ភ្នំពេញ៖ ប្រិយមិត្ដទទួលជ្រាបរួចមកហើយ ដែលកាលថ្ងៃទី១៨ ខែកក្កដា ឆ្នាំ២០២០ មានករណីអគ្គិភ័យឆេះផ្ទះលក់ហ្គាសយ៉ាងសន្ធោសន្ធៅ នៅតាមបណ្ដាយផ្លូវលេខ៦៣ សង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ ដែលបណ្ដាលធ្វើឲ្យមនុស្សចំនួន ៤នាក់ ស្លាប់បាត់បង់ជីវិត (ក្នុងនោះមានកូនប្រុសស្រីម្ចាស់ផ្ទះ២នាក់) និង៥នាក់ទៀត (ក្នុងនោះមានទាំងម្ចាស់ផ្ទះ និងកម្មករ) ទទួលរងរបួសធ្ងន់ស្រាល។
យ៉ាងណាមិញ សម្រាប់ប្រតិបត្តិការជួយសង្គ្រោះវិញ ឃើញថាគួរឲ្យកោតសរសើរជាខ្លាំង ចំពោះកម្លាំងពន្លត់អគ្គិភ័យ និងឡានពេទ្យ ដែលបានខិតខំយ៉ាងសស្រាក់សស្រាំ ក្នុងការជួយសង្គ្រោះ និងពន្ធត់ ដោយពុំគិតពីគ្រោះថ្នាក់នោះឡើយ។ ប៉ុន្តែ ទោះយ៉ាងណា ក្នុងនោះ គេបានរិះគន់ទៅលើចំណុចអវិជ្ជមានមួយ គឺត្រង់ថាឡានពេទ្យបែរជាគ្មានអុកស៊ីហ្សែនភ្ជាប់មកជាមួយ នៅក្នុងអំឡុងនៃប្រតិបត្តិការជួយសង្គ្រោះដ៏ប្រឈមនឹងគ្រោះថ្នាក់បំផុតនេះ។
ការរិះគន់នេះបានកើតឡើង គឺខណៈពេលបុរសម្នាក់ដែលត្រូវបានចាត់ទុកថាជាវីរៈបុរស ដែលបានប្រថុយជីវិតទៅរុករកក្មេងស្រីកូនម្ចាស់ផ្ទះ ដែលជាប់គាំងនៅក្នុងបន្ទប់ឡៅតឿ និងបីចុះមករត់រកឡានពេទ្យទាំងត្រដាបត្រដួសបំផុត ខណៈដែលគេដឹងថាក្មេងស្រីរងគ្រោះនៅមានដង្ហើមនៅឡើយ។ ប៉ុន្តែ អ្វីគួរឲ្យសោកស្តាយ គឺនាងបានផុតដង្ហើម ស្របពេលដែលយមកដល់ឡានពេទ្យ ដែលគេពុំឃើញមានអុកស៊ីហ្សែន។
បុរសខាងលើនោះ ត្រូវបានអ្នកប្រើប្រាស់បណ្តាញសង្គម ប្រាប់ឲ្យដឹងថា គាត់មានឈ្មោះ ហាក់ ដារ៉ា (ហៅអាខ្លាង) ។ ផ្ទះរបស់គាត់នៅជាប់កែងផ្លូវលេខ២០០ ដែលម្ដុំនោះគេហៅថាស្រែអំបិល នៅជិតសាលាអារីយ៉ង់(សាលាបារាំងនៅជិតផ្សារអូឫស្សី) ។ គាត់ជាសិស្សរៀននៅសាលាភ្នំដូនពេញ និងសាលាវិទ្យាល័យព្រះស៊ីសុវត្ថិ និងក៏ជាក្រុមអ្នកលេងម៉ូតូប្រណាំងផងដែរ។
នេះជាចំណុចអវិជ្ជមានមួយ ដែលគេរិះគន់ ដើម្បីឲ្យមានការយកចិត្តទុកដាក់ នៅក្នុងហេតុការណ៍ក្រោយៗប៉ុណ្ណោះ។ តែយ៉ាងណា យើងក៏សូមកោតសរសើរយ៉ាងខ្លាំង ចំពោះកម្លាំងពាក់ព័ន្ធទាំងអស់ ដែលបានចុះជួយសង្គ្រោះនៅក្នុងហេតុការណ៍សោកនាដកម្មនេះ៕ ដោយ៖ លឹម ហុង