ភ្នំពេញ៖ រឿងរ៉ាវស្ត្រីម្នាក់យកកាំបិតឆូតមុខក្មេងស្រីម្នាក់ បណ្តាលឲ្យរងរបួសធ្ងន់ធ្ងរ ត្រូវពេទ្យដេរជាង១០០ថ្នេរ ដែលជាទង្វើនៃការសងសឹកឲ្យកូនខ្លួនបែកក្បាលដេរត្រឹម១ថ្នេរ បានកំពុងបង្កជារឿងក្តៅគគុកជាមួយរលកកំហឹងយ៉ាងខ្លាំងពីសំណាក់មហាជននៅក្នុងបណ្តាញសង្គម។
ក្រោយពីបានប្រព្រឹត្តទង្វើដ៏សាហាវព្រៃផ្សៃខាងលើ ស្ត្រីរូបនេះដែលមានឈ្មោះថា លីវ ប៊ុនធឿន អាយុ ៤៣ ឆ្នាំ ត្រូវបានសមត្ថកិច្ចឃាត់ខ្លួន និងកំពុងកសាងសំណុំរឿងចាត់ការទៅតាមផ្លូវច្បាប់ បន្ទាប់ពីបង្កហិង្សាដ៏ព្រៃផ្សៃទៅលើក្មេងស្រីរងគ្រោះ ស្ថិតនៅក្នុងបុរីឈូកវ៉ា២ ផ្លូវលេខ២៦ ភូមិតិក្ខប្បញ្ញោ សង្កាត់សំរោងក្រោម ខណ្ឌពោធិ៍សែនជ័យ កាលពីរសៀលថ្ងៃទី១៦ ខែកក្កដា ឆ្នាំ២០២០ ម្សិលមិញនេះ។
យ៉ាងណាមិញ បន្ទាប់ពីបានហេតុការណ៍សាហាវព្រៃផ្សៃ និងអាណិតខ្លោចចិត្តខាងលើ តារាចម្រៀងស្រីដ៏មានប្រជាប្រិយភាពម្នាក់ គឺអ្នកនាង ឆៃ លីដាឡែន ហាក់មានការខឹងសម្បារ និងប្រតិកម្មដាក់យ៉ាងធ្ងន់ៗ ទៅទៅទង្វើរបស់ស្ត្រីរូបនេះយ៉ាងដូច្នេះថា៖ «អ៊ីកូនតារា ពូជខ្ញុំមិនអួតទេ កូនខ្ញុំធំឡើងធ្វើតារា អត់ទោសអ៊ីមានមើលមុខអ៊ីអត់? ហើយមានមើលភ្នែកអ៊ីអត់? គ្រាន់តែកូនអ៊ីបែកក្បាលដេរ2ថ្នេរហើយមានសួរអត់ថាមូលហេតុអីបានកូនអ៊ីបែកក្បាល? ក្មេងៗលេងមួយគ្នាតែងតែឈ្លោះគ្នាជាធម្មតាទេ ហេតុអីចាំបាច់ធ្វើសាហាវឃោរឃៅម៉េសអ៊ី អ៊ីអែងសំណាងហើយប៉ះកូនខ្ញុំអីខ្ញុំសូមឆូតមុខអ៊ីអែងវិញ បើមិនអ៊ីចឹងខ្ញុំសម្លាប់អ៊ីអែង ហើយខ្ញុំដើរចូលគុកខ្លួនអែង» ៕ ដោយ៖ លឹម ហុង