ភ្នំពេញ៖ កាលម្សិលមិញ នារីស្រស់ស្អាតម្នាក់ដែលគេស្គាល់ថា ត្រូវជាបងស្រីបង្កើតរបស់ថៅកែពេជ្រ ទ្រី ដាណា ដែលមានឈ្មោះថា ទ្រី សុផានិត បានចេញវីដេអូវាយប្រហាររិះគន់យ៉ាងខ្លាំងៗ ទៅលើប្អូនស្រីរបស់ខ្លួន និងព្រមទាំងប្រើពាក្យមិនពិរោះស្តាប់ថែមទៀតផង ដែលធ្វើឲ្យមហាជនមានការភ្ញាក់ផ្អើល រហូតនាំឲ្យគេបញ្ចេញមតិទាំងហួសចិត្តថា រឿងបងប្អូនមិនគួរណាយកមកហែកហួរបែបនេះទេ។
ដោយអត់ទ្រាំនឹងទង្វើវាយប្រហាររបស់ស្រីខ្លួន ដែលនៅសុខៗ បង្កើតរឿងបែបនេះឡើង អ្នកនាង ទ្រី ដាណា និងស្វាមី ក៏បានចេញវីដេអូ Live ប្រតិកម្មតបទៅវិញ ដោយក្នុងនោះ អ្នកនាង ទ្រី ដាណា បាននិយាយថា «មនុស្សដូចខ្ញុំសុំយកច្បាប់ប្រទេសមកដោះស្រាយ ជួបគ្នាឆាប់ៗនេះនៅក្រសួង ហើយខ្ញុំក៏សង្ឃឹមទុកមុនថា ច្បាប់នឹងជួយដោះស្រាយរកយុតិធម៌អោយខ្ញុំបាន» ។
ក្រោយឃើញបងប្អូនស្រីទាំងពីររបស់ខ្លួន ឈ្លោះហែកហួរគ្នាបែបនេះ ប្អូនប្រុសពៅអ្នកទាំងពីរដែលមានឈ្មោះ ទ្រី វេយោ បានចេញមុខគាំទ្រអ្នកនាង ទ្រី ដាណា និងច្រានចោលរាល់ពាក្យសម្តីវាយប្រហាររបស់បងស្រីធំរបស់ខ្លួន ដែលបានចោទមកលើអ្នកនាង ទ្រី ដាណា ដែលជាមនុស្សតែងតែធ្វើនូវអំពើល្អជាច្រើន នៅក្នុងសង្គម។
យ៉ាងណាមិញ ក្រោយឃើញរឿងនេះកាន់តែធំទៅៗ រហូតដល់ថ្នាក់មានការគំរាមប្តឹងផ្តល់គ្នាឡើងតុលាការ អ៊ុស្រីធំរបស់អ្នកទាំងពីរ ក៏បានចេញវីដេអូនិយាយទាំងទឹកភ្នែក សុំអង្វរដល់ក្មួយស្រីទាំងពីរ ឈប់បន្តហែកហួរគ្នាទៀតទៅ ព្រោះសុទ្ធតែជាបងប្អូនឯងទេ។ លោកយាយបន្តថា គាត់ពិតជាពិបាកចិត្តខ្លាំងណាស់ រាល់យប់គាត់ដេកពុំលក់ទេ និងចេះតែយល់សប្តិឃើញឪពុកម្តាយរបស់ពួកគេ មករកគាត់ ហើយយំទៀតផង ៕ ដោយ៖ លឹម ហុង