ភ្នំពេញ៖ នាយកដ្ឋានប្រឆាំងបទល្មើសបច្ចេកវិទ្យា Anti Cyber Crime Department នៅថ្ងៃទី២០ ខែកក្កដា ឆ្នាំ២០២០ បានឲ្យដឹងថា ជនខិលខូចបានកំពុងស្វែងរកវិធីថ្មីៗ ដើម្បីលួចយកទិន្នន័យពីទូរស័ព្ទ ហើយជាមួយមេរោគ Android malware ថ្មីនេះពួកគេអាចជ្រៀតចូលកម្មវិធីចំនួនប្រមាណ ៣៣៧។
កាលពីពេលថ្មីៗនេះ ក្រុមអ្នកស្រាវជ្រាវបានរកឃើញមេរោគ Android malware ដែលគេឱ្យឈ្មោះថា BlackRock។
មេរោគនេះមិនមែនជាមេរោគថ្មីសន្លាងនោះទេ វាជាប្រភេទមេរោគដែលត្រូវបានកែសម្រួលពីមេរោគចាស់ (Xerxes malware) ប៉ុន្តែអ្វីដែលគេមានការព្រួយបារម្ភនោះ គឺមេរោគនេះអាចលួចយកទិន្នន័យបានទាំងឈ្មោះ និងលេខសម្ងាត់។ លើសពីនេះទៀត វាក៏អាចប្រាប់អ្នកប្រើប្រាស់ ឱ្យវាយបញ្ជូលលេខគណនីបានថែមទៀតផង ប្រសិនបើកម្មវិធីនោះតម្រូវឱ្យមានការបង់លុយនោះ។
ដើម្បីលួចយកទិន្នន័យ ជនខិលខូចបានប្រើបច្ចេកទេស “overlay ឬ ត្រួតស៊ីគ្នា” ដែលតាមដានអ្នកប្រើប្រាស់ នៅពេលដែលពួកគេបើកកម្មវិធីណាមួយ ពេលនោះជនខិលខូចនឹងបន្ថែមស្គ្រីនក្លែងក្លាយនៅពីលើ ដើម្បីទាញយកទិន្នន័យសំខាន់ៗ មុនពេលអ្នកប្រើប្រាស់ចូលទៅក្នុងកម្មវិធីមែនទែន។
BlackRock មិនត្រឹមតែអាចលួចទិន្នន័យពីកម្មវិធីទាក់ទងទៅនឹងប្រព័ន្ធហិរញ្ញវត្ថុ កម្មវិធីបណ្ដាញសង្គម និងកម្មវិធីទំនាក់ទំនងដទៃទៀតតែប៉ុណ្ណោះទេ វាថែមទាំងអាចធ្វើការលួចទិន្នន័យពីកម្មវិធីណាត់ជួប កម្មវិធីព័ត៌មាន កម្មវិធីទិញទំនិញអនឡាញ កម្មវិធីទាក់ទងនឹងការរស់នៅប្រចាំថ្ងៃបានផងដែរ។ លើសពីនេះទៅទៀត កម្មវិធីមេរោគនេះក៏អាចធ្វើការលួចយកទិន្នន័យក្នុងពេលផ្ញើសារ និងក្នុងពេលវាយឯកសារ (keylogger) ផងដែរ។
បច្ចុប្បន្នមេរោគនេះ ត្រូវបានគេរកឃើញនៅតាមវេបសាយមួយចំនួនដែលបន្លំធ្វើជា កម្មវិធីសម្រាប់ធ្វើបច្ចុប្បន្នភាពកម្មវិធី Google ក៏ប៉ុន្តែវាមិនទាន់មាននៅលើ Play Store នៅឡើយទេ។ ហេតុដូច្នេះហើយសូមលោកអ្នក ធ្វើការទាញយកតែកម្មវិធីណាដែលមាននៅលើ Play Store ត្រឹមត្រូវ និងកុំទាញយកកម្មវិធីផ្សេងៗតាមរយៈវេបសាយ ព្រោះវាអាចភ្ជាប់មកជាមួយមេរោគផងដែរ៕ដោយ៖បញ្ញាស័ក្តិ
