ភ្នំពេញ៖ រថយន្តសណ្ដោងកុងតឺន័រមួយគ្រឿង បើកឡើងស្ពានច្បារអំពៅមិនរួចបាន ដាច់ហ្វ្រាំង ក៏រអិលថយក្រោយជ្រុលទៅបុកបង្គោលស្លាកប៉ាណូ ពេញទំហឹង បណ្ដាលឲ្យដាច់ដល់គល់ បង្កការភ្ញាក់ផ្អើលនៅវេលាម៉ោង ២និង៣០នាទី រំលងអធ្រាត្រឈានចូលថ្ងៃព្រហស្បតិ៍ទី២៣ ខែកក្កដា ឆ្នាំ២០២០ នៅតាមបណ្ដោយផ្លូវជាតិលេខ ១ ស្ថិតក្នុងសង្កាត់ច្បារអំពៅទី១ ខណ្ឌច្បារអំពៅ រាជធានីភ្នំពេញ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ គេបានឃើញរថយន្តសណ្ដោង កុងតឺន័រ មួយគ្រឿង ពាក់ផ្លាកលេខ ភ្នំពេញ 3B-6862 ដែលធ្វើដំណើរតាមបណ្តោយផ្លូវជាតិលេខ ១ ក្នុងទិសដៅ ពីកើតទៅលិច ខណៈមកដល់ត្រង់ចំណុចកើតហេតុខាងលើ ក៏បានឡើងទៅលើស្ពានច្បារអំពៅ តែឡើងមិនរួច ភ្លាមនោះរថយន្តបានដាច់ហ្វ្រាំង រអិលចុះថយក្រោយជ្រុលទៅបុកបង្គោលស្លាកប៉ាណូ ពេញទំហឹង បណ្ដាលឲ្យដាច់ដល់គល់ រងការខូចខាតយ៉ាងដំណំ តែសំណាងល្អមិនមាននរណាម្នាក់រងរួសនោះទេ ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ ក៏បានទាក់ទងទៅខាងជំនាញចរាចរណ៍ ចុះមកវាស់វែងយករថយន្តទៅរក្សាទុកនៅ ការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ រង់ចាំដោះស្រាយតាមច្បាប់ ៕ ដោយ៖សា មេត