ក្រចេះ៖ សមាគមអ្នកស្រឡាញ់បរិស្ថាននិងសង្គមបានលើកឡើងថាការបាត់បង់ជីវិតរបស់លោកសែន សុទ្ធា ជាសកម្មជនព្រៃឡង់ដ៏ឆ្នើមមួយរូបរស់នៅភូមិអូរឡង់ឃុំសៀមបូកស្រុកសៀមបូកខេត្តស្ទឹងត្រែងដែលជាអ្នកសកម្មក្នុងការការពារធនធានធម្មជាតិព្រៃឡង់បានបាត់បង់ជីវិតនៅវេលាម៉ោងប្រហែល 12 យប់អធ្រាត្រថ្ងៃទី 16 ខែកក្កដាឆ្នាំ 2020 ដោយសារគ្រោះថ្នាក់ចរាចរណ៍ដួលម៉ូតូបន្ទាប់ពីបានចុះស៊ើបអង្កេត ពាក់ព័ន្ធប្រព្រឹត្តបទល្មើសព្រៃឈើនៅក្នុងតំបន់ព្រៃឡង់។
សមាគមក៏បានអំពាវនាវដល់អាជ្ញាធរមានសមត្ថកិច្ចធ្វើការស៊ើបអង្កេតយ៉ាងហ្មត់ចត់លើករណីនៃការបាត់បង់ជីវិតរបស់សកម្មជនព្រៃឈើរូបនេះព្រោះយល់ឃើញថាមានចំណុចសង្ស័យនិងមានភាពមិនប្រក្រតីជាច្រើន។
សកម្មជនព្រៃឈើរូបនេះត្រូវបានបាត់បង់ជីវិតដោយគ្រោះថ្នាក់ចរាចរណ៍ក្នុងអំឡុងពេលចុះល្បាត ខណៈពេលលោកកំពុងចុះស៊ើបអង្កេតការកាប់បំផ្លាញព្រៃឈើខុសច្បាប់នៅក្នុងតំបន់ព្រៃឡង់។
ពាក់ព័ន្ធករណីខាងលើនេះដែរ កាលពីថ្ងៃទី ១៨ខែកក្កដាឆ្នាំ ២០២០ស្នងការដ្ឋាននគរបាលខេត្តក្រចេះពិនិត្យឃើញថា ថ្មីៗនេះមានការផ្សព្វផ្សាយព័ត៌មានដែលមានចរិតញុះញង់ ដែលគ្មានមូលដ្ឋាន និងការស្រាវជ្រាវ ស៊ើបបញ្ជាក់ឲ្យបានច្បាស់លាស់ពាក់ព័ន្ធនឹងការស្លាប់របស់ឈ្មោះ សែន សុទ្ធា។ ជាក់ស្តែង កាលពីថ្ងៃទី១៦ ខែកក្កដា ឆ្នាំ២០២០ តាមរយៈ សេចក្តីថ្លែងការណ៍លេខ:០០៣អបស របស់ សមាគមអ្នកស្រលាញ់បរិស្ថាន និងសង្គម បានធ្វើការវាយតម្លៃ និងសន្និដ្នានលើការស្លាប់របស់ឈ្មោះ សែន សុទ្ធា នាំឲ្យមានការភាន់ច្រឡំពីស្ថានភាពពិតប្រាកដ នៃការស្លាប់។
ស្នងការដ្ឋាននគរបាលខេត្តក្រចេះបានបញ្ជាក់ថា កាលពីថ្ងៃទី១៦ ខែកក្កដា ឆ្នាំ២០២០ មានករណីគ្រោះថ្នាក់ចរាចរណ៍បង្កឡើងនៅចំណុចការភ្លុក ភូមិអាជេន ឃុំកំពង់ចាម ស្រុកសំបូរ ខេត្តក្រចេះ បណ្តាលឲ្យឈ្មោះ សែន សុទ្ធា បានស្លាប់មុនពេលបញ្ជូនទៅសង្គ្រោះនៅមណ្ឌលសុខភាព។
ដោយសារទីតាំងកន្លែងកើតហេតុស្ថិតក្នុងព្រៃជ្រៅ ដាច់ស្រយាល និងដោយពុំទទួលបានព័ត៌មានពីកន្លែងកើតហេតុ ពិសេសអ្នករួមដំណើរជាមួយជនរងគ្រោះ ទើបថ្ងៃទី១៧ ខែកក្កដាឆ្នាំ២០២០ សមត្ថកិច្ចជំនាញនៃស្នងការដ្ឋាននគរបាលខេត្តក្រចេះទទួលបានដំណឹង និងចុះអនុវត្តជំនាញដោយបានពិនិត្យកន្លែងកើតហេតុ និងប្រមូលព័ត៌មាន។
តាមការបំភ្លឺរបស់សាក្សី÷ ម្ចាស់ផ្ទះឈ្មោះ ម៉ាណ ថុល បញ្ជាក់ថា ឈ្មោះ សែន សុទ្ធា និងមិត្តភ័ក្តិគាត់ម្នាក់ឈ្មោះ ហេង ស្រស់ រួមជាមួយអ្នកភូមិ០២នាក់ទៀត បានទិញស្រាបៀមកហូបពីម៉ោងប្រមាណជា ៩:៣០នាទីយប់ រហូតដល់ជាង១០ទើបបែកគ្នារៀងខ្លួន ដោយឈ្មោះ សែន សុទ្ធា ជាអ្នកបើកបរម៉ូតូ និងឈ្មោះ ហេង ស្រស់ ជិះពីក្រោយ ។
តាមការបំភ្លឺរបស់ឈ្មោះ ណាំ ណាក់ (អ្នកភូមិអាជេន) ដែលបានដឹកជនរងគ្រោះទៅសង្គ្រោះនៅមណ្ឌលសុខភាពបានឲ្យដឹងថា នៅវេលាម៉ោងប្រហែល២២:៣០នាទីយប់ មានបុរស០៣នាក់ ក្នុងនោះមានអ្នករបួសធ្ងន់ម្នាក់បានសុំឲ្យគាត់ជួយដឹកអ្នករបួសទៅសង្គ្រោះនៅមណ្ឌលសុខភាពស្រុកសំបូរ គាត់ក៏បានយល់ព្រម ។
គ្រូពេទ្យឈ្មោះ ផាត់ តុលា ប្រធានមណ្ឌលសុខភាពសំបូរ និងជាអ្នកពិនិត្យសាកសព បញ្ជាក់ថា ជនរងគ្រោះបានស្លាប់មុនមកដល់មណ្ឌលសុខភាព ដោយមានរបួសត្រង់ចំណុចចង្កា មានឈាមហូរតាមមាត់ និងហើមពោះ ក្រៅពីនោះពុំឃើញមានស្លាកស្នាមអ្វីផ្សេងទៀតនោះទេ។ បន្ទាប់ពីពិនិត្យរួច សាកសពត្រូវបានមិត្តភក្តិជួលឡានពេទ្យដឹកទៅលំនៅដ្ឋានជនរងគ្រោះនៅចំណុចអូឡង់ ស្រុកសៀមបូក ខេត្តស្ទឹងត្រែង។
តាមការបំភ្លឺតាមទូស័ព្ទរបស់ឈ្មោះ ហេង ស្រស់ អ្នករួមដំណើរជាមួយជនរងគ្រោះបញ្ជាក់ថា ឈ្មោះ សែន សុទ្ធា បានបើកបរម៉ូតូក្នុងស្ថានភាពស្រវឹងមកដល់ចំណុចកើតហេតុបានធ្លាក់ជង្ហុកដួលបណ្តាលឲ្យឈ្មោះ សែន សុទ្ធា រងរបួសធ្ងន់ធ្ងរ។ ស្របពេលនោះ ខ្ញុំ (ហេង ស្រស់) បានឃើញអ្នកភូមិដើរឆ្លុះកង្កែប ក៏បានស្រែកហៅឲ្យជួយនាំយកជនរងគ្រោះទៅដល់ផ្ទះឈ្មោះ ណាំ ណាក់ ដើម្បីឲ្យជួយដឹកទៅសង្គ្រោះនៅមណ្ឌលសុខភាព។
នគរបាលបានសន្និដ្ឋានថា ក្រោយពីបានពិនិត្យកន្លែងកើតហេតុ ប្រមូលព័ត៌មានពីសាក្សីពាក់ព័ន្ធ កម្លាំងជំនាញសន្និដ្ឋានបានថាឈ្មោះ សែន សុទ្ធា បានស្លាប់ដោយគ្រោះថ្នាក់ចរាចរណ៍បង្កឡើងដោយខ្លួនឯងពិតប្រាកដមែន។
ស្នងការខេត្តក្រចេះ សូមចាត់ទុកថា ការសន្និដ្ឋាន និងវាយតម្លៃនៃសេចក្តីថ្លែងការណ៍ទាំងនោះ គឺពុំមានមូលដ្ឋាន និងភស្តុតាងច្បាស់លាស់ដែលអាចធ្វើឲ្យមានការយល់ច្រឡំពីសាធារណជនមកលើកងកម្លាំងសមត្ថកិច្ចនៃស្នងការដ្ឋាននគរបាលខេត្តក្រចេះ ដែលតែងតែយកចិត្តទុកដាក់អនុវត្តភារកិច្ចការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម និងអនុវត្តគោលនយោបាយភូមិ-ឃុំមានសុវត្ថិភាព ពិសេបានសហការយ៉ាងយកចិត្តទុកខ្ពស់ចំពោះសំណូមពរនានារបស់សកម្មជនបរិស្ថាន និងសង្គមនៅក្នុងដែនសមត្ថកិច្ចរបស់ខ្លួន។
៥.ទន្ទឹមនេះ សូមធ្វើការបដិសេធលើខ្លឹមសាររបស់គណនីហ្វេសប៊ុកឈ្មោះ ឈឿន ដារ៉ាវី ដែលថា : យោងតាមសម្ដីសកម្មជនព្រៃឈើដែលដើរជាមួយគាត់ មិនមែនគ្រោះថ្នាក់ចរាចរណ៍ធម្មតាទេ គឺដោយសារគាត់ជិះរត់គេចពីការដេញបាញ់មិនឲ្យគាត់ចូលការពារព្រៃឡង់បន្តទៀត…។ នេះគឺជាការសន្និដ្ឋានវាយតម្លៃទម្លាក់កំហុសមកលើអាជ្ញាធរមូលដ្ឋានដោយចេតនាទុច្ចរិត។
ស្នងការដ្ឋាននគរបាលខេត្តក្រចេះ សូមអំពាវនាវដល់សមាគមអ្នកស្រលាញ់បរិស្ថាន និងសង្គម សារធារណជន ពិសេសបណ្តាញសង្គម សូមធ្វើការប្រមូលព័ត៌មានឲ្យបានគ្រប់ជ្រុងជ្រោយ មុនធ្វើការសន្និដ្ឋាន វាយតម្លៃសភាពការណ៍ ឬរឿងរ៉ាវទាំងឡាយដែលកើតឡើង ពិសេសពាក់ព័ន្ធនឹងការអនុវត្តភារកិច្ចរបស់សមត្ថកិច្ច ដើម្បីចៀសវាងការសន្និដ្ឋាន និងវាយតម្លៃនោះមានឥទ្ធិពលប៉ះពាល់ដល់កិត្តិយស និងសេចក្តីថ្លៃថ្នូររបស់មន្ត្រី និងស្ថាប័នអនុវត្តច្បាប់។ ទន្ទឹមនេះ សមត្ថកិច្ចនឹងចាត់វិធានការផ្លូវច្បាប់យ៉ាងម៉ឺងម៉ាត់ជាទីបំផុតចំពោះជនដែលផ្សព្វផ្យាយព័ត៌មានមិនពិតមានចរិតញុះញង់ វិទ្ធ័ង្សនា បង្កឲ្យមានចលាចលដល់សន្តិសុខជាតិ និងសណ្តាប់ធ្នាប់សង្គម៕ ដោយ៖កូឡាប
