វិចិត្រករសាក់ជនជាតិអ៊ីតាលីម្នាក់ បានកំពុងធ្វើឲ្យមនុស្សជាច្រើនភ្ញាក់ផ្អើលជាខ្លាំង បន្ទាប់ពីគាត់បានចែករំលែករូបសាក់ដ៏ចម្លែកគ្មាន២ក្នុងលោក ដែលគាត់សាក់ក្នុងមាត់អតិថិជនមួយចំនួន។
Matteo Masini មកពី Florence គឺជាអ្នកសាក់រូបដែលមានបទពិសោធន៍ជំនាញជាង ៦ ឆ្នាំ មកហើយ។ Matteo បានចាប់ផ្តើមធ្វើការនៅស្ទូឌីយោសាក់ បន្ទាប់ពីបញ្ចប់ការសិក្សាពីវិទ្យាល័យ។
Matteo បាននិយាយថា «រឿងដ៏ចម្លែកនេះ ចាប់ផ្តើមល្បី គឺនៅពេលមិត្តភក្តិស្រីម្នាក់របស់ខ្ញុំ បានសំណូមពរឲ្យខ្ញុំចាក់សាក់នៅក្នុងមាត់របស់នាង បន្ទាប់ពីនាងបានឃើញស្នាមសាក់មួយក្នុងចំណោមការចាក់សាក់ដំបូង ដែលខ្ញុំបានធ្វើសម្រាប់អតិថិជនរបស់ខ្ញុំ ហើយនាងបាននិយាយមកខ្ញុំថា ហេ! Matteo ខ្ញុំចង់មានរូបភាពបែបនេះនៅក្នុងមាត់របស់ខ្ញុំដែរ។ នៅពេលនោះ ខ្ញុំក៏បានប្រាប់នាងថា អូខេ បន្ទាប់មកធ្វើវា» ។
ចាប់តាំងពីពេលនោះមក Matteo បានបញ្ចប់ការចាក់សាក់ក្រអូមមាត់សរុបចំនួន ១០ សម្រាប់អតិថិជន ហើយទាំងអស់នោះគឺជាការចាក់សាក់ងាយៗប៉ុណ្ណោះ ។ ក្នុងនោះ ក៏មានអតិថិជនម្នាក់បានស្នើ Matteo ចាក់សាក់រូបសុដន់នៅក្នុងមាត់របស់គាត់ផងដែរ។
អ្នកចាក់សាក់វ័យ ២៥ ឆ្នាំ រូបនេះ បានបង្ហើបឲ្យដឹងថា ការងារសិល្បៈបែបនេះចំណាយពេល ២០ នាទី ទើបចប់ ប៉ុន្តែ វាអាស្រ័យលើប្រធានបទ និងប្រភេទនៃមាត់បុគ្គលម្នាក់ៗប៉ុណ្ណោះ។
ពិតមែនហើយ ការចាក់សាក់នៅក្នុងក្រអូមមាត់បែបនេះ ត្រូវបានគេមើលឃើញថា វាពិតជាឈឺចាប់ខ្លាំងណាស់ហើយ។ ទោះជាយ៉ាងណា Matteo បានប្រាប់ឲ្យដឹងថា មនុស្សគ្រប់គ្នាដែលគិតថាវាឈឺណាស់ នោះជាអ្វីដែលស្រមើលស្រមៃប៉ុណ្ណោះ ប៉ុន្តែ វាពិតជាមិនឈឺចាប់នោះទេ៕ ដោយ៖ លឹម ហុង