ខេត្តព្រះសីហនុ ៖ រដ្ឋបាលខេត្តព្រះសីហនុ បានប្រារព្ធបើកសន្និបាតបូកសរុបការងារឆ្នាំ 2017 និងលើកទិសដៅភារកិច្ចសម្រាប់ឆ្នាំ 2018 ដោយទទួលបានការអញ្ជើញចូលរួមជាអធិបតីនៅព្រឹកថ្ងៃទី31 ខែមករា ឆ្នាំ 2018 ដោយមានការចូលរួម ពីសំណាក់ឯកឧត្តមអភិបាល អភិបាលរង ខេត្តព្រះសីហនុ ក្រុមប្រឹក្សាខេត្តមន្ត្រីអនុប្រធានមន្ទីរអង្គភាពស្ថាប័នរដ្ឋក្នុងខេត្ត និងតំណាងអាជ្ញាធរ ក្រុង ស្រុក ក្នុងខេត្ត ព្រមទាំងសមាជិកសមាជិកាជាច្រើនទៀត។
ឯកឧត្តម យន្ត មីន អភិបាល នៃគណៈអភិបាលខេត្តព្រះសីហនុ មានប្រសាសន៍ក្នុងពិធីបើកសន្និបាតនេះ ដោយលើកឡើងពីការខិតខំប្រឹងប្រែង របស់មន្ត្រីរាជការគ្រប់ជាន់ថ្នាក់គ្រប់ស្ថាប័នអង្គភាពរួម និងប្រជាពលរដ្ឋផង ក្នុងការខិតខំបំពេញភារកិច្ចកសាង និង អភិវឌ្ឍន៍ប្រទេសជាតិក្នុងឆ្នាំ 2017 កន្លងមកដោយ បានអនុវត្តតាមកម្មវិធីនយោបាយ របស់រាជរដ្ឋាភិបាលនៃព្រះរាជាណាចក្រកម្ពុជា។
ឯកឧត្តមអភិបាល ខេត្តព្រះសីហនុ បានបន្តថានៅឆ្នាំ 2017 កន្លងទៅ មន្ត្រីរាជការកងកម្លាំង ប្រដាប់អាវុធ និងប្រជាពលរដ្ឋគ្រប់មូលដ្ឋានក្នុងខេត្តបានខិតខំបំពេញភារកិច្ច ដើម្បីប្រយោជន៍សង្គម និងជីវភាពរស់នៅទទួលបានផលវិជ្ជមានច្រើន។
លោកបន្តថា តាមរយៈកិច្ចខិតខំប្រឹងប្រែងនេះ ហេដ្ឋារចនាសម្ព័ន្ធមួយចំនួនក៏ត្រូវបានបដិសន្ធិឡើងបម្រើឲ្យវិស័យនានាក្នុងខេត្តមានដូចជា៖ ការស្ថាបនាផ្លវថ្នល់ ទាំងទីក្រុង ទីជនបទ ដើម្បីពង្រីកសោភ័ណ្ឌភាពទីក្រុង ក្នុងខេត្ត បំរើអោយវិស័យ ទេសចរណ៍ និងកសាងនូវមូលដ្ឋានគ្រឹះលើវិស័យកសិកម្មឧស្សាហកម្ម និងពាណិជ្ជកម្ម ជាដើម។
ឯកឧត្តម យន្ត មីន អភិបាលខេត្តព្រះសីហនុបានចាត់ទុកកិច្ចប្រជុំនេះថា ជាវេទិកាសំខាន់ក្នុងការពិភាក្សាផ្តល់យោបល់ជុំវិញការអនុវត្តនិងលទ្ធផលការងារ របស់ខេត្តព្រះសីហនុ កន្លងទៅ ដើម្បីកំណត់ទិសដៅថ្មី សម្រាប់ការបំពេញភារកិច្ចក្នុងឆ្នាំ 2018 នេះឲ្យមានប្រសិទ្ធភាព។
ជាមួយការលើកឡើង អំពីលទ្ធផលជាវិជ្ជមានឯកឧត្តមអភិបាលខេត្តព្រះសីហនុ បានលើកហេតុផល អវិជ្ជមានមួយចំនួន ដែលខេត្តធ្វើពុំទាន់បានសម្រេច ដើម្បីឱ្យផ្នែកពាក់ព័ន្ធចូលរួមពិភាក្សារិះរកបទពិសោធន៍ល្អៗ មកធ្វើជាសំអាងសម្រាប់អនុវត្តកម្មវិធីនយោបាយ របស់រាជរដ្ឋាភិបាលអោយទទួលបានជោគជ័យផងដែរ។ អង្គសន្និបាតនេះ ប្រព្រឹត្តទៅរយៈពេល ២ថ្ងៃ ចាប់ពីថ្ងៃទី៣១ ខែមករា ដល់ថ្ងៃទី០១ ខែកុម្ភៈ ឆ្នាំ២០១៨៕ ដែន សីមា