៏សាហាវព្រៃផ្សៃនេះទៅលើក្មេងស្រីរងគ្រោះតែម្តង។
ងាកមកស្តាប់ការរៀបរាប់ពីស្ត្រីបង្កវិញ នោះយើងគ្រប់គ្នាពិតជាមានការហួសចិត្តខ្លាំងណាស់ ដោយស្ត្រីរូបនេះបាននិយាយថា «កូនគាត់ បានធ្វើឲ្យកូនរបស់ខ្ញុំ ស្នាមហូរឈាមដូចគ្នា ខ្ញុំសុំស្នាមមួយដូចគ្នា ហើយកាំបិតហ្នឹង ខ្ញុំទើបតែទិញ ខ្ញុំខឹង ខ្ញុំដេកអត់លក់២យប់ហើយ ខ្ញុំខឹងណាស់ ព្រោះគ្មាននរណាមកសួរនាំទេ ចឹងខ្ញុំសុំសន្លាក់មួយម្នាក់ ។ កូនប្រុសខ្ញុំ ខ្ញុំថាធំឡើងគឺតារា មើលកូនខ្ញុំទៅ ខ្ញុំមិនអួតទេ កូនខ្ញុំ ស្រីតែមួយ ប្រុសតែមួយ ពូជអម្បូរខ្ញុំ ខ្ញុំមិនចង់អួតទេ តែខ្ញុំមិនចង់ធ្វើចឹងទេ មកពីគេ ទើបខ្ញុំទ្រាំពុំបាន…»។
ទោះយ៉ាងណា ការលើកឡើងរបស់ស្ត្រីរូបនេះ ដែលចងកំហឹងជាមួយក្មេងមិនទាន់ដឹងខុសត្រូវបែបនេះ បានធ្វើឲ្យមហាជនផ្ទុះកំហឹងយ៉ាងខ្លាំង។ ក្នុងនោះ គណនីហ្វេសប៊ុកឈ្មោះ Kea Long ដែលគាត់ត្រូវជាអ៊ំប្រុសកុមារីរងគ្រោះ បានបង្ហោះសារទាំងរំជួលចិត្តថា៖ «ហេតុអ្វីការសម្លាប់ ចងអាឃាត កើតឡើងមកលើក្រុមគ្រួសារខ្ញុំទៅវិញ ក្រុមគ្រួសារខ្ញុំមិនដែលទៅរករឿងអ្នកណាឡើយ ក្មេងវាលេងជាមួយគ្នា តែងតែមានរឿងឈ្លោះគ្នាវាជារឿងធម្មតារបស់ក្មេង តែយើងជាម៉ែពុកហើយ នៅជិតខាងនិងគ្នាទៀត ចាំបាច់ដល់ថ្នាក់យកក្មេងទៅសម្លាប់ តែជីវិតក្មួយខ្ញុំថ្លៃមិនស្លាប់ទេ អ៊ំជូនពរក្មួយស្រីអុំឆាប់ជាណា ថ្ងៃទី១៦ ខែកក្កដា ឆ្នាំ២០២០»៕ ដោយ៖ លឹម ហុង