ក្រោយពីបានដឹងថា ក្មេងស្រីរងគ្រោះត្រូវបានស្ត្រីម្នាក់ដែលមានចិត្តព្រៃផ្សៃជ្រុលហួសយកកាំបិតឆូតមុខបណ្តាលឲ្យរងរបួសធ្ងន់ធ្ងរ និងត្រូវបានបញ្ជូនទៅសង្គ្រោះបន្ទាន់មន្ទីរពេទ្យកុមារជាតិលោកឧកញ៉ា ដួងឆាយ និងភរិយា បានចុះទៅសួរសុខទុក្ខក្មួយស្រីរងគ្រោះផ្ទាល់នៅក្នុងមន្ទីរពេទ្យ ទាំងអារម្មណ៍ក្តុកក្តួលរំជួលចិត្តជាខ្លាំង។
ជាមួយនឹងទិដ្ឋភាពដ៏សង្វេកខ្លោចចិត្ត និងក្តីអាណិតអាសូរជាខ្លាំង ទៅដល់ក្មួយស្រីរងគ្រោះ លោកឧកញ្ញា និងភរិយា ក៏បានឧបត្ថម្ភលើកទឹកចិត្តដល់ឪពុកម្តាយក្មេងស្រីរងគ្រោះនូវថវិកាចំនួន ១ ពាន់ដុល្លារ ។ លើសពីនេះ លោកឧកញ្ញា ដួង ឆាយ ក៏បានសន្យាជួយចេញថ្លៃព្យាបាលទៅដល់ក្មេងស្រីរងគ្រោះ ដែលត្រូវដេររបួសជាង១០០ ថ្នេរ នៅឯប្រទេសថៃ ឬ កូរ៉េ ផងដែរ សម្រាប់ការអ៊ុតមុខឲ្យបានល្អប្រសើរឡើងវិញ បន្ទាប់របួសជាសះស្បើយ។
ក្នុងនោះដែរ បើយោងតាមគណនីហ្វេសប៊ុកលោកជំទាវ ម៉ាលីណា ភរិយាលោកឧកញ៉ា ឌួង ឆាយ បានសរសេរប្រាប់ទាំងក្តីរំជួលចិត្តថា៖ «នាងខ្ញុំ និងស្វាមី សន្យានឹងជួយក្មួយស្រីទៅមន្ទីរពេទ្យ ដើម្បីព្យាបាលអ៊ុតមុខនៅប្រទេសថៃ រឺ ប្រទេសកូរ៉េ នៅពេលជំងឺក្មួយបានជាសះស្បើយ និងស្ថានភាពជំងឺកូវិត-19 ប្រសើរឡើង។ កូនគេកូនយើង ថារង់ចាំស្អែកព្រឹកបានទៅសួរសុខទុក្ខក្មួយអោយក្មួយសំរាកសិន ប៉ុន្តែស្អែកព្រឹកមានធុរៈរវល់ទៅខេត្ត ខ្ញុំពិតជាអាណិតម្តាយក្មួយស្រីណាស់ មានផ្ទៃពោះពរពោះជិត ៨ខែ មកត្រូវឃើញកូនស្រីខ្លួនឯងបែបនេះជាពិសេសអាណិតក្មួយស្រី នៅតូចមិនដឹងអីត្រូវជួបរឿងអកុសល និងព្រៃ ផ្សៃបែបនេះ ផ្ទៃមុខត្រូវបានដេរអស់ជាង ១០០ថ្នេរ និងដៃអស់ជាង ២០ថ្នេរ។ នាងខ្ញុំមានត្រឹមការអាណិតអាសូរខ្លោចផ្សារក្នុងចិត្តជាទីបំផុត និងសួរសុខទុក្ខ លេីកទឹកចិត្តក្រុមគ្រួសារក្មួយស្រី និងជូនថវិកា 1,000$ សំរាប់ក្មួយជូនពរក្មួយឆាប់ជាសះស្បេីយ។ ពូមីងបងប្អូនអាចចូលរួមសួរសុខទុក្ខនៅមន្ទីរពេទ្យកុមារជាតិ និងអាចបរិច្ចាគជាថវិកាទៅកាន់គ្រួសារក្មួយស្រីផ្ទាល់តាមរយះ ABA 000830320 Nhang Vanny 017797322 »៕ ដោយ៖ លឹម ហុង
