ស្រីៗ៣នាក់ ក្នុងចំណោមបុរសម្នាក់ ត្រូវឈរត្រង់ជើងភ្លឹងនិងសឹងតែពុំដង្ហើម បន្ទាប់ពីខ្លាឃ្មុំខ្មៅដ៏ធំ១ក្បាល បានរារាំងដំណើរ ខណៈពួកគេធ្វើដំណើរដោយថ្មើរជើង នៅផ្លូវលំមួយកន្លែង នៅក្នុងឧទ្យាន Chipinque Ecological ស្ថិតក្នុងទីក្រុង San Pedro Garza Garcia ប្រទេសម៉ិចស៊ីកូ។
នៅក្នុងវីដេអូបានបង្ហាញឲ្យឃើញ សត្វខ្លាឃ្មុំខ្មៅ១ក្បាលដែលមិនដឹងលេចខ្លួនចេញពីកន្លែងណាមួយ ហើយបានដើរទៅរកស្រីៗអ្នកឡើងភ្នំទាំងនោះ ។ ស្ថិតក្នុងស្ថានភាពដ៏ប្រឈមនឹងគ្រោះថ្នាក់នេះ ពួកនាងទាំងបី ត្រូវបានឃើញឈរយ៉ាងស្ងៀមស្ងាត់ មិនរត់ចេញនោះទេ ដោយទុកឲ្យខ្លាឃ្មុំនេះធ្វើការត្រួតពិនិត្យ (ហិត) លើដងខ្លួនរបស់ពួកគេតាមចិត្ត ព្រោះខ្លាចវាក្លាយទៅជាកាចសាហាវ។
ជាមួយស្ថានការណ៍ព្រឺព្រួចនេះផងដែរ នារីម្នាក់សូម្បីត្រូវបានឃើញនៅលើលើកទូរស័ព្ទថត Selfie ទៀតផង ខណៈខ្លាឃ្មុំនេះបានឈរទ្រោបពីលើរូបនាង ខណៈពេលដែលមិត្តភក្តិរបស់នាង២នាក់ទៀត ដែលម្នាក់ឈរបែរខ្នងទៅព្រៃ និងម្នាក់ទៀត ឈរក្នុងគម្លាតប្រហែលជាង១ម៉ែត្រ ឈរត្រង់ជើងភ្លឹង ក្នុងអារម្មណ៍តក់ស្លុត សឹងតែពុំដង្ហើម។
ទោះយ៉ាងណា បន្ទាប់ពីខ្លាឃ្មុំនេះចំណាយពេលប្រហែល១នាទី ធ្វើការហិតលើដងខ្លួន និងជើងអស់ចិត្ត វាក៏បានដើរចាកចេញទៅ ហើយពួកនាងទាំងបីក៏បានរួចខ្លួនទាំងព្រលឹងពុំនៅក្នុងខ្លួន។ នេះចាត់ទុកជាសំណាងធំហើយ ដែលប៉ះចំខ្លាឃ្មុំដែលពុំកាចសាហាវ ពុំនោះទេ ពួកគេក្នុងចំណោមនោះ អាចនឹងរងគ្រោះថ្នាក់ជាក់ជាពុំខានឡើយ៕ ដោយ៖ លឹម ហុង
YouTube
