ភ្នំពេញ៖ អភិបាលខេត្តកំពង់ស្ពឺ លោក វ៉ី សំណាង ថ្លែងថា សក្តានុពលទំនិញនៅក្នុងខេត្តមានចំនួន ១០ មុខ ដូចជា ស្ករត្នោត ស្ករអំពៅ បន្លែ សាច់មាន់ សាច់ជ្រូក ស្រូវអង្ករ ស្វាយកែវមៀត ខ្សាច់សំណង់ និង ថ្មសំណង់។ ក្នុងនោះ កំពង់ស្ពឺ មានក្រុមហ៊ុន សហគ្រាសចំនួន ៧៤៥ ក្នុងនោះ មានក្រុមហ៊ុនចំនួន ៣៤៩ ។ សាខាក្រុមហ៊ុនចំនួន ១៤២ និងសហគ្រាសចំនួន ២៥៤ មានផ្សារចំនួន ២០កន្លែង និងផ្សារសហគមន៍ ៥កន្លែង។
លោក អភិបាលខេត្តថា កំពង់ស្ពឺក៏មានសមាគមអាជីវកម្មចំនួន៣ ត្រូវបានបង្កើតផងដែរ ដូចជា សមាគមលើកកម្ពស់ស្ករត្នោតកំពង់ស្ពឺ (បាននាំទៅ ១០ប្រទេស ក្នុងសហគមន៍អឺរ៉ុប ដែលមានបរិមាណពី ១៥០-២៧០ តោន/ឆ្នាំ និងមួយចំនួនទៀតលក់នៅក្នុងស្រុក)។
លោកថា សមាគមម៉ាស៊ីនកិនស្រូវកំពង់ស្ពឺ តាមរយៈសមាគមនេះ បានចុះតាមដានស្តុកស្រូវ និងស្តុកអង្ករតាមរោងម៉ាស៊ីនកិនស្រូវសំខាន់ៗ ចំនួន ២៣កន្លែងក្នុងខេត្ត ជារួមស្តុកជាអចិន្ត្រៃយ៍ គឺ ស្តុកអង្ករ មានបរិមាណប្រហែលជា ៩៥.០០០ តោន ស្តុកស្រូវ មានបរិមាណប្រហែលជា ៦៥.០០០ តោន, សមាគមស្វាយកំពង់ស្ពឺ ដែលបានដាំ ៦២.៦៣៥ ហិកតា បរិមាណផលក្នុងមួយឆ្នាំប្រមាណ ៥៣៦.៦៤៥ តោន ហើយបាននាំចេញទៅប្រទេសវៀតណាម ថៃ នៅក្នុងតំបន់ ព្រមទាំងបាននាំចេញទៅអារ៉ាប់រួមមួយចំនួនផងដែរ។
លោកបន្តថា កន្លងទៅ ផលិតផលស្វាយមានហាងឆេងកាន់តែប្រសើរឡើង តាមរយៈយន្តការចុះហត្ថលេខាលើពិធីសារផ្លូវការនាំចេញស្វាយស្រស់ទៅប្រទេសចិនដោយផ្ទាល់ រវាងរាជរដ្ឋាភិបាលកម្ពុជា ឯកឧត្តម វេង សាខុន រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ និងលោក Wang Wentian ឯកអគ្គរដ្ឋទូតសាធារណរដ្ឋប្រជាមានិត្យចិនប្រចាំនៅកម្ពុជា នៅទីស្តីការក្រសួងកសិកម្ម កាលពីថ្ងៃទី៩ ខែមិថុនា ឆ្នាំ២០២០ កន្លងទៅនេះ។ បច្ចុប្បន្ន មានរោងចក្រកែច្នៃស្វាយធំៗ និង សិប្បកម្មតូចមានចំនួន៤០ អ្នកប្រមូលទិញមាន ១៧ កន្លែង តម្លៃស្វាយកែវរមៀតកើនឡើង ឬ ធ្លាក់ចុះទៅតាមរដូវកាលមានដូចជា ៖ ស្វាយខៀវ ៖ ពីខែ ៩ ដល់ខែ១២ មួយគីឡូតម្លៃ ៩០០-១.៥០០ រៀ ពីខែ ១ ដល់ខែ៤មួយគីឡូតម្លៃ ៥០០-៩០០ រៀល ស្វាយស្រោម ៖ ពីខែ ៩ ដល់ខែ១២មួយគីឡូតម្លៃ ១.២០០-២.០០០ រៀល ពីខែ ១ ដល់ខែ៤មួយគីឡូតម្លៃ ៩០០- ១.២០០ រៀល។
លោកសំណាងបញ្ជាក់ថា៖«ដើម្បីបង្កើនវិបុលភាពដល់ក្រុមគោលដៅ អ្នកទទួលផលផ្ទាល់ជាគ្រួសារកសិករ ដែលធ្វើកសិកម្ម ខ្នាតតូច និង គោលដៅផ្សេងទៀតក្នុងខ្សែច្រវ៉ាក់តម្លៃជាក្រុមផលិត សហគមន៍កសិកម្ម សហគ្រាសធុនតូច និងមធ្យម (SMES) សហគ្រាសកសិ-ពាណិជ្ជកម្ម សហគ្រាសសេវាកម្ម និងសហគមន៍ឧស្សាហកម្ម សកម្មភាពរបស់គម្រោង (AIMS) បានដំណើរការក្នុងស្រុកចំនួន៧នៃខេត្តកំពង់ស្ពឺ រួមមាន ស្រុកបសេដ្ឋ គងពិសី ភ្នំស្រួច ឧដុង្គ ថ្ពង សំរោងទង និងស្រុកឱរ៉ាល់ គម្រោងបានគ្រប់ដណ្តប់ចំនួន ៣៨ឃុំ ស្មើនឹង១៤១ភូមិ»។
គិតត្រឹមឆ្នាំ២០២០នេះ ការរចុះឈ្មោះបង្កើតក្រុមបានចំនួន ៥៤ក្រុម ស្មើនឹង ៣៤ ចង្កោម ដែលមានសមាជិកសរុបចំនួន ១.៩៥៧ នាក់ និងបានចុះកិច្ចសន្យាទិញ-លក់ រវាងក្រុមផលិត និងអ្នកប្រមូលទិញបានចំនួន ៦ កិច្ចសន្យា មានដូចជា ក្រុមផលិតបន្លែចំនួន ៣ ក្រុមផលិតមាន់ស្រែចំនួន ២ និងក្រុមផលិតស្រូវចំនួន១។ ជាមួយគ្នានេះដែរ ខេត្តក៏តម្រូវឱ្យមានការរៀបចំផ្សារចុងសប្តាហ៍ផងដែរ ដើម្បីបង្កើតទំនុកចិត្តដល់កសិករ៕ដោយ៖CEN
