សៀមរាប ៖ ខណៈដែលខេត្តសៀមរាប ជាខេត្តមានសក្តានុពលផ្នែកទេសចរណ៍យ៉ាងខ្លាំងនោះ សម្តេចពិជ័យសេនា ទៀ បាញ់ បានណែនាំដល់មន្ត្រីរាជការ និយជិត និងកម្មករ ក្នុងឱកាសឈប់សម្រាកសងពេលចូលឆ្នាំរយៈពេល៥ថ្ងៃ នាខែសីហាខាងមុខនេះ ។ ដូចនេះខេត្តនិងអាជីវករ ដែលជាម្ចាស់សណ្ឋាគារ ផ្ទះសំណាក់ និងភោជនីយដ្ឋាន ត្រៀមទទួលភ្ញៀវទេសចរជាតិ ទោះបីស្ថានភាពភ្ញៀវទេសចរអន្តរជាតិ ពុំទាន់មានការកើនឡើងក៏ដោយ តែទោះជាយ៉ាងណាត្រូវប្រកាន់ភ្ជាប់ នូវគោលការណ៍ណែនាំរបស់ក្រសួងសុខាភិបាល ដើម្បីចូលរួមទប់ស្កាត់ជំងឺកូវីដ-១៩។
សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តសៀមរាប បានថ្លែងបែបនេះក្នុងកិច្ចប្រជុំក្រុមការងាររាជរដ្ឋាភិបាល ចុះមូលដ្ឋានខេត្តសៀមរាប បានប្រជុំបូកសរុបលទ្ធផលការងារប្រចាំឆមាសទី១និងទិសដៅអនុវត្ត បន្តឆមាសទី២ឆ្នាំ២០២០ នៅបន្ទប់ប្រជុំសាលាខេត្តសៀមរាប នាចុងសប្តាហ៍ថ្ងៃអាទិត្យទី ១៩ ខែ កក្កដា ឆ្នាំ២០២០នេះ។
ឯកឧត្តម ទៀ សីហា អភិបាលខេត្តសៀមរាប បានធ្វើសេចក្តីរាយការណ៍ អំពីសមិទ្ធផលរបស់រដ្ឋបាលខេត្ត និងសកម្មភាពរបស់ក្រុមការងាររាជរដ្ឋាភិបាល ចុះមូលដ្ឋានខេត្តសៀមរាបប្រចាំឆមាសទី១ឆ្នាំ២០២០ ដោយបានបញ្ជាក់ថា ក្នុងឆមាសទី១ ឆ្នាំ២០២០ រដ្ឋបាលមូលដ្ឋានគ្រប់លំដាប់ថ្នាក់ រក្សានូវសន្តិសុខសណ្តាប់ធ្នាប់ ការងារសេដ្ឋកិច្ចសង្គម ដោះស្រាយបញ្ហានៅតាមវេទិការបានរលូននិងចំបញ្ហាទៀតផង ។
រដ្ឋបាលខេត្តបានគ្រប់គ្រងស្ថានភាពនៃជំងឺកូវីដ១៩ បានល្អតាមការណែនាំរបស់រាជរដ្ឋាភិបាល និង ក្រសួងសុខាភិបាល និង បន្តរឹតបន្តឹងពិនិត្យតាមដានជាប្រចាំ ប្រជាពលរដ្ឋមកពីក្រៅប្រទេស និង យកចិត្តទុកដាក់ប្រកបដោយស្មារតីទទួលខុសត្រូវខ្ពស់ និង អនុវត្តបទបញ្ជាសេចក្តីណែនាំ និង ផែនការសកម្មភាពរបស់រាជរដ្ឋាភិបាល ដោយមានកិច្ចសហការជាប្រចាំរវាងក្រុមការងាររាជរដ្ឋាភិបាលចុះមូលដ្ឋានក្រុង ស្រុក ជាមួយរដ្ឋបាលមូលដ្ឋាន និង សមត្ថកិច្ចពាក់ព័ន្ធក្នុងរៀបចំវេទិកាសាធារណៈ ព្រមទាំងដោះស្រាយបានទាន់ពេលវេលា នូវរាល់ទុក្ខកង្វល់របស់ប្រជាពលរដ្ឋ ស្របតាមគោលដៅផែនការដាក់ចេញក្នុងឆ្នាំ២០១៩កន្លងមក ។ ក្នុងនោះឯកឧត្តមអភិបាលខេត្ត ក៏បានលើកផងដែរ ។ នៅថ្ងៃឈប់សម្រាកសងពេលចូលឆ្នាំនោះ នឹងមានរៀបចំធ្វើនូវ កម្មវិធីនៅខេត្តសៀមរាប ទៅតាមបែបសាសនា និង កីឡា ដោយមានកិច្ចសហការជាមួយក្រសួងសុខាភិបាល និង ក្រសួងទេសចរណ៍ ដែលមានរយៈពេល២ថ្ងៃក្នុងគោលដៅទាក់ទាញដល់ភ្ញៀវទេសចរជាតិ អន្តរជាតិចូលមកទស្សនាកម្សាន្ត ។
សម្តេចពិជ័យសេនាទៀ បាញ់ បានលើកឡើងថា នៅខែសីហាខាងមុខនេះ រាជរដ្ឋាភិបាលបានអនុញ្ញាតឲ្យមន្ត្រីរាជការ និយជិតនិងកម្មករឈប់សម្រាករយៈពេល៥ថ្ងៃ ដូចនេះខេត្តនិងអាជីវករដែលជាម្ចាស់សណ្ឋាគារ ផ្ទះសំណាក់ និងភោជនីយដ្ឋានត្រៀមទទួលភ្ញៀវទេសរជាតិ ទោះបីស្ថានភាពភ្ញៀវទេសចរអន្តរជាតិពុំទាន់មានការកើនឡើងក៏ដោយតែទោះជាយ៉ាងណាត្រូវប្រកាន់ភ្ជាប់នូវគោលការណ៍ណែនាំរបស់ក្រសួងសុខាភិបាល ដើម្បីចូលរួមទប់ស្កាត់ជំងឺកូវីដ-១៩។ ជាមួយគ្នានេះសម្តេចក៏បានណែនាំដល់អាជ្ញាធរស្រុកវ៉ារិន ស្រុកស្វាយលើដែលមានបញ្ហាព្រំប្រទល់រដ្ឋបាលត្រូវធ្វើការដោះស្រាយជាមួយស្រុកនិងស្រុកសិន ប៉ុន្តែប្រសិនជាការដោះស្រាយនេះ ពុំបានលទ្ធផលយ៉ាងណានោះក្រសួងមហាផ្ទៃនឹងចុះមកដោះស្រាយដើម្បីបញ្ចប់បញ្ហា។ ម្យ៉ាងទៀត ចំពោះប្រព័ន្ធធារាសាស្ត្រនិងសំណង់ទ្វារទឹកនៅតំបន់ភ្នំគូលែន ក្រសួងធនធានទឹកនិងឧតុនិយមពិនិត្យលទ្ធភាព និងលើកចូលក្នុងផែនការឆ្នាំ២០២១របស់ក្រសួងដើម្បីធ្វើការទប់ទឹកសម្រាប់ប្រជាពលរដ្ឋប្រើប្រាស់ និងអាស្រ័យផលក្នុងរដូវប្រាំង។ មួយវិញទៀតស្នើដល់អាជ្ញាធរគ្រប់លំដាប់ថ្នាក់ទាំងអស់ ត្រូវតែបន្តការទប់ស្កាត់នូវការរាប់ព្រៃ និងទន្ទ្រានដីព្រៃវាតធ្វើជាកម្មសិទ្ធិ។
ដោយឡែកចំពោះការធ្វើអត្តសញ្ញាណប្រជាជនក្រីក្រ និងការផ្តល់សាច់ប្រាក់ដល់ប្រជាពលរដ្ឋក្រីក្រត្រូវធ្វើឱ្យមានតម្លាភាពនិងចំគោលដៅជៀសវាងមានការថ្នាំងថ្នាក់គ្នារវាងប្រជាពលរដ្ឋនិងអាជ្ញាធរមូលដ្ឋាន។
បើតាមប្រសាសន៍របស់សម្តេចទៀ បាញ់៖ ចំពោះអាជ្ញាធរក្រុងដែលបានលើកពីបញ្ហាការវិនិយោគរោងចក្រកែច្នៃសំរាមនេះ គឺចំណុចវិជ្ជមានថ្មីមួយទៀត ដែលអាចលើកកម្ពស់អនាម័យបរិស្ថាន និងសោភ័ណភាពក្រុងឱ្យកាន់តែប្រសើរឡើងថែមមួយកម្រិតទៀត។
សម្តេចបានសង្កត់ធ្ងន់ថា” ចំពោះស្ថានភាពជំងឺកូវីដ-១៩នៅក្នុងខេត្តសៀមរាប គឺមានស្ថានភាពល្អដោយអាជ្ញាធរគ្រប់លំដាប់ថ្នាក់បានសហការគ្នាក្នុងការទប់ស្កាត់ និងតាមដានជាប្រចាំ ពិសេសបានធ្វើចត្តាឡីស័កដល់បងប្អូនប្រជាពលរដ្ឋដែលវិលត្រឡប់មកពីក្រៅប្រទេស។ មួយវិញទៀត សម្តេចក៏បានបន្ថែមថា បញ្ហាកូវីដ-១៩នេះក៏ពុំទាន់មានការឆ្លងជាសហគមន៍ និងនរណាម្នាក់បានស្លាប់នោះទេ តែគឺជាការនាំចូលតែប៉ុណ្ណោះទោះជាបែបនេះក្តីយើងក៏ត្រូវបង្កើននូវការប្រុងប្រយ័ត្នដដែល ជៀសវាងការឆ្លងជំងឺកូវីដ-១៩ដោយប្រការណាមួយ”៕ ដោយ៖កូឡាប
