ភ្នំពេញ៖ ប្រជាពលរដ្ឋរស់នៅភូមិចក សង្កាត់រកាក្នុង ក្រុងដូនកែវ ខេត្តតាកែវ ប្រហែលជាអាចនឹងទទួលបានភាពយុត្តិធម៌ចំពោះពួកគាត់វិញ ក្រោមការដោះស្រាយរបស់ឯកឧត្តម អ៊ូច ភា អភិបាលខេត្តតាកែវសារជាថ្មី លើករណីការបោះបង្គោលព្រំចូលក្នុងសំយ៉ាបផ្ទះរបស់ប្រជាពលរដ្ឋ៣គ្រួសារដែលរស់នៅជាង៤០ឆ្នាំ ។
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញលិខិតមួយច្បាប់ជម្រាប់ជូនលោកអភិបាលខេត្តតាកែវ ស្តីពីការចុះផ្សាយរបស់គេហទំព័រ CEN ដែលបានចុះផ្សាយថា ពលរដ្ឋបីគ្រួសារ នៅភូមិចក បាត់បង់នូវជំនឿចិត្តលើអាជ្ញាធរខេត្តតាកែវ ដោយសារគេបោះបង្គោលដីចូលដល់ក្នុងសំយ៉ាបផ្ទះដែលធ្លាប់រស់នៅជាង៤០ឆ្នាំ។
ពាក់ព័ន្ធករណីនេះ តាមរយៈលិខិតរបស់ក្រសួងមហាផ្ទៃ លោកអង មង្គល រដ្ឋលេខាធិការក្រសួងមហាផ្ទៃ បានលើកឡើងថា “ក្រោយពីបានពិនិត្យខ្លឹមសាររបស់គេហទំព័រCENឃើញថា ករណីនេះជាសមត្ថកិច្ចរបស់រដ្ឋបាលខេត្តតាកែវ ដូចនេះក្រសួងមហាផ្ទៃ សូមបង្វែរករណីនេះជូនឯកឧត្តមអភិបាល នៃអភិបាលខេត្តតាកែវ ពិនិត្យជាសមត្ថកិច្ច រួចរាយការណ៍ជាលាយលក្ខណ៍អក្សរមកក្រសួងមហាផ្ទៃ ដើម្បីក្រសួងមានមូលដ្ឋានចាត់ការបន្ត”។
គួរំលឹកផងដែរថា កាលពីថ្ងៃទី ៣០ ខែមេសា ឆ្នាំ២០២០ គេហទំព័រ CEN បានចុះផ្សាយដោយមានខ្លឹមសារថា ៖ សុទ្ធតែជាមន្ត្រីបម្រើការងារឲ្យរដ្ឋរស់នៅចាំនៅលើដីរបស់ខ្លួនជាង៤០ឆ្នាំមកហើយ តែមកត្រូវអាជ្ញារធរខេត្តសម្រេចកាត់ដីរបស់ពួកគាត់ ឲ្យទៅបុគ្គលដែលមានទឹកប្រាក់ទៅវិញ ពួកគាត់លើកដៃម្រាមដៃ១០ស្នើសុំឲ្យសម្តេចតេជោ ជួយក្រោយគេដាំបង្គោលចូលក្នុងសំយ៉ាបផ្ទះទៅហើយ ។
ការឈឺចាប់កាន់តែកើតមាន សេចក្តីទុកចិត្តទៅលើអាជ្ញាធរខេត្តតាកែវ កាន់តែបាត់បង់ចំពោះប្រជាពលរដ្ឋរស់នៅក្នុងភូមិចក សង្កាត់រកាក្នុង ក្រុងដូនកែវ ខេត្តតាកែវ ដោយសារតែ ពួកគាត់មករស់នៅលើទឹកដីនេះជាយូរមកហើយជាង៤០ឆ្នាំ កាន់កាប់លើដីនៅក្នុងភូមិឃុំខាងលើ រស់នៅទល់មុខត្រពាំងទឹកសាធារណៈមួយ តែមកដល់ថ្ងៃទី២៩ ខែមេសា ឆ្នាំ២០២០នេះ បែរជាអាជ្ញាធរខេត្តតាកែវ ដែលដឹកនាំដោយលោក ម៉ឹង វុធី អភិបាលរងខេត្ត រួមជាមួយនិងក្រុមការងារ កាន់លិខិតបញ្ជាបេសកកម្ម មកអនុវត្ត ស្នើសុំអន្តរាគមន៍ដកវិញ្ញាបនបត្រសម្គាល់ម្ចាស់អចលនវត្ថុ និងឲ្យមន្ត្រីភូមិបាលបោះបង្គោលកំណត់ព្រំក្បាលដីលេខ ៩១៦ និង ៩២១ ចុះថ្ងៃទី ២១ខែកុម្ភៈ ឆ្នាំ២០២០របស់ឈ្មោះ សុខ ទូច និងប្រពន្ធឈ្មោះ ធុន សាម៉ន ទៅវិញ ។
ឥឡូវនេះក្រសួងមហាផ្ទៃ បានចេញលិខិតតបឲ្យឯកឧត្តម អភិបាលខេត្តតាកែវ ចុះពិនិត្យលើការងារនេះឡើងវិញក្រោយ លោក ម៉ឹង វុទ្ធី អភិបាលរងខេត្តតាកែវ ចុះអនុវត្តជាមួយក្រុមការងារបោះបង្គោលព្រំចូលសំយ៉ាបផ្ទះរបស់ពួកគាត់ឡើងវិញ ៕ដោយ៖ តាកែវ
