ខេត្តព្រះសីហនុ ៖ ក្រុមកម្មករសំណង់ របស់ក្រុមហ៊ុនអេម៉ារីអូ (EMARIO) មានទីតាំងនៅក្រុងព្រះសីហនុ នៅព្រឹកថ្ងៃទី៣១ ខែមករា ឆ្នាំ២០១៨ បានបន្តលើកបដាតវ៉ា និងយកគ្រឿងចក្រ បិទផ្លូវចេញចូលក្នុងបរិវេណក្រុមហ៊ុន ដើម្បីទាមទាអោយថៅកែក្រុមហ៊ុននេះ បើកលុយជាកម្លាំងញើសឈាម របស់ពួកគេ ដែលថៅកែ មិនបានបើកជូនអស់រយៈពេល ៣ខែកន្លងមកហើយ។
ការដ្ឋានសំណង់ សណ្ឋាគារ និងភោជនីយ៍ដ្ឋាន អេម៉ារីអូ មានទីតាំងនៅមុខព្រះរាជដំណាក់ ស្ថិតនៅក្រុម ៣០ ភូមិ៣ សង្កាត់៣ ក្រុងព្រះសីហនុ -ខេត្តព្រះសីហនុ។
ក្រុមហ៊ុននេះ មានកម្មករសំណង់ចំនួន ៤៥៧នាក់ បំរើការងារ នៅក្នុងការដ្ឋាននេះ ហើយត្រូវថៅកែមិនបើកប្រាក់ខែជូនចំនួន ៣ខែកន្លងមក។
ក្រុមកម្មករទាំងនោះ បានបន្តប្រមូលផ្តុំគ្នា ទាមទារបើកប្រាក់ខែ បានចូលដល់ថ្ងៃទី2 ហើយ ដោយបានលើកបដាតវ៉ាផ្សេងៗ និងមានរូបថត របស់ សម្តេចអគ្គមហាសេនាបតីតេជោ ហ៊ុន សែន និង រូបថត សម្តេចកត្តិព្រឹទ្ធបណ្ឌិត ប៊ុន រ៉ាលី ផងដែរ។
រហូតមកដល់ពេកនេះ ក្រុមកម្មករ បានបើកគ្រឿងចក្រយកមកដាក់បាំងមាត់ផ្លូវក្លោងទ្វារ ចូលសណ្ឋាគារ និង រមណីយដ្ឋាន អេម៉ារីអូ ដោយមានបិតបដាផ្សេងៗ។
សមត្ថកិច្ច ដែលឃ្លាំមើលការប្រមូលផ្តុំ របស់ក្រុមកម្មករសំណង់ទាំងនៅះ បានអោយដឹងថា ការតវ៉ានេះ ដោយសារខាងម្ចាស់ការដ្ឋានសំណង់សណ្ឋាគារ និងរមណីយដ្ឋានខាងលើ មិនបានបើកប្រាក់ខែអោយកម្មករសំណង់ទាំងនោះចំនួន 3ខែកន្លងមកហើយ គឺចាប់ពី ខែវិច្ឆិកា ឆ្នាំ២០១៧ និងខែមករា ឆ្នាំ២០១៨។
ក្រុមកម្មករ បានសំណូមពរដល់សម្តេច ហ៊ុន សែន និង សម្តេចកត្តិព្រឹទ្ធបណ្ឌិត ប៊ុន រ៉ានី ជួយអន្តរាគមន៍ លោកស្រី ជូ តារារ៉េត ហៅ ធាវី ជនជាតិខ្មែរ ដែលជាថៅកែក្រុមហ៊ុនអេម៉ារីអូ អោយមកបើកប្រាក់ខែជូនពួកគេអោយបានឆាប់ ព្រោះ ពេលនេះ ពួកគាត់ដាច់បាយហើយ។
អ្នកមើលការខុសត្រូវ ការដ្ឋានសំណង់ របស់ក្រុមហ៊ុនអេម៉ារីអូ បានឲ្យដឹងដែរថា ការដែលក្រុមហ៊ុននេះ មិនបើកលុយអោយកម្មករអស់រយៈពេល ៣ខែ កន្លងមកនេះ ដោយសារប្តីប្រពន្ធម្ចាស់ក្រុមហ៊ុននេះមានរឿងផ្ទៃក្នុងគ្រួសារឈ្លោះទាស់ទែងគ្នា ឬ កំពុងមានរឿងក្តីនៅតុលាការ។
បញ្ហានេះ មន្ត្រីរដ្ឋបាលខេត្តព្រះសីហនុ និងមន្ទីរការងារ និងបណ្តុះបណ្តាលវិជ្ជាជីវៈខេត្តនេះ បានចុះសម្របសម្រួល ដើម្បីឈានទៅរកដំណោះស្រាយ និង ស្នើសុំអោយកម្មករសំណង់មានការយោគយល់ ហើយស្នើសុំអោយកម្មករនាំយកគ្រឿងចក្រចេញពីផ្លូវ។
កម្មករ បានឲ្យដឹងថា បើថៅកែ មិនព្រមបើកលុយអោយពួកគេទេ ពួកគាត់នឹងមិនបញ្ឈប់ការតវ៉ាទេ។
ទាក់ទិនវិវាទនេះ ក្រុមការងារខេត្តព្រះសីហនុ ដឹកនាំដោយ លោក អ៊ី ធារិន អនុប្រធានអន្តរវិស័យសាលាខេត្ត តំណាង ឯកឧត្តម យន្ត មីន អភិបាលខេត្តព្រះសីហនុ ក៏បានចុះមកសម្របសម្រួលជាមួយក្រុមកម្មករ នៅក្នុងការដ្ឋានសំណង់ សណ្ឋាគារ និង រមណីយដ្ឋាន អេម៉ារីអូ ស្ថិតនៅក្រុម៣០ ភូមិ៣ សង្កាត់៣ ក្រុងព្រះសីហនុ -ខេត្តព្រះសីហនុ ។
ជាលទ្ធផល ក្រុមការងារសាលាខេត្ត បានណែនាំឲ្យតំណាងកម្មករធ្វើបញ្ជីឈ្មោះកម្មករដែលមិនទាន់បានទទួលប្រាក់ខែ ដោយផ្ទៀងផ្ទាត់ជាមួយបញ្ជីឈ្មោះកម្មករទាំង ៤៥៧ នាក់ ដែលក្រុមហ៊ុនផ្ញើពីភ្នំពេញ មកមន្ទីរការងារខេត្តព្រះសីហនុ។
ក្រោយពីមានការសម្របសម្រួល កម្មករបានឯកភាព ដកគ្រឿងចក្រចេញពីច្រកផ្លូវចូលជាបណ្តោះអាសន្ន និងរំសាយ ទៅតាមបន្ទប់ស្នាក់នៅរៀងៗខ្លួន នៅវេលាម៉ោង ១១ និង២០នាទី ថ្ងៃទី៣១ ខែមករា ដើម្បីរង់ចាំស្តាប់លទ្ធផលពីក្រុមការងារថ្នាក់ខេត្ត ដោះស្រាយជូន ក្នុងពេលដ៏ឆាប់ខាងមុខ៕ ដែន សីមា