កោះកុង ៖ បុរសម្នាក់ប្រហែលជិះម៉ូតូលឿន ហើយមិនប្រយ័ត្ន បានបុកប៉ះនឹងរបាបង្កាន់ដៃស្ពានកោះកុង បណ្តាលឲ្យមនុស្សហោះចេញពីម៉ូតូ ធ្លាក់ទៅខាងក្រោមតែម្តងកាលពីព្រឹកថ្ងៃទី២១ ខែកក្កដា ឆ្នាំ២០២០ ។ តែនេះក៏ចាត់ទុកជាគ្រោះថ្នាក់សំណាងដែរហើយ ដែលបុរសរូបនេះធ្លាក់ទៅចំតំបន់ដីភក់ និងបានមួកសុវត្ថិភាពជួយការពារក្បាល ដែលធ្វើឲ្យគាត់រងរបួសចុកឆ្អល់យ៉ាងខ្លាំងក្នុងគ្រានោះ។
ទោះយ៉ាងណា ភ្លាមៗនោះ អ្នកដំណើរទាំងអស់ ពុំអាចជួយសង្គ្រោះគាត់បានទេ ព្រោះតែស្ថានភាពស្ពានកោះកុងវែងសន្លឹមណាស់ ដោយបានត្រឹមនាំគ្នាស្វះស្វែងរកអូបូ និងឡានពេទ្យ មកជួយសង្គ្រោះប៉ុណ្ណោះ។
ជនរងគ្រោះពុំត្រូវបានស្គាល់អត្តសញ្ញាណនោះទេ តែគេបានត្រឹមដឹងថា ម៉ូតូរបស់គាត់ម៉ាក Scoopy ពណ៌ខ្មៅ ពាក់ផ្លាកលេខ កោះកុង 1B1912 ដែលកំពុងចតនៅនឹងបង្កាន់ដៃស្ពាន ក្រោយហេតុការណ៍បានកើតឡើង។
យ៉ាងណាមិញ ក្រោយពីបានឃើញមនុស្សជាច្រើនបានចូលខំមិនរិះគន់ថា «ហួសចិត្ត! ឃើញបែបនេះហើយ មិនប្រញាប់ប្រញាល់ជួយជនរងគ្រោះទេ តែបែរជានាំគ្នាឈរថតទៅវិញ» ស្រាប់តែម្ចាស់គណនីហ្វេសប៊ុកឈ្មោះ កង វិជេដ្ឋា រតន៍ ដែលបានបង្ហោះវីដេអូអំពីហេតុការណ៍នេះ បានដាក់ទៅវិញថា «ប្រុងឲ្យលោតទៅជួយមែន ទាក់ទងទៅប៉ូលិសផង ឡានពេទ្យផង អូប័រផង ហើយប្រុងឲ្យលោតទៀត» ។ ចំណែកគណនីហ្វេសប៊ុកឈ្មោះ ឃឹម ជី វន្ត ក៏បានលើកឡើងបែបនេះដែរថា៖ «មើលតែកម្ពស់២ម៉ែត្របង ស្គាល់ស្ពានកោះកុងអត់? បើស្គាល់ហើយនៅនិយាយអ៊ីចឹងរួចទៀត ហៅថាមហាមនុស្សហើយ អ៊ីចឹងទេគាត់មកលោតទៅជួយតិចទៅ»៕ ដោយ៖ លឹម ហុង