បន្ទាយមានជ័យ ៖ ជនសង្ស័យ៤នាក់ ក្នុងនោះមានម្នាក់ជាកូនបង្កើតផង បានរងការចោទថា លួចមានស្ថានទម្ងន់ពីជនរងគ្រោះម្ចាស់ទ្រព្យម្នាក់ នៅក្រុងប៉ោយប៉ែត ហើយត្រូវកម្លាំងអាវុធហត្ថចាប់ខ្លួន ហើយកសាងសំណុំរឿងបញ្ជូនទៅតុលាការខេត្ត ។
សមត្ថកិច្ចអោយដឹងថា ៖ ជនរងគ្រោះជាម្ចាស់ទ្រព្យមានឈ្មោះ ពេញ សុធា ភេទ ប្រុសអាយុ៤៤ឆ្នាំ ជនជាតិខ្មែរ ត្រូវជាឪពុកបង្កើតរបស់ជនរងគ្រោះឈ្មោះ ម៉ម ឃឺរី ភេទ ប្រុស អាយុ ១៤ឆ្នាំ បច្ចុប្បន្នរស់នៅភូមិ បាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត។ ជនរងគ្រោះបានអស់ភាពអត់ធ្មត់ ហើយបានប្តឹងកូននិងគូកនពួកវាថា បានលួចមានស្ថានទម្ងន់ទោស កាលពីម៉ោង ១១ យប់ថ្ងៃទី២៦ ខែមករាឆ្នាំ២០១៨ កន្លងមកនៅចំណុចខាងក្រោយសាលាពន្លកខ្មែរថ្មី ស្ថិតនៅភូមិក្បាលស្ពាន២ សង្កាត់-ក្រុងប៉ោយប៉ែត ។
លោកវរសេនីយ៍ នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានអោយដឹងថា ៖ កម្លាំងអហបានចុះស្រាវជ្រាវរកមុខសញ្ញាជនសង្ស័យ ហើយនៅម៉ោងជិត៦ល្ងាចថ្ងៃទី២៨ ខែមករា ឆ្នាំ២០១៨ ទើបអាចកំណត់មុខសញ្ញាជនសង្ស័យបាន។ តមក២ថ្ងៃ កម្លាំងបានឃាត់ខ្លួនជនសង្ស័យ រួមជាមួយបក្សពួក បានចំនួន ០៤នាក់ និងវត្ថុតាងរួមមាន ៖ ខ្សែដៃប្លាទីន ០១ខ្សែ, ចិញ្ចៀនប្លាទីនដាំត្បូង ០១វង់, ទូរស័ព្ទដៃម៉ាក (IPhone 6s) ពណ៌ផ្កាឈូក ០១គ្រឿង ។ និងបានកសាងសំណុំរឿងបញ្ជូនមកទីបញ្ជាការកងរាជអាវុធហត្ថខេត្ត ដើម្បីចាត់ការបន្ត ។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត បន្ទាយមានជ័យទទួលការងារយុត្តិធម៌ បានអោយដឹងថា ៖ ជនសង្ស័យ(ដែលទំនើង ញៀនថ្នាំ) ទាំង ០៤នាក់ខាងលើ ថាខ្លួនពិតជាបានសម្លុតជនរងគ្រោះយក ខ្សែដៃ ចិញ្ចៀន និងទូរស័ព្ទដៃម៉ាក (IPhone 6s) នោះមែន ។
ពួកគេនិយាយថា ទង្វើបែបនេះព្រោះតែចង់បានរបស់ទាំងនេះរួចយកទៅលក់បានលុយចាយ ផឹកស៊ីសប្បាយ។ ករណីនេះ កម្លាំងជំនាញអាវុធហត្ថខេត្តបានកសាងសំណុំរឿងបញ្ជូនជនសង្ស័យទៅតុលាការ ដើម្បីចាត់ការបន្តហើយ៕ ដោយ ៖ បន្ទាយ
