បន្ទាយមានជ័យ ៖ បញ្ជាការ បញ្ជាការរង នាយបញ្ជាការ នាយបញ្ជាការរង បានចូលរួមបុណ្យសពឪពុករបស់លោកនាយការិយាល័យមួយ នៃកងរាជអាវុធហត្ថខេត្តបន្ទាយមានជ័យ កាលពី ថ្ងៃទី៣០ ខែមករា ឆ្នាំ២០១៨ នៅភូមិគាបសង្កាត់ទឹកថ្លា ក្រុងសិរីសោភ័ណ ។
លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ រួមជាមួយមេបញ្ជាការរង និងសហការីជាច្រើននាក់ បាននាំយកថវិកា ចំនួន ១.៦៤៥.០០០រៀលនិងអង្ករចំនួន ៥ការ៉ុង ទៅចូលរួមបុណ្យសពឪពុកលោកវរសេនីយ៍ត្រី សាយ សាវឿន នាយការិយាល័យផែនការនៃមន្ទីររដ្ឋបាល និងហិរញ្ញវត្ថុខេត្ត ដែលបានទទួលមរណៈភាពដោយជរាពាធ កាលពីវេលាម៉ោង ៦ និង៣០នាទី ថ្ងៃទី២៨ខែមករា ឆ្នាំ២០១៨ ។
លោកឧត្តមសេនីយ៍ បោន ប៊ិន រំលឹកថា សកម្មភាពសង្គម មនុស្សធម៌នានាគឺជាការណែនាំរបស់នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ។
ហើយកងរាជអាវុធហត្ថខេត្តតែងតែចូលរួមយ៉ាងសកម្ម ក្នុងការគាំទ្រ និងរួមចំណែកដល់អាវុធហត្ថ ដែលជួបទុក្ខលំបាកផ្សេងៗជាយថាហេតុ ។
ក្នុងនោះដែរលោកវរសេនីយ៍ត្រី សាយ សាវឿន ព្រមទាំងក្រុមគ្រួសារ បានថ្លែងអំណរគុណដល់លោកឧត្តមសេនីយ៍ បោន ប៊ិន មេបញ្ជាការកងរាជអាវុធហត្ថខេត្ត រួមជាមួយ លោកមេបញ្ជាការរង ព្រមទាំងសហការីទាំងអស់ ដែលបានចូលរួមរំលែកទុក្ខដ៏ក្រៀមក្រំជាមួយក្រុមគ្រួសាររបស់លោក រួមទាំងមានការឧបត្ថម្ភគាំទ្រទាំងសម្ភារៈ និងថវិកា ទៀតផង៕ ដោយ ៖ បន្ទាយ