សត្វស្វាមួយក្បាល បានធ្វើឲ្យមនុស្សជាច្រើនសម្តែងនូវក្តីអាណិតអាសូរជាខ្លាំង ខណៈបានឃើញវាកំពុងត្រូវជាប់គាំង នៅក្នុងទឹកជំនន់ដែលកំពុងហូរគួចយ៉ាងខ្លាំង នៅក្នុងតំបន់ឧទ្យានភ្នំ Wuyi ក្នុងខេត្ត Fujian ភាគអាគ្នេយ៍ប្រទេសចិន។
យោងតាមសារព័ត៌មាន Daily Star បានឲ្យដឹងថា មនុស្សជាច្រើនដែលបានមើលវីដេអូនេះ នៅលើបណ្តាញសង្គម បានអំពាវនាវឱ្យជួយសង្គ្រោះសត្វស្វានេះជាបន្ទាន់ ព្រោះមើលទៅគួរឲ្យខ្លាច និងបារម្ភពីសុវត្ថិភាពណាស់ ដែលវាកំពុងប្រឈមនឹងគ្រោះថ្នាក់ នៅក្នុងទឹកជំនន់ដ៏ខ្លាំងក្លាបែបនេះ។
នៅក្នុងវីដេអូមួយដែលត្រូវបានចែករំលែកនៅលើបណ្តាញសង្គម Weibo សត្វស្វានេះត្រូវបានមើលឃើញ កំពុងឈរនៅលើក្តារឈើមួយ ហើយហាក់ដូចជាត្រូវបានជាប់គាំង នៅចំកណ្តាលទឹកជំនន់តែម្តង ដែលកំពុងទឹកហូរយ៉ាងខ្លាំង កាត់តាមផ្ទះ ខណៈពេលដែលស្វានោះស្ថិតក្នុងសភាពភ័យខ្លាច។ វីដេអូនេះត្រូវបានគេចែកចាយយ៉ាងទូលំទូលាយ ហើយមនុស្សជាច្រើនក៏ស្នើសុំឱ្យអាជ្ញាធរ ជួយសង្គ្រោះសត្វនេះ។
អ្នកមើលវីដេអូម្នាក់បានសរសេរថា «មើលចុះសត្វស្វានេះ ពិតជាកម្សត់ណាស់ សូមជួយសង្គ្រោះវាផង!»។ ម្នាក់ទៀតបានសរសេរថា៖ «មើលស្វានេះ វាកំពុងមានការភិតភ័យខ្លាំងណាស់ តើយើងអាចហៅអនុរក្សមកជួយបានទេ?»។
ទោះយ៉ាងណា អ្នកនាំពាក្យម្នាក់នៅក្នុងឧទ្យាននេះ បានប្រាប់ប្រព័ន្ធផ្សព្វផ្សាយក្នុងស្រុកថា សត្វស្វានេះពិតជាមិនជាប់គាំងនោះទេ។ មិនយូរប៉ុន្មានបន្ទាប់មក វានឹងឡើងទៅរកទីសុវត្ថិភាពវិញ ដោយខ្លួនឯងវាហើយ។
ចំណែកលោក Zhou នាយកឧទ្យានក៏បានបញ្ជាក់ប្រាប់តាមទូរស័ព្ទថា៖ «សត្វស្វានេះមិនជាប់គាំងទេ ម្នាក់ក្នុងចំណោមបុគ្គលិករបស់យើង បានជួយសង្គ្រោះវាហើយ»។
គួរបញ្ជាក់ផងដែរថា តំបន់ឧទ្យានភ្នំ Wuyi បានទទួលរងនូវទឹកជំនន់យ៉ាងខ្លាំង ក្នុងរយៈពេលប៉ុន្មានថ្ងៃថ្មីៗមកនេះ៕ ដោយ៖ លឹម ហុង